MALAKHI 4 - Lacid Common Language Bible

Aseing da" Bidnyid gi Ju" Lo Nyid bye:

¹ Yoem: moo" bo da" Aseing gi hid su" ga: tid nyid «Nghoid boin: nyid mo, dangain" yo' akhyeing" ashoeb da" moo" zei: nyid mo, dangain" ri khoofoo: ri yhang: ti" nghe' pyam wa da" ayo, gi ju" loo bye:. Hau: bidnyid moo nyangnu" gi nge" joem: lo" byug lho: houg: moo ci: we' jo, loo wa anghoid.

² Hougsu" nghoid loug we' nga" dang: ri tam" gyo: nyid mo, nanu" shid re" koem' gi nga" khyoid yu khyoo: gi nanu" tho' moo bid su" xain" thu lo lho: bid lo, beug lo yhang: ti" noo phyoo" joem ri ze: gi byid: wa zi nghoid. Lhoung to" da" nujung zoo: ri phang kaid ziyo' dakhyoo" ti" nanu" gi loid byoin gau yi go" xang" loo" goo" wa zi nghoid.

³ Ngoo moo" zei: lo da" bidnyid moo gi nanu" gi akhyeing" ashoeb bang: ri oung: pyam lho: nyangnu" gi nanu" da" khyid: voo khoug: mo pheilhoug: yhang: ti" bue" lo" byug goo" wa zi nghoid.

⁴ Nanu" gi nga" da" join Moshe da" tarha" ri xoem" too" we'. He: zigi Sina boem tho' mo wigi Israela byumyu" yi dangain" mo, cang wa shid re" ngoo nyang: ri byid: to" tarha" nghoid.

⁵ Nghoid loug we' gyi: myhang: lho: gyoug pho" da" ngoo Aseing ju" ri" wa da" bidnyid aju" loo shi" uri lapi: phoo Elia ri nanu" jhang khyoo: ngoo nhang: kaid wa zi nghoid.

⁶ Ngoo gi nanu" da" mung" ri ajoem: loo" nhang: wa shid re" nyang: gi nya: pho yo' nya: zoo: ri dage" veing" go" loo nhang: wa zi nghoid» ga: tid.