MIKHA 1 - Lacid Common Language Bible

¹ Yuda khokham Yotham- Ahaza- Hezekia bang: da" ayo, moo Aseing gi Morashed byu Mikha ri he: lu dang: byid: bye:. Aseing gi Mikha ri Samari yo' Yerusalem voomoo" yo' sen da" khyoo: dangain" ri pang shug bye:.

Samari yo' Yerusalem Shid Mo Koug Ngau Thui:

² Byumyu" bain sho' mo, we"- he: dang: ri gyo: yu" ge'. Mougmyid tho' moo nyid bang: dangain" mo, we"- he: ziri tam" gyoo: we'. Yoem: moo" bo thang da" Aseing gi nanu" ri thougtheung sagse: kham loo wa tam" gyoo: ge'- nyang: gi mougkhung: yhoem: moo" mo tid kaid.

³ Aseing gi nya: gyeung" shang: da" joyoo mo thu re" loo bye:. Nyang: gyoo" re" lho: boem phyoo" cang so" yen" wa zi nghoid.

⁴ Hau: thang: ri myi: zang" da" byooshung" yhang: ti" boem joem gi nya: khyid: yang: moo yau, yu: lo" lho: Hau: zigi bouggung tho' mo gyid foid shoin" kaid ziyo' dakhyoo" ti" jang: gyu" lang: khoug: khyoo: yau gyo" lo" boem wa zi nghoid.

⁵ He: khyoo: dangain" gi Israela byumyu" yigi yooboo koid lho: Mangsoo ri thougtheung yoomo bue" loo wa zi nghoid. Israela yi thougtheung zigi hang" ri yooboo foin: wa lha". Gyi: thang da" voomoo" Samari nyang: nghoid bye:. Yuda mung" mo phara" soolhoo: pid su: gi hang" nghoid lha". Yerusalem nyang: nghoid bye:.

⁶ Hougsu" nghoid yoomo Aseing tid zigi «Ngoo gi Samari voomoo" ri pa: dam moo byo, yoin" zung too" nhang: wigi zabyid sho" da" joyoo bue" loo" nhang: wa. Hau" voomoo" da" agyu" athang: joem ri lang: khung" khoug: khyoo: foid khyo' pyam lho: hau" voomoo" da" apoem: ayang: ri we' akoem: bue" loo nhang: wa nghoid.

⁷ Nya: phoug" tab to" da" soolhoo: joem dangain" ri ajab amoin" bui" sho' khyau" mhoin' pyam byid: wa Noku Yhoem: Moo" khoug: mo shava myhi' yiri byid: to" da" zi joem dangain" ri we' myi: yo' nghe' jhoem" pyam lho: nya: yu phara" soolhoo: joem dangain" gi gyoeb boem too" wa zi nghoid. Samari gi shava myhi' yiri byid: wa shid re" zheing" to" da" he: jonu" dangain" ri akhid" gi nya: gyivoo yi wigi hau: zi joem ri joyoo gootu: mo Noku Yhoem: Moo" shava myhi' yi shid re" de" lo" boem wa nghoid.

⁸ Houg: lang" Mikha tid zigi «He: khyoo: yoomo ngoo gi koug myeing" yo' nyho: ngau nyid wa zi nghoid. Ngoo kougshu: zi si' wa shid re" khyid: cen: yo' shoo" cen: doem: so" yen" shug wa zi nghoid. Khuid" lam" su" gyab lho: Gola-ug gyo, yhang: ti" myeung yen" wa zi nghoid.

⁹ Samari da" dam joid gi ayo" ze: gi loo. Yuda we' houg: yo' dakhyoo" ti" noo shoug" wa zi nghoid- byo, yoin" lo" khyoo: gi nga" byumyu" yi nyid da" Yerusalem voomoo" khoem" zeing moo ju" jo, bye:.»

Gyivoo Joem gi Yerusalem Khyoo: Ju" Tain" Lo Khyoo:

¹⁰ Ngoonu" gyi soem" lo" khyoo: ri Gad voogung moo nyid da" ngoonu" da" gyivoo joem ri atid kyoo" goo". Nanu" koug ngau nyid ri nyangnu" ri amyang nhang: goo"- Bed Lephara voobyu yi we"- nanu" da" nheig koug ngau khyoo: phei" lhoug: boem" moo lhu: leung yen" khyo" toin" shed ge'.

¹¹ Shaphira voo moo nyid da" voobyu yi we"- gung cen: shoo" pyoid yo' asho' ashid: shau" zoore phang: thu loo" ge'. Zanan moo nyid mo, gi nyangnu" voogung mo avoem" thu lo" boem. Betezela bang: ngau myheung ziri nyangnu" shoug" gyoo: lang" gi houg: moo gyiphang: phang: khoug: zung ajo, ziri nyangnu" si' wa nghoid.

¹² Marod mo voobyu yigi loid byoin myenjham" khyoo: ri seing" khoo" seing" lhang- myid lang" nyid boem. Khasu" wim gari yau: khi" kyi" kyeug khyoo: ri Aseing gi Yerusalem moo ju" sho' ci: tain" ri" bye:.

¹³ Lakhisha voobyu yi we"- myang: joem ri myang: rheing" moo tab ge'. Nanu" gi Israela yi da" yooboo ri gei yu" yoomo Yerusalem ri yooboo koid nhang: bye:.

¹⁴ Houg: yoomo akhid" gi Yuda mung" byu yi we"- Moreshed Gad voomoo" ri vhu" too" kho' dang: tid loo ge'. Israela khokham yigi Akziba voogung mo pang" thoug khyoo: shoug" yu loo: wa zi anghoid.

¹⁵ Meresha voobyu yi we"- Aseing gi nanu" da" voogung ri lo zain: myheug yu pyam wa da" nanu" gyivoo yi da" lo, khoug: khyoo:- nanu" ri ab byid: pyam wa zi za: danghoid lo:. Israela vhujhung: yi we"- Adulam lug ug moo yhe: phang: gau" jo, boem wa nghoid.

¹⁶ Yuda byumyu" yi we"- nanu" jheddab nyid da" zoo: yi shid mo kougshu: da" khyo" nanu" xam: ri phyed pyam ge'. Nanu" da" zoo: yiri nanu" da" lo, mo lhoid yu lho: pyoung" she: lo" zi shau" boem yoomo nanu" da" vhuloem joem ri join yu ngho' joem yo' dakhyoo" ti" vhu" pyoid pyoid pyam ge"» ga: tid.