Pang Shug 22 - Lacid Common Language Bible

¹ Hau: thang: ri moug: lagyoo: gi Mangsoo yo' yang nu" da" zhung: tang mo yau, thu' lo lho: kyi: myhoo: lug su" bang young" jo, da" kangso' gyid moo" lang ngoori toin" shid' wigi

² Hau" da" gyid moo" lang gi voogung kang mo fu" moo" khyoo: cang yau, gyoo" lo nyid. Hau: gyid yam, shoid khang" moo" moo lham" moo" khyab, khang" moo" dazain moo daxe: eig lheing: ashi" zei: da" kang: so' shi" gam youg jo.hau: shi" gam, da" afu' joem we' byumyu" yi da" noo boug: ri ze: gi byid: wa shid re" - moocid" moo" nghoid nyid.

³ Hau: voogung khoug: moo Mangso nheing" myeing" nheing" thui: ga: zigi khanham we' jo, loo: wa zi anghoid. Mangsoo yo' yang nu" da" zhung: tang gi voogung khoug: moo dajo, jo, wigi Nya: dei zoo: yi gi nyang: ri noku coung" nghei boem wa za: nghoid.

⁴ Ngoonu" gi nya: da" myonhoo: ri yu" wigi nyangnu" da" ngeilang: joem moo nya: myeing ri lhid" tab to" boem wa.

⁵ Hau: voogung moo myen" khanham we' ajo, yoomo nyangnu" gi myiboung: da" bidbang we' bid da" boo" bang we' aca" loo: wa Khasu" wim gari Aseing: Mangsoo gi nyangnu" da" bidbang bue" lo wigi nyangnu" gi apyaid atoo: moo Khokham" yi yhang: ti" vhoeb khang" lo" boem wa.

Yesu Myab, Myab Doem Gyoo" Ri" Wa.

⁶ Hau: thang: ri moug: lagyoo: ngoori tid zigi " He: dang: joem gi deing byeung" ziyo' loem, ge" nyid. Hau: lho: nya: venyi lapi: yi ri kaid' byid: da" Aseing: Mangsoo gi ayo, khamyhang amyang" ri bue" loo wa da" khyoo:- nya: dei zoo: yi ri toin" shid' wa shid re" nya: da" moug: lagyoo: yi ri nhang: kaid' bye ga: wigi Yesu ngoori tid.

⁷ Yesu gi tam' gyoo: ge' ngoo amyang" ri re" loo wa he: jhoem: pug mo lapi: dang: ri tam" gyoo: mo gi ngi lho, shau" boem wa ga: tid.

⁸ Ngoo Yohan gi he: da" khyoo: joem dangain" ri shau" gyo: ziyo' shau" myang su: nghoid. He: khyoo: ri shau" gyo: ziyo' bain, myang thang: ri he: khyoo: joem ngoori toin" shid' da" mouglagyoo: khyid: yang: moo ngoo gi nyang: ri goeb, pid' wa soin.

⁹ Nghoid loug we' nyang: ngoori tid zigi " Houg: su" akoid- ngoo gi re" da" mang: nhung" lapi: yi yo' he" mougsoug" moo bo da" mungdang: ri tam" gyoo: mo, dangain"- nanu" da" dei zoo: byencang" dayug nghoid. Mangsoo ri dano' ku" we' ,, ga: tid toem pyam.

¹⁰ Hau: thang: ri nyang: gi " He: mougsoug" moo bo da" lapi: dang: ri ayhoem" azau" too"- Khasu" wim gari he: khyoo: dangain" bue" loo wa ayo, gi jhang bye.

¹¹ Adeung amain" su: gi adeung amain" khyo" cang nyid shi" baja"- agyeungshang: su: gi agyeungshang: khyo" nyid shi" baja" - gyeungshang: su: gi gyeungshang: nyid baja",, ga: ngoori tid.

¹² Tam" gyo: yu" ge'. Ngoo amyang" ri ju" ri" wa dayug yo' dayug ri nya: moozoo" yo' dakhyoo" ti" - doem, toug" byid: wa moin: yi" da" ngi shab, jhung: shug gi ngoo ci: ri" wa.

¹³ Ngoo gi xang: shed" yug yo' lo" thang yug- gam, shid" shi: su: yo' gam, thang: theing su: nghoid,, ga: wigi Yesu tid.

¹⁴ Kangso' shi" gam, mo ashi" ri zoo: wa amyeing" yo" lho: voogung khoug: khyoo: khoem" moo" duang: khyo" yo" vang loo" sho' nyang: nya: da" byisheing: joem ri ced" phyu: pyam mo, gi ngi lho, nyid.

¹⁵ Nghoid loug we' voogung da" nghe: shoid moo nyid mo, gi loem" jeung" khyoo: moo khyoo: vhang: vhang: mo, goem, phain" maintain: khyoug" mo, yo' aved, avhu: koid mo, byu said mo, soolhoo: ri noku mo, yo' ung: khoug: mo we' zei: da" moozoo" khyo" we' no" zo mhau' fain" voo mo, nghoid nyid boem ago".

¹⁶ " Ngoo Yesu gi Phung byu yi da" akhoug: moo hid: yhang: te" khyoo: joem ri tid fu" kyoo" wa shid re" nga" moug: lagyoo: ri nhang: kaid. Ngoo gi davi da" akung: mo yhoem: byu nghoid lho: wigi nab, kyo' boo" myhu: we' ngoo nghoid nyid.

¹⁷ Hau: venyi yo' myhi, seig gi " Ri" we',, he: khyoo: ri shaug" gyoo: mo, hang" nghoid loug we' " Ri" we',, ga: tid baja". Gyid shed' su: gi ri" baja"- shug noug mo, hang" nghoid loug we' jhung: shug khyo" aphoug" agyoo" loo: za: kangso' gyid ri kham: shug goo" baja",, ga: tid.

Dang: Thang: Said' Lo" Zi

¹⁸ Ngoo Yohan gi he: da" mougsoug" mo lapi: dang: joem ri gyo: yu mo, dangain" ri jhug jhug tid poin" kaid zigi dang: he: gu: mo daja: ja: ri loung: kaid' su: hang" ri we' he: mougsoug" moo lhid" to" da" shen" yhen shid: gyoin, joem gi Mangso wigi nya: tho' moo lung: byid: loo wa.

¹⁹ He: mougsoug" moo bo da" lapi: dang: daja: ja: ri yu she: pyam' su: hang" ri nghoid loug we' he: mougsoug" moo lhid" to" da" kangso' shi" gam, mo shi" ri zoo: wa ziyo' gyeungshang: da" voogung mo yo" vang yu zoo: wa nya: da" agyid asoo: ri Mangso yu she: pyam byid: loo wa zi nghoid.

²⁰ Nghoid bye" - ngoo amyang" ri deing" deing nyang: ju" ri" wa ga: tid. Houg: su" bui" baja"- Aseing Yesu we"- gyoo" ri" we' o".

²¹ Aseing Yesu da" jeju" gi yug khang" moo" yo' dage" dajo, jo, baja" o".