MARKU 10 - Lacid Common Language Bible

Myhi Zeing Phoo Zeing Yesu Gang: Go' Khyoo: Jhoug Byid.

¹ Hau: thang: ri Yesu gi hau: joyoo mo Yuda meing: khyoo: yhe: lo" wigi Yodan gyid gyung: thei: tab khyoo: gu: dab, lo". Byu Phung: moo" zeing nya: jang" moo doem zeung: phoung lo boem lang" nyang: gi khanham we' lhoung koid ziyo' dakhyoo"- nyangnu" ri jhoug" byid:.

² Pharishe" dayham" gi Yesu jang" moo re" lho: nyang: ri leug yu zoore"- byu dayug yug gi nya: yhoem: seing: myhi: ri Tarha" vang khyo" kang" pyam ge la". Ngoonu" ri" tid kyoo" we"- ga: myid boem.

³ Houg: lang" Yesu gi nyangnu" ri-nanu" ri Moshe gi khasu" ga" da tarha" byid: to" lha"» ga: doemtau" myid.

⁴ Nyangnu" gi Moshe gi kang" pyam moug soug" byid: lho: nya: yoem: seing: myhi, ri kang" pyam wa akhang" byid: to"- ga" phoug tu" ago".

⁵ Houg: lang" Yesu gi nyangnu" ri nanu" nheugloem: thain: boem yoomo he: tarha" gi nanu" shid re" Moshe lhid" too" khare" zi nghoid.

⁶ Jhoem mungdang; moo tid ziyo' dakhyoo" xang: shid" mo phain" so: to" uri gi Mangsoo gi yug gi yo" myi yi: ri phain" so: too" bye.

⁷ yug gi gi nya: myhi' yo' nya: phoo ri too" kho' lho: nya: yhoem: seing: myhi' yo' gungshoo" daloem za boe" loo" wa..

⁸ Houg: lang" nya: eig yug gi dagung dashoo" za: bue" loo goo" wa nya: eig yug gi eig yug anghoid- dayug za: nghoid da.

⁹ Hougsu" wigi Mangso wi zhoem to" ziri byu hang" wigi we' age kang" pyam' ga: tid to".

¹⁰ Nyang: nu" yhoem: khoug: moo doem lo" nyid uri e: khyoo: ri-nya: cangzoo: yi gi Yesu jhang myid ago".

¹¹ Houg: lang" Yesu gi nyangnu" ri nyang: nya: da" yhoem: seing: myhi' ri kang" pyam' wigi gootu: dayug ri lo, doem xo' yu su: gi nya: nyhoem: seing: myhi' ri shoid' su: nghoid, da.

¹² Houg: yo' dakhyoo" nya: yhoem: seing: phoo ri kang" pyam lho: gootu: dayug yo' lo, doem xo' yu su: gi lang shoid su: nghoid da:- ga: tid kyo".

Zoo Shom Ri: Yesu Mainkaid Byid: Khyoo:

¹³ Byu dayham" gi zooshang: yi ri lo, ke" lho: main, kaid byid: baja" ga: Yesu jhang mooshu" re" ago". Nghoidloug we' cangzoo: yi gi nyangnu" ri gyikoid ago".

¹⁴ Hau: ziri Yesu myang lang" nheug yu" yo: ziyo' nya: cangzoo: yi ri hau: zooshang: yi ri nga" jhang khyoo: loo nhang: kaid ge'- nyangnu" ri atoem too" goo"- Khasu" wim ga: ri Mangso mungdain gi houg: te" mo, da" mungdain nghoid.

¹⁵ Ngoo nanu" ri deung" deung tid zigi Mangsoo mungdain ri zooshang: dayug yhang ti" alhoem: yu su: gi hau: mungdain: khyoo: khanham we' ayo" vang yhi: wa ga: tid.

¹⁶ Hau thang Yesu gi zooshang: yi ri vu, yu lho: yug khang" moo" tho' moo lo, ke" lho: mainkaid byid.

Yoo" Su: Yoo" Shoug

¹⁷ Yesu gi gyung: khyoo: moo doem so" lo" nyid uri byu dayug gi gei, re" lho: nya shid khoin" moo poid thug thoug wigi nyang ri ge da" sara we"- apyaid ato: kang: so' yo" yu wa shid' mo ngoo khasu" koid wa lha"» ga: myid:.

¹⁸ Yesu gi nyang ri nang ciwimwigi ngoori ge ein: tid lha" Mangsoo dayug mo jain" lho: ge zi hang" anyid.

¹⁹ Byu asaid- sube" myi: alhoid- sube" zi akhoug"- amain" da" sagsi: akham'- amhau, fain" zoo:- re" myhi, yo' re" phoo ri phau" myang: we' ga: da" amyeung" mungdang: joem ri nang si gu, nghoid ga: tid.

²⁰ Hau: yug gi Yesu ri sara we" hau: gu: dangain" ri zooyam yo, mo ngoo phau" cang loo bye:- ga: phoug tu".

²¹ Yesu gi nyang: ri jheddab myid yo, tu: yu" lho: nang daja: ca" shi"- nang loo" shi" we-re" soid' gain jo, nu" joem ri lo" oung" pyam' lho: myoung shoo" mo, ri gam byid: we' houg: lang" nang mougkhoung: mungdain: moo soid' gain yoo" wa nghoid. Hau: lho: nga" thang: moo cang we' ga: tid da.

²² Hau da" dang: ri nyang: shaug" gyoo: lang" myonhoo: phyoug" wim shoem" lo" byug ziyo' nheug kug zeing phang: loo" khare". Khasu" wim ga: ri nyang: soid goin' yoo" su: nghoid.

²³ Yesu nya: cangzoo: yi jhang khyoo: lheung: yu" lho: nyang nu ri; tid- soid gain' yoo" mo, shid re" gi Mangso mungdain moo vangyhi: wa zi gye" yau: ago"- ga: nyangnu" tid kyo".

²⁴ Cangzoo: yi gi he: dang: ri gyo: mau" ago"- Houg: lang" Yesu gi nyangnu" ri Nga" zoo: yi we"- Mangso mungdain: khyoo: vang yhi: wa gye" yau: nyid ga: tid.

²⁵ Yoo" zoo: yoo" shog su: Mangso mungdain khyoo: vang yhi: wa lei, tho' moo Gola-ug gi nghab' nhoo: duang: khyoo" vang lid: loo" wa zi gi je lei- ga: doem tid kyo".

²⁶ Cangzoo: yi gi atho' tid loo: sho' mau" byug boem wigi hougsu" danghoid rigi khayug za: khyoid' yu zi te: shau" wa lha"» ga: nyang: cang" nyang: tid go" nyid boem.

²⁷ Yesu gi nyangnu" ri tu: yu" lho: hau: zigi byu khyo" age bui"- nghoid loug we' Mangsoo khyo" gi ge bue" da- ja: khang: moo" gi Mangso shidre ge bue" khyoo: za: danghoid.

²⁸ Houg: lang" Petru gi Yesu ri yu" we' ngoonu" gi dangain" ri to" pyam kho' lho: re" thang: moo cang bye"- ga: tid.

²⁹ Yesu gi nyangnu" ri ngoo nanu" ri deung" deung tid ba- ngoo yo' ngei bu: ludang: yoomo yhoem: yoo- mangnhung"- nham" moo"-myhi, phoo- zoo: du joem daja: ja: ri to" pyam khyoo: su: hang" nghoid loug we'

³⁰ He: da" pyaid moo shen" yhen ziyo' dage" yhoem: yoo- mangnhung"- nham" moo"- myhi, phoo zoo: du joemmoo- azhang dashoo: yo" kham: yu boem wa nghoid- thang: pyaid rigi apyaid ato: kang: so' yo" yu wa zi nghoid.

³¹ Nghoidloug we' shid' vhu" mo mo, myoo" sho' gi nung thang khyoo: nghoid boem wa thang: mo mo, myoo" sho' gi shid' moo nghoid wa ga tid.

Yesu Nyang: Shid: Kham: Wa Khyoo: Soem" Lheung: Ein: Tid Kyo".

³² Houg: lang" nyangnu" gi Yerusalem khyoo: do, lo" nyid boem uri Yesu gi cangzoo: yi da" shid moo so" nyid. Nya: cangzoo: yi gi mau" lho: thang: cang mo, gi gyoug ago". Yesu gi cangzoo: daxe: eig yug ri doem khe: yu wigi nya: tho' moo bue" loo wa da" khyoo: ri tid kyo".

³³ Tam" gyo" yu" ge"-ngoonu" gi Yerusalem khyoo: do, lo" nyid bye. Byu nya: zoo: gi houg: moo khainjung agyi moo" yi yo' tarha" sara yi da" lo, moo ab pyam zi shau" wa nghoid. Houg: su: nyangnu" gi byu nya: zoo: ri said pyam wa shid re" dang: phyed wigi tung: boug yi da" lo, moo ab pyam' lho:

³⁴ Tungbau byumyu" yi gi byu nya: zoo: ri shikain" byi" gyoin: lho: baid wigi said pyam' boem wa nghoid. Nghoid lug we' soem" nyid" thang ri nyang: gi dei to' loo, wa.

Yaku Yo' Yohan Eig Yug Yesu Ri: Mho' Khyoo:

³⁵ Zebedi da" nya: zoo: tang: Yaku yo' Yohan gi Yesu jhang tain" lo lho: nyang: ri sara we"- nga" tang: ri nang daja: koid byid: wa zi mho' nau ga: tid ago".

³⁶ Yesu gi nyang: tang: ri ngoo re" tang: ri cenoem koid byid: wa zi vho: ago? ga: myid:

³⁷ Nyang: tang gi Yesu gi nang myonhoo: phung" yoeb yo' re mungdain mo khokham" bue" lo" bidnyid ri nga" eig yug ri-re" lo, yo shoid khyoo: dayug lo, koung" shoid khyoo: dayug- nang yo dage" zhung: nhang: we' ga: tid ago".

³⁸ Yesu nyangtang ri tid zigi re" tang: cenoem mho' nyid zi re" tang: asi nghoid ago"- re" eig yug gi ngoo shug ca" da" kyi" khyeug ein: da" goem ri yo' shug goo" wa la". ngoo kham ca" ca" Babtisma ri yo" kham goo" wa la"» ga: zheung: myid.

³⁹ Houg: lang" nyang: tang: gi ngoo tang yo" bue" ga: tid ago" Yesu gi nyang tang: ri ngoo shug ca" da" goem ri natang: shug ca"- goo" wa Ngoo kham: yu wa da" Babtisma ri shau" kham: yu ca" goo" wa.

⁴⁰ Nghoidloug we' nga" lo, yo shoid lo, koung" shoid moo khayug zhung: wa zi gi khyen: yu wa shid mo ngoo moo akho: akhang" ajo, houg: giMangsoo nyheung too" mo, shid re" za: hau: joyoo nyangnu" ri byid: wa ga: tid.

⁴¹ Gootu: cangzoo: daxi yug bang: hau: khyoo: ri shau" gyo: boem uri Yaku yo' Yohan eig yug ri nheug yo: ago".

⁴² Yesu gi nya: cangzoo: yi ri nya: jhang khe: yu lho: nyangnu" ri Mangsoo: ri aloem mo ri vhoeb wa akhang" yo" mo, gi nyangnu" yi tho' moo yoem: so' yo" amyeing" akhang" yo' vhoeb khang" ago"- zoug: ludaid yi we' amyeing" akhang" ci: lho: snyid ziri nanu" se' boem ago".

⁴³ Nghoidloug we-nanu" gyoo: moo koem gi hougsu" age nghoid- nanu" mo je gyi: nougsu: hang" nghoid loug we' nyang: gi dangain" mo, deizoo: koid' ca"-

⁴⁴ Nanu" mo vhu" jhung: bui" noug su: hang" nghoid loug we' nyang: gi dangain" mo, deizoo koid' ca".

⁴⁵ Khasu" wim ga: ri byu nya: zoo: lang" ri subi" ri join, zoo: wa shid' mo ju" re" zi anghoid- subi" ri bo pang zei: wa ziyo' byu myoo" sho' khyoid' yu wa shid re" nya: kang: so' ri byid: pyam wa ga: ju" re" zi nghoid- ga: tid.

Myo, Jed Su: Barateme Ri: Yesu Geloo" Nhang: Khyoo:

⁴⁶ Houg: lang" nyangnu" gi Yerikho" khyoo: ju" re" ago"- Yesu gi nya: cangzoo: yi yo' byu phung: yo' thu' lo" nyid da uri Teme nya: zoo: Barateme gi myo jed da" mho' zoo: su: dayug - khyoo: yam moo zhoung: jo,-

⁴⁷ Nyang: gi" Nazaret mo Yesu ju" nyid khyoo: shaug" gyoo: lang" nyho: yoid zoore"- davi nya: zoo: Yesu we"- ngoori nheug khyeug yu shi" we' o"- ga: yoid nyid.

⁴⁸ Myoo" sho' mo, gi nyang: ri sam" zoo: nyid wa shid re" gyikoid boem ago"- nghoid loug we nyang: gi David nya: zoo: Yesu we"- ngoori nheug khyeug yu shi" we' o"- ga: daje nyho: yoid lo.

⁴⁹ Houg: lang" Yesu gi theung: wigi nyang: ri khe: shu" loo ge' ga: tid. Nyang: nu" gi myo, jed su: ri khe: lo wigi nyang: ri ngei pyoo: re- too we nyang: nang ri khe: nyid ga: tid boem.

⁵⁰ Houg: lang" nyang: gi nya: byisheung: khyoid she: pyam' lho: byam to' re" lho: Yesu jhang rhe" lo".

⁵¹ Yesu gi nyang: ri ngoo re" shid' re" cenoem koid' byid: wa zi nang vho: la".- ga: myid:- Houg: lang" myo, jed su: gi Yesu ri sara: we" ngoo myo, doem myang nau"- ga: phoug tid.

⁵² Yesu gi nyang ri so" loo" we re: loem" jeung" nheigloem: gi nang ri ge loo" nhang" abye:- ga: tid. Houg" lang" jang: nya: myo, myang lo wigi-Yesu yhe: lo" da" khyoo: moo nya: thang: cang lo" bye.