Pang Shug 15 - Lacid Common Language Bible

Lo" Thang mo Nooboug: ci: re" da" Mau: Lagyoo: Yi

¹ Hau: thang: ringoo gi moug: laid' moo gootu: atho' oung: se' tid da" gyi: thang da" mau" pho" khyoo: daja: ri myang Hau: zigi shid: gyoin, nyhed ja: ein: da" moug: lagyoo: nyhed yug nghoid. hau: da" shid: gyoin, joem gi Mangsoo nheig khoo" yo: da" khyoo" ri lo" thang mo toin" shid khyoo: nghoid.

² Hau: thang: moo ngoo gi myi: yo' lheug to" da bang teing gyid thoem" daja: ri myang- xo' lho: wigi akhyeung" da" gougnyhoug zeing yo' nya: soolhoo: ri we' nya: da" nghab youg dazid' ri tab ci: mo, ri we' yo" oung: pyam' bye: su: ri we' ngoo myang. Nyangnu" gi Mangsoo byid: da" teing joem ri ci: lho: bang teing gyid thoem" nam, moo zheung: yab, yoin" to" wigi

³ Nyangnu" gi Mangso dei zoo: Moshe yo' Yang nu" da" shid khoin" moo zheung: yab, jo, boem wigi " Moug: thu' xang: poin: mo wigi danyid nyid da" Mangsoo we"- Nang koid da" moozoo" gi gyi: thang lho: mau" pho" zi nghoid nyid nhung: Byumyu" yi bain' sho mo, da" Khokham" phoo we"- Re" da" moozoo" joem gi jo ziyo' deingmain" zi za: danghoid nhung:.

⁴ Aseing: we"- Nang ri agyug phau" zi hang" yo" nyid wa lha". Re" da" gyi: myhang: khyoo: ri tid fu" wa shid re" hang" voem" ngeug pyam wa lha" Nang za: date: gyeungshang: nyid yoomo byumyu" cang: joeb, bain' sho' mo, gi nang koid da" moozoo" dangain" deing byeung" jo, da" khyoo: ri byumyu" cang: joeb, bang: myang loo: yoomo Nang ri phau" myang: noku lo boem wa"- ga: wigi jikhoin" khoin" nyid boem ago".

⁵ Hau: thang: ri moug: khung: moo dang: thang cab, zoem" nu" jo, da" noku yhoem: moo" khoem" bang jo, ziri ngoo myang.

⁶ Hau: thang: ri nooboug: nyhed ja: ri ci: thu' lo da" moug: lagyoo: nyhed yug gi noku yhoem: moo" khoug: mo thu' re" boem. Nyangnu" gi doug bang gyeungshang: da" jid: moo" byimi, joem ri void ci: lho: sheing: phyid" cu" ri yang gang moo zheung: cu" ci: boem ago".

⁷ Dei noem gougnyhoug myid du: mo dadu: gi pyaid di du: moo dadei nyid da" Mangso nheig khoo" yo: da" ziyo' byeung" bo da" sheing: goem, nyhed loem: ri moug: lagyoo: yi nyhed youg bang: da" lo, moo zheung: ab, byid.

⁸ Noku yhoem: moo" gi Mangso myonhoo: phung" yoeb, yoomo myikhoug" byeung" nheung: jo. Houg: yoomo moug: lagyoo: nyhed yug zheung: ci: re" da" nooboug: joem athang thang gi hau: noku yhoem: moo" moo hang" we' ayo" vang loo.