Pang Shug 13 - Lacid Common Language Bible

Akhyeung" Da" Goug:Nyhoug Eig Du:

¹ Hau: thang: ripanglai khoug: mo khyoug: daxi: khyoug: yo' vhuloem, nyhed loem: dab, da" akhyeung" da" gougnyhoug dadu" thu' lo ziri ngoo myang. Nya: da" khyoug: loem: khang" moo" moo bidmug joem zhoung" ci: lho: nya: da" vhuloem loem: khang" moo" moo Mangsoo ri rui" da" myeing joem rilhid" tab ci:

² Ngoo myang da" hau" akhyeung" da" goug nyhoug gi Myeing khuid" yo' du- nya: da" khyid: gi voem, khyid: yo' du lho: nhoid gi khang khyi nhoid yo' du go" nyid. Hau: main jung: ni, zeing gi nya: da" yoem: so' yo' nya: zhung: tang ri we' nya: gyi: thang da" amyeing" ri we' hau: akhyeung" da" gougnyhoug ri ab, byid: bye.

³ Nya: da" vhuloem daloem: gi shid: loo" ko: da" dam, gi ge, lo" nyid bye. Moug: myid xang: su" byu yi dangain" mo, gi hau" akhyeung" da" gougnyhoug ri mau" zoore" nya: thang: moo cang lo" nyid boem ago".

⁴ Main jung: ni, zeing gi nya: amyeing" ri hau" akhyeung" da" gougnyhoug lo, moo ab, byid: too" su: nghoid yoomo byu yug khang" moo" gi main jung: ni, zeing ri noku nyid boem ago". Hau" byu yi gi akhyeung" da" gougnyhoug ri we' noku zoore"-" He" akhyeung" da" gougnyhoug yo' hang" se' du go" lha". nyang: ri hang" to' voem" zain: wa lha"» ga: tid nyid boem ago".

⁵ Hau" akhyeung" da" gougnyhoug gi phau: khuang lo lho: wigi Mangsoo ri aphoug" akhyoid tid wa da" akhang" yo". Lham" moo" myid: xe: eig khyab, shid mo yoem: so' amyeing" yo" yu ci: abye:.

⁶ Nyang: gi Mangso da" myeing ri we' Mangsoo nyid da" moug: khung: mo mo, ri we' nheung" shed" loo" bye.

⁷ Nyang: gi Mangso byu phung: yi ri meing: zain ung: wa da" akhang" yo' mungdain: loem: khang" moo" moo nyid da" - byumyu" cang: joeb- myeing" cang: joeb, kaid da" byumyu" dangain" bang: da" atho' moo vhoeb, khang" wa da" akhang" ri nyang: yo" yu ci: bye.

⁸ Said' pyam' shau" bye: yang nu" da" kangso' mougsoug" pug moo moug: aphain" myid aphain" shi" mo nyang- myeing bo jo, bang: mo gootu- mougmyid moo nyid da" xang: su: byu yi dangain" bang: gi hau: akhyeung" gougnyhoug zeing ri coem noku boem wa zi nghoid.

⁹ Nukhyab, dab, mo, gi shaug" gyoo: goo" baja".

¹⁰ Myheug zi shau" wa su: gi gyeing" nyang: myheug zi shau" wa nghoid- sham: yo' said' pyam' zi shau" wa su: gi gyeing" nyang: sham: moo shid: wa zi nghoid. Hid: moo Mangso byu yi shoid khyo" kham, zeung: ziyo' loem" jeung" khyoo: geung: teung jo, nyid ca".

¹¹ Hau: thang: ri akhyeung" da" gougnyhoug gootu: dadu: gi myid jang: mo thu' lo- nyang: moo yang nu" khyoug: yhang: te" zi eig khyoug: youg lho: main jung: zeing yhang: ti" dang: tid nyid.

¹² Nyang: gi xang: shed" mo gougnyhoug da" amyeing" akhang" dangain" ri hau" gougnyhoug shid' khoin" moo ci: yhoung: nyid. Nyang: gi dam, noo ge, loo" bye: da" akhyeung" gougnyhoug ri agyoo: ayoid, nyhen" no' nhang: nyid.

¹³ Eig du: ein: da" akhyeung" gougnyhoug gi mau" pho" alhoo: again joem ri koid shug. Byu dangain" mo, da" shid khoin" moo moug: khung: mo myidjang: tho' khyoo:- myi: gyoo" loo nhang: khyo" we' yo" koid shug.

¹⁴ Nyang: gi xang: shed" mo da" akhyeung" gougnyhoug shid khoin" moo mau" pho" alhoo: again joem rikoid shug lho: wigi mougmyid byu yi dangain" ri mhoid" fain" nyid lho: sham: dam tab' nghoid loug we' ashid: loo" loo: dei nyid da" hau" gougnyhoug riphoug" tab ngi shab, khyo" wigi nya: da" soolhoo: daloem: rikoid wa shid re" mougmyid byu yi ri tid kaid.

¹⁵ Hau: akhyeung" da" gougnyhoug soolhoo: gi dang: yo" tid wa ziyo' hau" soolhoo: ri ano' bang: ri shau" said' pyam wa shid re" eig du: ein: da" akhyeung" gougnyhoug gi hau: xang: shed" makhyeung" da" gougnyhoug soolhoo: moo kangso' yo" moid, kaid' byid: wa da" amyeing" zeing yo.

¹⁶ Hau: akhyeung" goug: nyhou, gi gyi: mo, yo' ngi mo, di mo, yo' myung mo loid byoin, bye: mo, yo' join, koid nyid mo, -byu yi bain sho' ri lo, yo lo, moo anghoid lang" gi ngeilang: moo- nya: da" laxoem" dazid' ri agyoo" gyoo: tab nhang: to.

¹⁷ Hau" akhyeung" da" gougnyhoug myeing- anghoid lang" gi hau: myeing khyang" da" nghab youg laxoem" dazid' adab mo, hang" nghoid loug we' zi, qei wa ziyo' ung" wa da" akhang" ayoo.

¹⁸ He: jang" moonyain: phajhi" boo ca" nyid hau" nyain: phajhi' boo su: gi hau" akhyeung" gougnyhoug da" nghab youg ri se' soin: yu"- Khasu" wim ga: ri hau" nghab youg. Laxoem" dazid' gi byu dayug da" myeing nghoid lho: wigi hau: nghab youg gi 666 nghoid nyid.