NGOUG JI: 3 - Lacid Common Language Bible

Yooboo Dam Byid: zi Nheigloem: Thid ziyo' Myid byu Khyoo:

¹ Ngoo gi Mangso wigi yooboo dam byid: ga: zi ci: nghoid ein: ziri si su: nghoid.

² Nyang: gi ngoo ri no, tho' mo je" no, da" moug: coid khoug: khyoo: shu" vang loo" bye:.

³ Houg: lho: ngoo ri nheig khyeug myid aboo loo: doem baid baid koid nyid.

⁴ Nyang: gi shoo" ri byo, jeug loo" nhang: lho: shoomyen ri thug nhang: da: nga" shooyoug: joem ri we' gyau: moin" loo" nhang: bye:.

⁵ Nyang: gi ngoo ri nheigloem: amyen, akhyoid wim nhang: ziyo' dayam dayoo: kham' zoo: ca" da" thung: yhoem: moo myhid" lhung to" da:.

⁶ Nyang: gi ngoo ri shid: da" jham" coug: youg coid no, khoug: moo ayoid, ayu" nyid nhang: bye:.

⁷ Nyang: gi ngoo ri jangcoo" tei" joem yo' tei" to" da:. Ngoo gi phang: loid wa myid byu jang: ajo, da" thung: byu dayug nghoid.

⁸ Ngoo gi pang" thoug yu wa shid re" nyho: yoid kaid nghoid loug we' Mangsoo gi: atam" gyoo: loo: nghoid da:.

⁹ Ngoo gi khyoo: so" lo" ri khyid: vhu" thoung" wigi ngoo lo" shoid khyoo: lug vang khyam: yam kyo' to" da:.

¹⁰ Nyang: gi voem, dadu: yhang: ti" ngoo ri lhoem: nyid wigi nyang: gi khangkhyi dadu: yhang: ti" nga" tho' moo: byam ne' da:.

¹¹ Nyang: gi ngoo ri khyoo: moo cang khaid lo wigi ngoo ri ajab, amoin" bui" sho' lang: khyam" lho: too" khare".

¹² Nyang: gi nya: da" lo, lid: ri thoung: yu lho: ngoo ri nya: myoo: khaid joem shid re" thang" thi: koid da:.

¹³ Nyang: gi nya: myoo khaid joem ri nga" gung moo: no, sho' beug zhoug kaid bye:.

¹⁴ Mung" byu yigi ngoo ri nyid" goin" coem yi nyid boem. Ngoo gi houg: bang: dangain" mo, da" yinoug tu' ei" pho" su: bue" loo" bye:.

¹⁵ Nga" zoo: noem, shid mo nyang: ngoo ri byid: gu: dangain" gi kyid: kyid: kho" da" yau: khe" kyi" khyeug zi za: nghoid nyid.

¹⁶ Nyang: gi nga" da" myonhoo: ri myidjang moo doin: gyoid byid:. Nga" zeijang ri lugzeing joem moo: doin: thung" byid:.

¹⁷ Ngoo gi yang" zain" khyoo:- ngei pyoo: yug yo khyoo: yo' ngei pyo: khyoo: ga: ziri to" myhed pyam bye:.

¹⁸ Ngoo gi myang" sho' nyid loo: wa zi anghoid. Aseing mo nga" myid byu jang: gi thang byug bye:.

¹⁹ Ngoo gi dam no ziyo' nyid wa yhoem: ayo" ziri myid boin: zigi nga" shid mo kyid: kyid: kho" da" dug nghoid nyid.

²⁰ Ngoo gi hau: khyoo: ri za: myid nyid wigi nga" Venyi: gi yoem: shoin: byug bye:.

²¹ Nghoid loug we' ngoo daja: myid boin: kaid ri myid byu jang: doem yo" yu bye:.

²² Aseing da" ashoid avhang: jheddab myid yo' nheig khyeug khyoo: gi agoin athang loo: dajo, jo,.

²³ Hau: zigi nab soin: zoo" moo myenjham" wigi bidxain" re" yhang: ti" deing nyid.

²⁴ Ngoo yo" zi dangain" Aseing nyang: za: nghoid. Houg: lho: nyang: moo nga" myid byu khyoo: to" too" bye:.

²⁵ Aseing gi nyang: ri loem khoug: mo, atho' moo ge nyid zi nghoid.

²⁶ Houg: yoomo ngoonu" khyo" nheigloem: sheing: sheing: to" lho: lang" nyid wa. Nyang: wigi ngoonu" ri khyoid yu wa zigi lang" nyid jang: ge da" zi nghoid.

²⁷ Houg: yoomo he: khyoo: ri ngoonu" vedyam" yo, moo yo" jhau" yu wa zigi ge thang khyoo: nghoid.

²⁸ Ngoo kyi" kyeug zi shoug" nyid ri ngoonu" nyang: kyeing" sam: zoo: zhoung: jo, wa zi ge nyid.

²⁹ Ngoonu" gi vhuloem goem" lho: goeb, vang ri ge da:. Khasu" wim ga: ri myid byu joyoo bo ri boo shi" wa.

³⁰ Ngoonu" ri baid nghoid loug we' rue" loo nghoid loug we' dangain" ri ngoonu" gi kham zoo: wa zi ge nyid.

³¹ Aseing gi jheddab nheig khyeug myid yo' byeung" jo, su: nghoid yoomo ngoonu" ri pyaid moo too: moo ngeug pyam wa zi anghoid.

³² Nyang: gi ngoonu" shid re" kougshu: nhang: nghoid loug we' ngoonu" ri jheddab khyoo: gi deung wigi yoem: bo nyid.

³³ Nyang: gi ngoonu" ri kougshu: nhang: ziyo' dam noo nhang: jang" moo: ngei pyo: zi anghoid.

³⁴ Ngoonu" da" Venyi: gi thung: khoug: moo nhe' pye" pyam ziri Aseing gi se' nyid.

³⁵ Ngoonu" gi nyang: byid: to" da" amyeing" ri he: ngeug pyam zi shoug" lang" nyang: gi se' nyid.

³⁶ Tarha" yung" moo: ajo da" tarha" dang: phyed wa ayo, ri nyang: gi se' nyid.

³⁷ Aseing nyang: myid vho: khyoo: za: khanham we' dalhoung bue" lo.

³⁸ Ge ziyo' age zi eig ja: dakhyoo" ti" nya: da" amyeing" mo bue" lo zi nghoid.

³⁹ Ngoonu" gi ngoonu" nya: da" yooboo yoomo yooboo dam byid: zi loem zo: ri ciwim wigi myeing" myoo: wa lha".

⁴⁰ Nyang: nya: khyoo: ri goolhoo: myid soin: yu" lho: Aseing jhang khyoo: doem tau" loo" loo: shang.

⁴¹ Ngoonu" da" nheigloem: gi mougkhung: tho' moo: Mangsoo ri phang shoug lho: akyu" mho' nyid shang.

⁴² Ngoonu" gi yooboo shoid vhang: lho: thougtheung nyid boem bye:. Hougsu" nghoid yoomo O" Aseing we"- nang gi ngoonu" ri yooboo akhyoid byid: shi" nghoid da:.

⁴³ Nang ngoonu" ri cang khaid lo lho: said pyam da:. Re" da" nheig khyeug khyoo: gi nang nheig yo: ziyo' nghoeb pyam abye:.

⁴⁴ Ngoonu" da" akyu" mho' thui: ayo" lid: phyed loo" sho' nang nheig joem: yo: da" jhoemmoug" thei" gi no, thu: ziyo' nghoeb lhoung to" da:.

⁴⁵ Nang ngoonu" ri mougmyid mo mhoid soid boem bue" loo" nhang: abye:.

⁴⁶ Ngoonu" da" gyivoo yi dangain" mo, gi ngoonu" ri coem rue" lho: juang" yi zi shau" boem bye:.

⁴⁷ Ngoonu" gi kyi" kyeug ziyo' byo, yoin" lo" khyoo: ri loem zo: lo boem bye:. Ngoonu" gi gyoug dain ci' mau" ja: yo' gyoug pho" joyoo moo: danyid nyid boem.

⁴⁸ Nga" byumyu" yigi: byo, yoin" said toem" pyam zi shoug" yoomo nga" ngoug byid gi: gyid gyung: su" yau, thu' nyid bye:.

^49-50 Ngoonu" ri Aseing wigi mougkhung: tho' mo ayu" yu" gi nga" da" ngoug byid gi athang agoin da" gyid zoo: gyung: su" dayau gyo" nyid wa zi nghoid.

⁵¹ Voomoo" mo myiyi: yi byo, yoin" lo" ziri ngoo myang lang" seing" kho" lho: koug shu: nyid.

⁵² Nyang: gi ngoo ri ngheing" wa khyoo: ci: abo da" gyivoo joem lo, moo ngho' dadu: ri yhang: ti" myhi' lhoung to" zi shoug" bye:.

⁵³ Nyangnu" gi ngoo ri duang: khuang" khoug: khyoo: adei phab phab du" khyo' kaid lho duang: khuang" nhoid moo: lugzeing yo' myhed" to" ago".

⁵⁴ Ngoo ri gyid je: nhe' byeung" lo wigi ngoo gi shid: wa zi jhang loo bye: ein: myid pyam bye:.

⁵⁵ O" Aseing we"- duang: khuang" thi" mo ngoo nang ri yoid khe: kaid bye:.

⁵⁶ Houg: yoomo ngoo mho' yoid thui: ri tam" gyoo: byid: wa shid re" nang ri ngoo mho' uri nang tam" gyoo: byid: bye:.

⁵⁷ Nang gi ngoo ri ‹agyug noo"› ga: tu" byid: bye:.

⁵⁸ «Aseing we" nang gi ngoo ri khyoid yu wa ga: ju" re" wigi nga" kang: so ri khyoid yu byid: bye:.

⁵⁹ Nga" shoid dab lho: dang: phyed byid: we'. Ngoo shoid vhang: nyid da" moo" zoo" jhoem ri nang si' byid: nyid da:.

⁶⁰ Nga" gyivoo joem gi ngoo ri khayhi' ngheing" nyid ziyo' nyangnu" ngoo ri khasu" gyi koid wa ziri nang si' bye:.

⁶¹ O" Aseing we"- nyangnu" ngoo ri coem rue" nyid ziri nang shoug" gyoo: bye:. Nyangnu" da" byen pyoo: moo" zoo" dangain" ri nang si' bye:.

⁶² Nyangnu" gi danyid" goin" goin" ngoo ri gei sang: nyid boem lho: nyangnu" da" byen pyoo: moo" zei: nyid ago".

⁶³ Nab soin: mo zi myen" thang: ju" sho' nyangnu" gi ngoo ri za: da juang" yi nyid boem ago".

⁶⁴ «O" Aseing we"- nyangnu" koid lid: loo bye: moo" zoo" yo' dakhyoo" ti" nyangnu" ri yooboo dam byid: we'.

⁶⁵ Nyangnu" ri nheing" lho: nheigloem: thid loo nhang: we'.

⁶⁶ Nyangnu" ri shoo" su" kuang pyam wigi mougmyid tho' mo jhoid said toem" pyam byid: we».