NEHEMIA 10 - Lacid Common Language Bible

¹ Xang: shi" lo, xoem" doin: su: gi Hakhalia da" yuggi zoo: mung" zoug: Nehemia nghoid da:. Hau: thang: ri Zedekia da" lo, xoem" doin: da:. Vhoo mo bang: we' lo, xoem" doem: ago". Seraia- Azaria- Yeremia- Pashura- Amaria- Malkhiya- Hatusha- Shebania- Malug- Harim- Meremod- Obadia- Daniela- Ginethon- Barug- Meshulam- Abiya- Miyamin- Mazia- Bilgai yo' Shemaia bang: nghoid ago". Azania da" yuggi zoo: Yeshua- Henadad kung: mo Binui- Kadmiela- Shebania- Hodia- Kelita- Pelaia- Hanan- Mikha- Rehob- Hashabia- Zakhura- Sherebia- Shebania Hodia- Bani yo' Beninu bang: nghoid ago". Parosha- Pahad- Moba- Elam- Zatu- Bani- Buni- Azgad- Bebai- Adoniya- Bigvai- Adin- Atera- Hezekia- Azura- Hodia- Hashum- Bezai- Harib- Anathod- Nebai- Magpia- Meshulam- Hezira- Meshezabela- Zadog- Yadua- Pelatia- Hanan- Anaia- Hoshea- Hanania- Hashuba- Halohesha- Pilha- Shobeg- Rehum- Hashabna- Maseia- Ahia- Hanan- Anan- Malug- Harim yo' Bana bang: nghoid ago".

Khainjung yi Levi byu yi Meing: byu yi da" vhujhung: yi Myid Veing" Khyoo:

²⁸ Israela byumyu" ngoonu"- khainjung yi Levi byu yi Noku Yhoem: Moo" zung" bang:- Noku Yhoem: Moo" mo music phung: yi Noku Yhoem: Moo" mo moo" zei: bang: yo' Mangso tarha" ri cang bang: gootu: dangain" gi ngoonu" mougmyid moo nyid da" tungbau byu yi mo kho' yu boem wigi ngoonu" gi ngoonu" da" yhoem: seing: myhi' yi yo' se' gyoo: bye: da" ngoonu" zooshang: yi dangain" yo' dage"

²⁹ ngoonu" da" vhujhung: xo' tei" lho: hid su" khyo" jham' tang: bye:. Hau: zi ngoonu" phyo' soin' pyam lang" dam dab zoo: wa. Ngoonu" gi Moshe khyo" wigi Mangsoo byid: to" da" Mangso Tarha" yo' dakhyo" nyid wa. Ngoonu" gi Aseing ngoonu" Aseing wigi ngoonu" ri byid: to" da" amyeing" dangain" ri cang nyid wa. Ngoonu" gi nya: tarha" joem dangain" yo' nyang: mho' zi dangain" ri cang wa ein: jham' tang: boem bye:.

³⁰ Ngoonu" gi ngoonu" da" mougmyid moo nyid da" tungbau byu yi yo' myi: yu yoo byen akoid wa.

³¹ Dougno: Bidnyid anghoid lang" gootu: gyeung" shang: bidnyid da nyid" nyid" moo tungbau byu yi ngoonu" ri shivoo: anghoid lang" gootu: daja: ja: re" oung" byid: boem nghoid rigi nyangnu" mo ngoonu" aqei: wa. Nyhed zain ju" khang" moo" ngoonu" yoo we' aphug wa. Houg: lho: ngoonu" yu ca" da" jhen: dangain" ri we' phyed pyam byid: wa.

³² Ngoonu" yugkhang" moo" gi zain khang" moo" Noku Yhoem: Moo" moo yhung: ca" wa shid re" ngei eig xi: phoin: kaid wa.

³³ Ngoonu" gi Noku Yhoem: Moo" shid re" vhoo: mo gu: ri bo pang" thoug wa. Hau: joem gi gyeung" shang: zooyho'- nyid" khang" nyid" mo shivoo: xoin"- nyid" khang" nyid" xoin" khyo" ngei" byid: ca" da" gougnyhoug joem Dougno: Bidnyid shid re" gyeung" shang: xoin" joem lhammoo" xain" pui" yo' gootu: pui" joem shid re" xoin" joem Israela byumyu" yi da" yooboo ri yu pyam byid: wa xoin" joem Noku Yhoem: Moo" moo ca" da" gootu: ja: khang" moo" ri kaid wa.

³⁴ Ngoonu" mung" byu yi khainjung yi yo' Levi byu yigi zain khang" moo" tarha" moo jhau" to" ziyo' dakhyo" ngoonu" Aseing Mangsoo ri xoin" ngei" byid: jang" mo ci: wa shid re" thang" ri kha: kung: bang: thug pang" wa ein: ziri me" lab lho: myid phyed boem wa zi nghoid.

³⁵ Ngoonu" gi zain khang" moo" Noku Yhoem: Moo" khyoo: ngoonu" yham" yu da" gug zhoo mo xang: shi" amoin" yo' ngoonu" da" shigam mo xang: shi" myheing da" ziri ci: yhi: wa.

³⁶ Ngoonu" mo khu: re" da" zooshid" yuggi zoo: ri Noku Yhoem: Moo" mo khainjung yi jhang shu" yhe: lho: hougmoo tarha" moo lhid" to" ziyo' dakhyo" Mangsoo ri shug byid: wa. Ngoonu" gi ngoonu" da" nu: zeing du: khang" moo" mo xang: shi" xang" da" nu: nu" ri yo' ngoonu" da" yang joem anghoid lang" coidbaid joem mo xang: shi" xang" re" da" du: ri shug byid: wa.

³⁷ Ngoonu" gi zain khang" moo" xang: shi" shoug" yu da" shivoo: mo cen: moin" yho' yo' gootu: ngoonu" da" zabyid yhid:- zhainloin: xu: yo' shi" aja: ja: da" xoin" ri Noku Yhoem: Moo" moo nyid da" khainjung yi jhang ci: yhi: wa. Ngoonu" gi ngoonu" da" shivoo: ri ngoonu" da" shoo" zoo: shoo" shug da" voogung joem mo xi: boem daboem khyu: da" Levi byu yi jhang khyoo: xi: boem daboem ri ci: yhi: wa.

³⁸ Xi: boem daboem ri khyui: zheing" da" uri Arun mo gyoo" lo da" khainjung yigi Levi byu yi yo' dage" bo boo ca" goo" wa nghoid da:. Houg: lho: Noku Yhoem: Moo" moo ci: wa shid re". Levi byu yigi nyangnu" yo" khyui: zheing" yu da" xi: boem daboem ri Noku Yhoem: Moo" mo zi too" yab joem khyoo: ci: yhi: ca" goo" wa zi nghoid ago".

³⁹ Israela byumyu" yi yo' Levi byu yigi shivoo:- zabyid- yo' zhainloin: xu: ri Noku Yhoem: Moo" mo oug" khu lang: bain to" da" zi too" yab joem moo" eung: da" khainjung yi Noku Yhoem: Moo" zung" bang:- yo' Noku Yhoem: Moo" mo thui: joeb coung" bang: moo bo bo da" mo, lung" da" joyoo khyoo: ci: yhi: ca" goo" wa zi nghoid da:. Ngoonu" gi ngoonu" Mangso da" yhoem: ri ashe: pyam too" wa.