Pang Shug 21 - Lacid Common Language Bible

Moug: Khung: Seig Yo' Myid Jang: Seig

¹ Houg: lang" moug: khung: seig yo' myid' jang: seig ri ngoo myang- xang: shed" mo moug khung: yo' xang: shed" mo myidjang: gi byug loo" khare" lho: nammugdara we' bei: loo: khari" bye.

² Hau: lho: gyeungshang: da" voogung seig Yerusalem gi nya: yhoem: seing: phoo yo' shau" goo" wa shidre" - jen" jen" lhoo, yhoung to" da" myhi, seig yhang: ti"- Mangso moug: khung: moug: di mo gyoo" lo ziringoo myang.

³ Hau: lho: wigi zhung: tang mo thui: zeing dakhoin" tid thu' lo da" zigi Yu" ge" - noku yhoem: gi xangsu: byu yi yo' dage" nghoid bye- Nyang: gi nyangnu" yo' dage" nyid lho: nyangnu" gi nya: da" byumyu" bue" loo wa Mangsoo gi nya: gung nyang: nyangnu" yo' dage" nyid lho: nyangnu" da" Mangsoo bue" loo wa nghoid.

⁴ Nyang: gi nyangnu" da" myojid" mo ngoug byid' thu' moo thu' ri soid' pyam byid: wa nghoid. Hau: jang" moo gi shid: zi no, zi koug shu: da" khyoo: yo' ngoug myeing" shu: thui: khanham we' ajo, loo. Axau" gu: gi bei: lo" byug bye, ga: tid nyid ziri ngoo shau" gyo.

⁵ Hau: thang: ri zhung: tang tho' moo zhoung: jo, su: dayug gi " Ziyoo jo, moo jo, dangain" ri ngoo gi Aseig doem koid too" wa,, ga: wigi tid. Nyang: ngoori we' tid zigi He: zirilhid" too" we' he: da" dang: gi deingmain" ziyo' loem, ge" da" dang: nghoid.

⁶ Hau: lho: nyang: doem, tid zigi Hau: gu: gi bain koid bye"- ngoo gi xang: shed" mo su: yo' thang: thang mo su- gam shid" shi: su: yo' gam thang: theing su: we' nghoid- gyid shed' su: ri hau" kangso' gyid ' bug moo shug gyid ri aphoug" amho, loo: za: ngoo byid: wa zi nghoid.

⁷ Oung: doid loo" su: hang" nghoid loug we' nga" jang" mo he: da" khyoo: ri shau" yu wa zi nghoid. Ngoo gi nya: da"Mangsoo bue" lo lho: nyang: gi nga" zoo: bue" loo wa zi nghoid.

⁸ Nghoid loug we' gyoug da" nheigloem: boo mo, aloem" ajeung" mo, anyhoin: athoung" bang:- aved, avhu: youg: shoo: goo: bang:- goem, phain" maintain: khyoug" bang:- soolhoo: ri noku mo, yo' no" zo mhau' fain" da" dang: ri tid mo, dangain" gi houg: bang: da" joyoo gi myi: yo' fang nge" nyid da" myimi: thoem" moo nghoid. Hau" zigieig lheing: ein: da" shid: lo" khyoo: nghoid- ga: tid nyid.

Yerusalem Voogung Seig

⁹ Hau: thang: rilo" thang da" shid: gyoin, noogyoin, nyhed loem: yo' byeung" da" goem, nyhed loem: ri ci: moug: lagyoo:- nyhed yug mo dayug nga" jang" moo re" tid zigi Ri" we' hau: yang nu" da" yhoem: seing: myhi' ein: da" myi: yi: seig gi ngoo nang ri toin" shid' ba- ga: tid.

¹⁰ Houg: lang" nyang: ngoori- gye" myhang: da" boem, phyoo" khyoo: venyi khyo" shu" do, lo" lho: Mangso myonhoo: phung" yoeb, doug bang ziyo' moug: khung: moug: di Mangso shid' khoin" mo ju" gyoo" lo da" gyeungshang: voogung Yerusalem aseig ngoori toin" shid.s

¹¹ Hau: voogung mo doug bang zigi kyi: myhoo: lug yhang: ti" gyeung" lho, wigi gye" phau" da" dain: lug lung nyoug yhang: ti" du nyid.

¹² Hau: voogoung da" khloem" duang: joem moo mouglagyoo: daxe: eig yug zung" lhug nyid lho: khoem" daxe: eig duang: bo da" gye" gyi: myhang: da" vang khyam: kyam, lheung: to. Hau" tho' mo gootu:- Israela byumyu" yi daxe: eig koung: bang: da" myeing ri we' hau: khoem" duang: joem da" atho' moo lhid" tab yoin" to.

¹³ Hau: voogung gi bid thu' shoid khyoo:- soem" loem:- moug: zhoung: shoid khyoo: soem" loem:- moug: thang: shoid khyoo: soem" loem:- bidvang shoid khyoo: soem" loem: koid wigi dashoid khyoo: khoem" moo" soem" duang: duang: phang to.

¹⁴ Hau: voomo" da" vang khyam: gi apoem: ayang: lug daxe: eig loem: atho' moo zhoug to" wigi houg: bang: da" atho' moo gi Yang nu" da" lagyoo: daxe: eig youg bang: da" myeing - daxe: eig myeing ri we' lhid" tab to.

¹⁵ Ngoo yo' dang: tid go" nyid su: gi hau: voogung ri we' voogung khoem" moo" duang: joem ri we' hau: da" vang khyam: ri we' ke' yu" wa shid re" sheing: laki' yang: ri ci: nyid.

¹⁶ Hau" voogung gi myid: phang" nghoid wigi sheing: phyang" yo' lam: phyang" dayi" yi nghoid. Mouglagyoo: gi nya: laki' sheing: yang: yo' ke' yu" ri khyoo: main: dakhyeung" wim: shoo: main: sheung: lho: lam: phyang" myhang: phyang" sheing: phyang"- dangain" gi dayi" yi" zheung: nghoid.

¹⁷ Mouglagyoo: gi hau: da" vang ri we' ke' yu" ri byu yi ci: da" laki' yo' dakhyoo" ti"- Mouglagyoo: ke' yu" ri 144 dung" nghoid.

¹⁸ Hau: voogung da" vang khyam: gi dain: lung lug nyoug nghoid lho: wigi hau" voogung gi gyeungshang: da" bang teing yhang: ti" du wigi sheing: gyeing" yo' koid to" zi nghoid.

¹⁹ Hau: voogoung da" vang khyam: apoem: lug joem: gi phoug" dab, da" lug joem: aja: ja: yo' lhoo, yhoung to". Xang: shed" da" apoem: gi dain lung lug nyoug- eig loem: ein: da" zigi Nila: soem" loem: ein: zigi Mahoya: myid: loem: ein: da" zigi mya,.

²⁰ Wim: loem: ein: da" zigi Jhoug: khyug loem: ein: zigi Paid' damya"- nyhed loem: ein: zigi lug muid" - shed' loem: ein: zigi Myhed' yoi- Goug: loem: ein: zigi Utaphaya:- daxi: ein: zigi Mahoya: nyoug- daxe: daloem: ein: zigi Vakintu:- daxe: eig loem: ein: zigi Thitun nila nghoid.s

²¹ Hau: voogung mo khoem" daxe: eig duang: we' Palhe" daxe: eig loem: nghoid voogoung khoem" daduang: yo' daduang:- Palhe" daloem: loem: nghoid. Hau" voogung da" fu" moo" khyoo: gi bang teing thoem" yhang: ti" - gyeung" bang da" sheing: gyeing" nghoid.

²² Hau" voogung khoug: moo gi noku yhoem: moo" ri ngoo amyang- Khasu" wim gari yoem: moo" bo da" Aseing: Mangso yo' Yang nu" gi hau" voogung mo noku yhoem moo" nghoid nyid.

²³ Hau" voo gung moo doug bang wa shid re" bid we' lham" moo" we' aca" loo. Khasu" wim gari Mangso da" myonhoo: phung" yoeb, gi hau: voogung ri thoin" pang byid: nyid lho: Yang nu" gi houg: mo myibung: nghoid.

²⁴ Byumyu" yi gi hau: voogung mo bidbang moo yo" so" yen" lho: moug: myed tho' mo Khokham" yi we' hau: voogung khyoo: nyang: nya: da" soidgain joem ri ci: vang lo" boem wa zi nghoid.

²⁵ Hau: voomoo" mo khoem" duang: joem ri danyid" goin" phang hain" to"- hau: khoem" joem ri khanham we' myhed" too" wa zi anghoid. Khasu" wim ga: ri hau: voogung moo myen" ga: zi ajo.

²⁶ Byumyu" yi da" soid gain yo' bug thu' sheing" jhu" khyoo: ri hau" voogung khyoo: ci: vang lo" boem, wa zi nghoid nyid.

²⁷ Nghoid loug we' anyhoin: athoung" khyoo:- asho' ashid: da" moo" zei: mo, mhoug zoo: fain" zoo: bang: hang" we' hau: voogung khyoo: khanham we' yo" vang loo" goo" wa zi anghoid. Yang nu" da" kang: so' mougsoug" pug moo myeing boo mo, za: date: yo" vang loo" wa nghoid.