Pang Shug 19 - Lacid Common Language Bible

¹ Hau: thang: ri moug: khung: moug: di mo, byu phung: moo" zeing thui: yhang: te" ziri ngoo shau" gyo. Houg: bang: da" thui: gi " Mangsoo ri coung" byid: ge'. Ngoonu" da" Mangsoo gi khyoid yu da" khyoo:- myonhoo: Phung" yoeb, yo' yoem: so' yoo" su: nghoid.

² Nyang: dang: phyed khyoo: gi deingmain" ziyo' nyeung veung" nyid. Mougmyid gyab, goin" ri nya: aved, avhu: khyoo: yo' shoid vhang: nhang: da" shava myhi, ri nya: yoobo dam, kaid' bye- nya: da" dei zoo: yi ri hau" myi: ye: wigi said' pyam' yoomo Mangsoo gi nyang: ri yoobo dam, kaid' abye:,, ga: tid nyid ziri ngoo shau" gyo.

³ Hau: lho: nyangnu" gi " Mangsoo ri coung" byid: ge'. hau: voomoo' zeing ri nghe, da" myiyham: mo myikhoug" gi pyaid moo too: moo daneung" thu' lo nyid,, ga: nyho: nyid boem.

⁴ Houg: lang" ludaid' eig xe: myid: yug yo' dei noem, gougnyhoug myid: ja: gi nyhoem: khyo, lho: zhung: tang tho' moo zhoung: jo, da" Mangsoo ri noku zoore"- Amen, Mangsoo ri coung" nghei byid: ge' ga: tid nyid boem.

Yang Nu" Da" Lo, Xo, Pui" Zeing

⁵ Hau: zhung: tang mo thui: zeing thu' lo zigi Mangsoo dei zoo: yi ga: da" nyang: ri gyoug phau" nyid da" ngi, mo, gyi: mo, dangain" bang: we"- yha" da" Mangsoo ri coung" nghei nyid ge' ga: tid.

⁶ Hau" thang: rigibyu phung moo" zeung thui: yhang: te" zi gyid lung" gyo" myheung da" thui: yhang: te" zi moug: goin' myheung da" thui: yhang: te" ziri ngoo shau" gyo. "Nyang: nu" Mangsoo ri coung" nghei boem zigi Ngoo nu" da" yoem: moo" bo Aseing: Mangsoo gi Khokham" nghoid nyid.

⁷ Nyhang" nu" gau yi lho: vho: ngei nyid boem shang- Nya: da" myonhoo: phung" yoeb ri coung" byid : nyid boem shang. Khasu" wim gari hau: Yang nu" da" loxo' pui" zeing gi ju" loo bye: ziyo' nya: da" myhi, seig we' nya: gung ri lhoo, bain yhoug ci: bye: yoomo

⁸ Phyu: bang da" ziyo' sen: da" jid: moo" pain" yo' nya: gung ri lhoo, yhung wa akhang" nyang: yoo" bye, ga: tid. (Jid: moo" pain" phyu: ga: zigiMangso byu yi da" ge, da" asam" aved, moozoo" nghoid)

⁹ Hau: thang: moo mouglagyoo: ngooritid zigi " Hau yang nu" da" loxo' pui" khyoo: khe: too" shau" mo, gi ngilhoo, mo, nghoid ein: lhid" too" we' Hau: lho: hau: " moug: lagyoo: doem, xo' tid zigi " He: dang: gi Mangso da" deungmain" mungdang: nghoid. ga: wigi ngoori tid.

¹⁰ Ngoo gi nyang: ri pid' wa ein:- nya: khyid: yang: moo goeb khyoo, nghoid loug we' Nyang: gi " Houg: su" akoid- ngoo gi nang yo' re" mang: nhung" yi yo' dakhyoo" te"- dei zoo: dayug nghoid lho: Yesu da" pang shug da" deingmain" khyoo: ri zei: ci: mo, danghoid. Mangso ri noku we' ga: ngoori tid. Khasu" wim gari Yesu da" pang (shug deingmain" da" khyoo: gi Lapi: yi ri venyi yoem: byid: nyid zi nghoid.

Myang: Phyu: Ju: Su:

¹¹ Moug: khung: moug: di ri phang kaid' lang" houg: moo myang: phyu: ju: nyid su: ri ngoo myang kaid'. Hau: myang: tho' moo zhoung: jo, su: gi deing byeung" ziyo' deingmain" su: nghoid. Nyang: gi nya: da" meing" zain: gyipui" moo tarha" nyeung veung" khyo" zain: nyid su: nghoid.

¹² Nya: da" myojid" gi myiyham: doem, yo' du nyid - nya: da" vhuloem tho' moo bidmug myoo" sho' khyab, zhoung" ci: - nyang: mo lid lho: hang" dayug we' ayo" se' da" myeing nya: jhang myoo" sho' lhid" tab to.

¹³ Nyang: void ci: da" byisheing: gi suid" nyang: za: za: lhu" ci: zi nghoid- Nya: da" myeing gi" Mangso mungdang:- ga: zi nghoid.

¹⁴ Moug: khung: moug di mo gyizoo: yi gi jid: moo" byi phyu: ri void ci: boem, lho: myang: phyu: moo zhoung: wigi nya: thang: moo cang lo" ago".

¹⁵ Byumyu" bain sho' bang: ri oung: pyam' wa shid re" nya: da" nhoid mo tho' da" lhab, sham: thu' lo nyid. nyangnu" ri we' joto' lham: doung: wigi vhoeb, khang" nyid wa zi nghoid. Gyi: sheung: myhang: thang Mangsoo nheig gyed" da" - zabyid xoem: zhung: zeing moo nyang: nang: jhoeb, kaid' wa.

¹⁶ Nya: da" byisheing: yo' nya: tang" boug" moo " Lhed" tab to" da" myeing gi " Khokham" yi da" Khokham" - Aseing: yi da" Aseing:,, ga: lhid" to".

¹⁷ Hau: thang: ri bid moo yab, jo, da" mouglagyoo: dayug ri ngoo myang- Nyang: gimoug: laid' moo dang: yen" da" ngho' joem dangain" ri thui: zeing yo' nyho: yoid kaid' zigi " Ri" ge' Mangso da" pui" zeing moo dage" zeung: loo ge".

¹⁸ Khokham" yi da" shoo"- gyizoug: yi da" shoo"- gyizoo: yi da" shoo"- myang: shoo"- myang: jui: mo, da" shoo"- loid byoin, bang: yo' join, yi da" shoo" - nge zoo: gyi: zoo: byu yi dangain" bang: da" shoo"- lo zoo: ge",, ga: khe: nyid.

¹⁹ Hau: thang: ri akhyeung" da" gougnyhoug ni, zeing yo' moug: myed tho' mo Khokham" yi yo' nyangnu" da" gyi phung zeing yi gi hau' myang: jui: su: yo' nya: gyizoo: yi ri meing: zain: wa shid re" gyi, soin' nyid ziri ngoo myang.

²⁰ Hau" akhyeung" da" gougnyhoug ni, zeing gi nya: shid khoin" moo mau" pho" alhoo: again joem ri toin" shid mo, mhau' da" lapi: yi yo' dage" thung: myheug lhoung pyam' zi shau" bye. (Nyang: gi akhyeung" goug nyhoug zeung: da" soolhoo: dab, mo, yo' akhyeung" gougnyhoug da" soolhoo: rinoku goeb, pid' bang: ri mau" pho" alhoo: again joem yo' mhau' yu su: nghoid) Nya: eig yug gi fang yo' nge" nyid da" myimi: thoem" khoug: khyoo: - adei phab' phab' du" zei kaid' zi shau" nyid ago".

²¹ Nya: da" gyizoo: yigi myang: jui: su: nhoid mo thu' re" da" lhab, sham: yo' said' pyam zi shau" nyid. Houg: yoomo ngho' joem dangain" gi houg: bang: da" shoo" ri gyi" gyi: shau" zo: boem bye.