MARKU 12 - Lacid Common Language Bible

Zabyid Khyam: Ngho" Zei: Mo, Da" Dang: Tu,

¹ Yesu gi dang tu, joem nyangnu" ri tid kyo" Byu dayug gi zabyid khyam: daloem: ri sho" nyheung to" lho: hau: ziri khyam: kyam, lheung to". zabyid pyeig wa duang: du: to" ziyo' joo zam daloem: ri we' nyham" to" lho: wigi khyam: koid zoo: mo, ri nghoo" byid: too" kho' lho: gyung: so" lo".

² Zabyid shi phyo' ayo' ju" lang" nyang: gi khyam: nghoo" zei: mo, jhang khyoo: join, dayug ri khyam: nghoo" phoug" zabyid shi" mho' nhang: kaid.

³ Khyam: ngho" zei: mo, gi hau: join ri loem" myang lang" tei" baid lho: gung koem: doem nhang: kaid ago".

⁴ Khyam: seing: gi join gootu: dayug ri doem nhang: kaid- khyam: ngho" zei: mo, gi hau: join ri vhuloem lhoem: youg khyoid- dam tab wigi sho' lhoem: phyo' ago".

⁵ Houg: su" wigi khyam: seing: gi joing tootu: dayug ri doem nhang: kaid lang" khyam: ngho" zei: mo, gi nyang: ri we' lhoem: said pyam ago"- gootu: myoo" sho' mo, ri we' houg: yo' dakhyoo"- baid mo, ri baid- said mo, ri said pyam koid ago".

⁶ Khyam: seing: gi nhang: kaid wa zi nya: zooti" zoo" dayug za: dadeung jo, lo: da:- hougsu" nyang: gi nga" zoo: rigi loem: phau" myang: boem wa"- ga: tid. lho: lo" nang moo gi khyam: ngho" zei: mo, jhang khyoo:- nya: zoo: ri nhang kaid da.

⁷ Nhgoid loug we' khyam: ngho" zei: mo, gi he: yug gi khyam: seing: da" nya: zoo: nghoid da:- ri" ge,- he: yug ri said pyam shang- houg lang" nya: da": soid gain gi nyha" zi bui' wa nghoid ga: nyang cang" nyang tid go" nyid.

⁸ Houg: su" wigi nyangnu" gi nyang ri myheug yu lho: said pyam wigi zabyid khyam: nghe: shoid moo yhe: she: pyam to" boem

⁹ Houg: lang" khyam: seing: gi khasu" koid wa lha".- nyang gi re" lho: khyam: ngho" zei: mo, ri said pyam wigi hau" zabyid khyam: ri we' goo ji yi ri nghoo" byid: pyam wa nghoid.

¹⁰ Hougsu" wigi yhoem: zhug mo, khyen: khyo, pyam da" lug zeing gi dangain" tho' mo je" yhang: gyid: thang da" yhoem: jhoin: lug zeing bue" loo bye.

¹¹ He: khyoo: gi Aseing: koid zi nghoid- hau: zigi ngoonu" da" shid khoin" moo mau" pho" moo" nghoid nyid ga: da" jhoem: dang: ri nanu" anghab yu" goo la".- ga: tid.

¹² Yuda vhu jhung: yi gi nyangnu" ri yeung lho: Yesu he: dangtu ri tid zi si yoomo nyangnu" gi Yesu ri myheig wa ga: soin'- nghoid loug we' byu phung: moo" ri gyoug nyid boem yoo mo nya: jang" mo gang: thu' lo" boem bye.

Khang" Dug Kaid Da" Dang: Myid:

¹³ Hau: thang: ri nyangnu" gi Yesu nya: khoin" thui: yoomo nyang: ri myheig wa shid re" Pharishe dayham" yo' Herod byu dayham" bang: ri Yesu jang" moo nhang: kaid ago".

¹⁴ Nyangnu" gi re" lho: Sara we"- nang gi deungmain" ziyo' hang" ri we' myonhoo: akhyen: da" khyoo: ri ngoonu" se- khasu" wim ga: ri nang gi byu ri gei ayu" loo:- Mangso da" khyoo: ri deing" deing za: dajhoug" byid: nyid. Roma kho': sen" ri khang" dug ge kaid la". age kaid la". ngoo nu" ri tid kyoo" we'.

¹⁵ Ngoonu" byid: wa la". abyid: wa la"» ga: myid: ago". Yesu koem gi - nanu" ngoori cewim leig yu yu" go" nga" jhang" gei dakyab, ci: lo yu" ge' ngoo yu" yu" wa ga: tid.

¹⁶ Nyangnu" gi ngei dakyab, ci: lo boem- Yesu gi hid: moo hang" sulhoo: yo' hang" da" myeing tab to" lha"» ga: myid: da;- nyangnu' gi Roma kho seng: da" sulhoo: yo' myeing dab, ga: tid.

¹⁷ Hau: thang: Yesu gi gi bye- Roma kho: sen" seung: gu: gi Roma kho: sen" ri byid: ge'- Mangsoo yo' sen: gu: gi Mangsoo ri byid: ge' ga: tid. Nyangnu" koem gi gye" mau" byug boem abye: go".

Shid: Jang" Mo Doem Dei To, Lo Ziyo' Sen: Da" Dang: Myid:

^18-19 Hau: thang: ri doem dei to'' lo khyoo: ajo, ga: tid go" nyid da" Saduke dayham" Yesu jhang ju" re" lho: Sara we"- byu dayug yug nya: mang: gi zoo: du ayoo" loo: za: nya: yhoem: seing: myhi' rishid: cau" too" kho' nghoid rigi hau: youg nya: nhung" gi nya: mang" cougmoo" ri loxo' lho: nya: mang: yhoemkhung: xo' zoo: du khu: byid: ca"- ga: Moshi tarha" ngoonu" ri lhid" too" byid: khare".

²⁰ Akhid" nya: mang: nya: nhung" nyhed yug nyid boem- Mang: mo" yug gi myi: dagyug yu bye- nghoid loug we' zoo: aboo shid" ri shid: lo".

²¹ Houg: thang" mang: laid yug we' hau: cougmoo" ri lo, doem xo' da-- mang: laid we' zoodu aboo shi" zi doem shid: lo".

²² Nyang nham ho, nyhed yug goin"- zoo: du ayoo" loo: shid: lo" boem- lo" thang moo gi hau: myiyi: we' cang shid: lo". soem" yug ein: yug we' houg; yo' dakhyoo" ti" bue" loo" bye.

²³ Shid: jang" mo doem dei to'' lo da" bidnyid moo hau: myiyi: myhi, gi kha: youg da" yhoem: seing: myhi' nghoid wa lha". khasu" wim ga: ri nyang: nham: ho, nyhed yug goin"- hau: myiyi: ri loxo' boem byenyang: nham: ho, nyhed yug goin"- hau: myiyi: ri lo, coem xo' nyid lo boem abye: go"- ga: tid ago".

²⁴ Houg: lang" Yesu gi nyangnu" ri nanu" gi jhoem: mougsoug" yo' Mangso yoem: so' ri asi yoomo shoid vhang: nyid boem anghoid goo" rhe" ga: myed:.

²⁵ Khasu" wim ga: ri shid: loo" mo, doem dei to' lo da" uri rigi nyangnu" gi myi: yu myi: byid: zi akoid loo goo" wa nyangnu" gi moug: khung: tho' mo mau: Lagyoo: yi yo' dakhyoo" ti" nghoid.

²⁶ Houg: yoomo shid: mo, doem dei to'' lo da" khyoo: yo' sen: wigi myi: nge" nyid da" mhain pung yo' sen: da" khyoo: ri tid da" Mangsoo gi Moshi ri ngoo gi Abraham da" Mangsoo- Isag da" Mangsoo- Yaku da" Mangsoo ga: tid da" jhoem: dang: ri lhid" to" da" Moshi lhid pug ri nanu' anghab yu" goo" la".

²⁷ Mangsoo gi shid: jo, mo, da" Mangsoo anghoid- dei nyid mo, da" Mangsoo danghoid, nanu" gi gye" shoid vhang" byug boem bye" ga: tid.

Gyi: Da" Amyeing" Tarha"

²⁸ Houg lang" tarha" sara yi mo dayug gi Yesu yo' Saduke dayug yo' dayug tid ngeug go" nyid boem ziri-shaug" gyoo: lang" Yesu nyangnu" ri shoeb shoeb za: phoid: byid: nyid ziri-shau" myang lang" gi nya: jang" moo re" lho:-nyang" ri amyeing" tarha" mo kha: loem: je gyi: thang zi nghoid lha"» ga: myid;-

²⁹ Yesu gi Israela byumyu" yi we"- tam" gyoo: ge"-hau: Aseing: ngoonu" da" Mangsoo gi dayug kyeung" da" Aseing: nghoid.

³⁰ Hau: Aseing: re" Mangsoo ri re" ungkhoug dangain"- re" nheigloem: e" myed dangain"- re" Venyi: soozoo: dangain" yo' jheddab we'.

³¹ Eig loem: ein: loem: gi re" yhoem: kyoo" cang" ri nanya: gung yo' dakhyoo" ti"- jheddab ca"-ga: zi nghoid. He: eig loem: tho' moo je gyi: da" amyeing" tarha" gi ajo, loo: ga: tid kyo".

³² Houg: lang" hau: da" tarha" sara gi Yesu ri nghoid bye- Sara we"- Mangsoo gi dayug kyeung" zi nghoid nyang mo jain lho:-gootu: phara" aboo loo: ga: zi gi deung nyid.

³³ Houg: lang" byu gi Mangsoo: ri nya: ung: khoug nheigloem: dangain" yo' nya: nheigloem: E" myed dangain" yo' gungdu: yoem: so' dangain" yo' jheddab ca" ga; ziyo' yhoem: kyoo: cang" ri nyang nya" gung yo' dakhyoo" jheddab ca" ga: da" a myeing" tarha" eig khoin" ri-tam" gyo: zigi Mangsoo ri ngei" byid: da" xoin" dangain" tho' moo je gyi: nyid. xoin" du: joem yo' xoin"- ga: tid.

³⁴ Yesu gi hau" yug shoeb shoeb zoo: phoug tu" nyid ziri si' lang" nyang ri nang gi Mangso mungdain yo' atoung" vi: loo: ga: tid. Hau" thang: ri gi Yesu ri hang" we' ci: avoem" myid: boem loo: nghoid ago".

Meshia Da" Khyoo:Dang: Myid:

³⁵ Yesu gi noku yhoem: moo jhoug" byid: nyid uri-nyangnu" ri Meshia gi David da" amyed' ashen nghoid ga: tarha" sara yi khasunwim tid go" lha".

³⁶ Re" gyivoo joem ri re" khyid: voo: khoug moo ngoo atoo" byid: byid: gi nga" lo, yo shoid moo dazhoung: jo, we' ga: hau: Aseing: gi nga" Aseing: ri tid da:› ga: David gi gyeungshang: Venyi: vang lho: tid da.

³⁷ David nyang: lang gi Meshia ri Aseing: ga: tid rigi Meshia gi khasuwim wigi David da" amyed ashen se nghoid wa lha"» ga: tid. Byu phung: moo" yi gi Yesu da" jhoug" myeing" ri ngei pyoo" za: tam" gyo" yu boem ago". Byu phung: moo" yi gi Yesu da" jhoug" myeing" ri ngei pyoo za: tam" gyo yu boem ago".

Tarha" Sara Ri: Lhid, Wa Shid Re" Yesu Tid Poin Khyo

³⁸ Houg: su" Yesu gi jhoug" byid: nyid zoore"-tarha" sara yi ri lhid ge' nyangnu" gi byi: sheung: ri void pyam lho: so" yen" noug mo, kid" vang" cang lhoem: phau" myang: wa zi vhoo: mo, nghoid.

³⁹ Tarha" jung yhoem: khyoug: moo we' gootu: cin: nyheung to" da" zhung: tang moo zhung: noug mo, nghoid ago".

⁴⁰ Nyangnu" gi cougmoo" yi da" yhoem: zi yookhoid joem ri lhoid zo: ci: lho: subi" yu" gi sho' nghoid boin yen" mo, nghoid. Akyu" sheung" sheung: mho' noug mo, nghoid ago". Nyangnu" rigi je gyi: da" tarha" dang: kho' zi shau" boem wa nghoid ga: tid.

Coug" Moo" Myhi, Da" Alu Ngei

⁴¹ Hau: thang: ri Yesu gi noku yhoem: moo' alu boin" nam, moo zhoung: jo, wigi mung" byu yi phung moo alu ngei re" kaid nyid boem ziri yu" nyid soid gain yoo" mo, myoo" sho' bang; alu myoo" sho' re" kaid boem.

⁴² Hau: thang: ri sho" jhen: da" cougmoo" myhi. Dayug we' re" lho:-byaid san dakyab yo' moin: da" gyid: ngei eig kyab re" kaid da.

⁴³ Nyang: gi nya: cangzoo: yi ri khe: yu lho: nyangnu" ri ngoo nanu" ri deing" deing tid ba:-he: da" asho" ajhen: myoung sho" da" coung" moo" myhi, gi alu boin" moo re" kaid mo, dangain" tho' moo je kaid abye:.

⁴⁴ Khasuwim gari nyangnu" gi nyangnu" agoin ayoo yo" jang" mo jain" da" gu: ri re" kaid ago". Nghoid loug we' he: coung" moo" myhi, koem gi nyang: asho" ajhen: damyoung shoo" nghoid loug we' yo" gu: dangain"- nyang: zoo: zi dangain" re" kaid pyam abye:- ga: tid.