LUKA 8 - Lacid Common Language Bible

Yesu Thang: Moo Bo Cang Yen Da" Myiyi: Yi

¹ Ayo, dajhi' myang" lo" da" uri Yesu gi voo gung myoo" sho' lid lo" zoore"- Mangsoo mungdain' lu dang: gi ri kho" kyo" lho.

² Lagyoo: daxe: eig youg bang: gi nyang: yo" dage" bo cang yhe: lo. Noo gyi- yu join: gyi mo khyoid yu da" myiyi: yi dayham" we' bo cang lo" boem. Houg: bang: mo yu nyhed du: phang: thu' lo" da" Magadala ga: da" Mari we' bo lo.

³ Herod khokham" da" yhoem: vhoeb khang" da" zoug: moo"- Kutha da" yhoem: seing: myhi'- Yohana- Susanna yo" myiyi: gootu: myoo" sho' mo, gi nyang: nya: joyoo jang: moo Aseing Yesu yo' nya: cangzoo: yi ri ca" moo ca" bo pang" thoug ago".

Amyoug Sain" Su: Da" Dangtu'

⁴ Voo zoo: voo zeing mo lo da" byu dangain" mo, gi Yesu jang" moo zeing: foem: to" da" uri Yesu dangtu' khyo" tid kyo" zigi

⁵ Amyoug sain" su: gi amyoug sain" wa ga: thu' lo. Sain" kaid uri myoug shi" dayham" gi khyoo: gung moo gyoo" lo"- hau: da" myoug shi" rigi byu yi nang: led nyid lho: ngho' joem we koid: zo: pyam.

⁶ Myoug shi" dayham" gi Lug phoug tho' moo gyoo" lo. Agam yug re" lho: gyid aboo yoomo nyhau" kyoug shid: pyam.

⁷ Myoug shi" dayham" gi Zu: kyen byab moo gyoo" lo. Zu: gam joem gi myoug gam nu" joem ri foeb said pyam.

⁸ Myoug shi" dayham" gi myidjang: gi moo gyoo" lo" wigi agam youg gyi: lo lho: dashoo: zhang ashi" myoo lo ga: wigi tid kyo. Hau: thang: ri Yesu gi nukhyab dab mo gi gyo: yu ge" ga: tid.

Dangtu' Da" Myid yeug To" Khyoo:

⁹ Nya: cangzoo: yi gi he: dangtu' mo da" dangkang:- Yesu ri doem myid: ago".

¹⁰ Nyang: doem tid zigi Nanu" gi Mangsoo vhoeb khang" da" khyoo: mo no, thang da" khyoo: joem ri se' abye: go"- gootu: bang: gi yu" nyid lho: amyang- shau" gyo: lho: ase' gyoo: yoomo dangtu' khyo" kho" kyoo" ca" nyid.

Yesu Amyoug: Sain" Dangtu' Ri Phed: Kyo" Da" Khyoo:

¹¹ He: dangtu' mo, dangkang: gi hid: su" nghoid. Myoug shi" gi Mangso da" mungdang: nghoid.

¹² Khyoo: gung moo gyo" da" myoug shi" gi Mungdang: shaug" gyoo: mo, ri tid nau zi nghoid nghoid loug we' yu satan gi houg: bang: khyoid yu zi shau" wa avhoo: yoomo nyangnu" da" nheigloem: khoug: mo mungdang: ri re" yu pyam byid.

¹³ Lug phoug tho' moo gyoo" lo" da" myoug shi" gi Mungdang: ri shau" gyo: da: uri gau yi ziyo' kham: yu mo, ri tid nau. Nghoidloug we' nyangnu" da" nheigloem: khoug: moo mungdang: agyi: ayo" cen,- dayo, daboin: za: jham" ca: yu" da" yau khe: kyen" nhoung: khyoo: doem thoung" shau" lang" hau: yug gi doem fain" phoug: lo.

¹⁴ Zu: kyen: byab moo gyoo" lo" da" myoug shi" gi Mungdang: ri shau" gyo: lho: myid myoo: ungloug da" khyoo:- yoo" zoo: yoo" shug da" khyoo:- gung shoo" nyam khyo: ze wigi nghoeb foeb pyam yoomo mo, da" ashi" ayo" zei:- mo, ri tid nau zi nghoid.

¹⁵ Jen" bo da" myidjang: gi moo gyoo" lo" da" amyoug koem gi Mungdang: ri shaug" gyoo: lang" tam" gyoo: nau da" nheigloem: yo"- geing: geing: teing teing kham: yu loem" jeing" wigi Ashi" zei: loo sho' koid: da" byu yi ri tid nau da" zi nghoid.

Lain" Ceig khoug: Mo Myikug

¹⁶ Myikug ri tab lho: wigi Lain" ceing: zhoung" lhoung:- anghoid lang" yhoeb, cuang gyid" moo kaid to" zigi hang" we' akoid: yu. Yab moo vang loo mo, myo, myang wa shid' re" myikug ke" jang: moo za: dete: lhoung ke" to" boem.

¹⁷ Yhoem" to" da" zi dangain" gi thu' myhang loo wa. Nghoeb to" khyoo: dangain" gi diricen: shau" myang boem wa.

¹⁸ Nghoid loug we' houg: yoomo Nanu" ceja: khasu" shau" gyo: ci: zigi zed" nyid ge'.Khasu" wim gari Yoo" su: ri poug lung: byid: wa. Ayoo" su: jang" mo gi nyang: yo" ga: myid ci: zi dangain" ri lang" nya jhang my yu pyam byid: wa" ga: tid.

Yesu Da" Nya: Myhi, yo' Nya: No,

¹⁹ Yesu da" nya: myhi' yo' nya: no, gi nyang: jang" moo ri" nghoid loug we' Byu phung: yi myo: nyid yoomo nyang: yo" ayo" shau" go" boem.

²⁰ Byu dayug gi Re" myhi, yo" re" no, gi Aseing: yo" shau" goo" noug yoomo nghe: shid' moo re" nyid ago" ga: Yesu ri tid kyo.

²¹ Houg: lang" Yesu gi nyangnu" Mangso da" mungdang: ri shau" gyo: lho: cang loo" mo, dangain" gi nga" myhi, yo" nga" no, nghoid, bye ga: tid

Yesu Uglid Ri: Tom" Loo" Nhang: Khyoo:

²² Danyid" ri Yesu yo' nya: cangzoo: yi gi gyid thoem" thei: tab khyoo gu: loo" shang ga: sham: go" wigi cangzoo: yi yo" lhid' mo gu: go" lo" boem bye.

²³ Houg: su" gu: go" lo" ri Yesu gi yhoeb' pyo: jo, hau: uri nyeigdain tung" Uglid moo" hau, lo wigi lhid' moo gyid byeung" loo yoomo cangzoo: yi gi gyid moo noeb lo" nyid boem- ziyo' gye" gyoug dain mau" nyid boem bye.

²⁴ Nyangnu" gi Yesu ri nhau" lho: Aseing: we"- Aseing: we"- ngoonu" shid: boem wam: bye myang ga: tid boem. Yesu gi to' re" lho: lid yo' being: mhoid ri amyeing" khyo' toem pyam houg: lang" uglid' yo' being: mhoid gi sam: zoo: tam" loo" bye.

²⁵ Houg: lang" nyang: gi Nanu" loem" jeing" nheigloem: gi khare"- ga: cangzoo: yi ri myed. Nghoidloug we' nyangnu" nyang: gi gyoug mau" zoore"-He: yug gi hang" nghoid lug lha"- lid yo" being: mhoid we' nyang: amyeing" byid: lang" gi tam" gyoo: nhung: lha"» ga: nyang cang nyang- tid boem.

Yesu Yu Dab su Ri: Noo Ge Loo" Nhang:

²⁶ Yesu yo' nya: cangzoo: yi gi Gerase mung" khyoo: gu: lo" ago". Gerase gi Galile mung" gyid thoem" thei: tab moo jo, da" voogung nghoid.

²⁷ Yesu gi gyid yam moo do, lo" ri voo moo" mo, Yu joem vang ci: da" voo byu dayug gi nyang: jhang re" shau. Hau: yug moo yu joem vang ci: zigi gye" myang" bye. Nyang: gi byimi avoid- yhoem: moo we' anyid nghoid loug we' Loeb boug mo lug ug khoug: moo za: cang nyid yen.

²⁸ Yesu ri myang lang" nyang: gi yoid nyho: ngau lho: nya: shid' khoin" moo nyang: goeb pai wigi myhang: thang da" Mangso nya: zoo: Yesu we"- Nang gi ngoori ci: koid: nau lha". ngoori ashen" ayhen shi" lhe"- ga: yo" nyho: yoid kaid.

²⁹ Houg: su" tid da" khyoo: gi Yesu gi yu joem ri hau: youg da" gung mo thu' loo" wa da" shid' re" amyeing" khyo kaid yoomo nghoid. Yu joem gi hau: yug moo myoo" sho' lheing vang yu" bye. Nya: da" khyid: yo" lo, moo jangcoo" yo"- tei" to" yu nghoid loug we' nyang: gi jangcoo" ri khang kho: pyam lho: yu joem koin" lo" da" dain pyoid' yoo khyoo: lhoung gei vang lo.

³⁰ Yesu gi Hau: da" yu ri re" myeing ce: myeing nghoid ga: myid. Nya: myeing gi legio nghoid ga: tid. Houg: su" tid da" khyoo: gi hau: yug moo yu joem myoo" sho' vang nyid yoomo tid zi nghoid.

³¹ Yu joem gi nyangnu" ri no, thang da" duang: khoug: moo akoin" khyo kaid ga: toung" pain: ago".

³² Hau: uri vu, joem moo" dajoem gi bouggung tho' moo boid zoo: go nyid. Yu joem gi hau: vu, joem moo vang wa da" akhang"- Yesu ri mho' toung" pain nyang: gi nyangnu" ri akhang" byid.

³³ Yu joem gi hau: byu jang" mo thu' lo" lho: Vu, joem jang" moo vang lo. Houg: lang" vu, joem moo" dangain" gi dung" bung tho' mo wigi dalheing: dam gyid thoem" moo byam vang lho: noeb shid: pyam boem.

³⁴ Hid: su" bue" da" khyoo: ri vu, zung" mo, myang lang" phang: lo" boem. Nyangnu" gi voo moo" yo" soo" yo voo gung khyi khang" moo" moo he: da" ludang ri fu" lo" boem.

³⁵ Byu phung yi gi houg: su" bue" lo da" khyoo: ri yu" wa ga: zeing: re" lo boem ago". Yesu jang" moo ju" boem lang" gi yu joem phang: thu' loo" su: gi Yesu da" khyid: yang moo goo" nham yo' dakhyoo" ti"- byu gi doem bue" lho: zhoung: jo, ziri zheing: myang lang" yu" gyoug nyid boem.

³⁶ Zheing: myang da" sagsi yi we hau: yug yu gi khasu" khyoo: byu yi ri tid kyo".

³⁷ Hau: da" uri Gerase moug: mo byu dangain" mo gi gye" gyoug dain mau" nyid boem yoomo Yesu ri nyangnu" da" moug: mo myab myab doem thu' loo" wa shid' re" toung" pain: nyid ago". Houg: lang" Yesu gi lhid' tho' moo do, lo" lho: hau: moug: mo thu' lo.

³⁸ Hau: yu joem phang: thu' loo" su: gi Yesu ri ngoo nang yo" dage" so" yen" nau" ga: mho' nyid.

³⁹ Nghoidloug Yesu gi Re" yhoem: khyoo: lo" lho: Mangsoo nang ri khasu" koid: byid: da" khyoo: ri lo" tid fu" yen" we'. Ga: tid kaid Hau yug: gi voogung khyoo: lo" lho: nyang ri Yesu zei: byid: da" moo" ni" lo" tid kyoo" bye..

Ya- i- ru Da" Myiyi: Zoo: Yo' Yesu Byisheing: Moo Tain" Da" Myiyi: Zoo:

⁴⁰ Nung" thei: tab' khyoo: Yesu doem tau" lo da" uri Byu phung: moo" gi nyang: ri lhoem tau yu boem- khasu wim gari nyangnu" gi nyang ri lang" nyid boem yoo mo nghoid.

⁴¹ Hau: da" uri Ya- i- ru ga: su: gi ju" re" wigi nyang: gi Tarha" jung moo vhoeb da" zoug: phoo nghoid. Yesu da" khyid: yang: moo re" goeb pai lho: nya: yhoem: moo ri" wa shid' re" nyang: ri mho' tid.

⁴² Khasu" wim gari daxe: eig zain ju" bye: da" nya: zooti" myiyi: zoo: gi no shid: lo" nyid yoomo nghoid. Yesu gi nyang: yo" dage" cang lo" da" uri Byu myoo" sho' mo, we' nya: da" ayam, aqei: moo bo jhen" jhab' lo boem.

⁴³ Hau: phung: moo myiyi: myhi, dayug gi daxe: eig zain goin"- suid" shoin: da" noo bo ci: su: nghoid. Nyang: moo yo" jo, da" ngei sheing: jo, nhoo" bain sho' moocid" ze: yu" bye. Nghoidloug we' kha" moocid" Doug Tha we' nya: noo ayo" ze: gi byid.

⁴⁴ Hau: da" myiyi: myhi, gi Yesu da" nung thang moo tab tab cang yhe: lho: Yesu da" byi: mo bain: byou thang: moo shau" tain" kaid- houg: lang" jang: yau, nyid da" suid" kain" loo" khari" bye.

⁴⁵ Aseing Yesu gi ngoori zang" su: gi hang" nghoid ga: myid. Nyangnu" hang" we' azang" tain" ga: hi: go" nyid da" uri Peteru gi Aseing: we' byu phung: moo" gi nang ri nyhen" pu, go" nyid.

⁴⁶ Nghoidloug we' Yesu gi Byu dayug yug gi ngoori zang" tain" bye. Nga" da" gung mo yoem: so' thu' lo" zi ngoo se' ga: doem tid.

⁴⁷ Yoang moo hau: da" myiyi: myhi, gi nyang: koid: da" moo" po: thu' lo zi si' yoomo gyoug nain" ziyo'- shid' khyoo: re" lho: Yesu khyid: goeb pid. Hau: thang: Aseing: ri Ci: wim wigi zang" da" khyoo: we' nya: da" noo dalheing: dam ge lo" da" khyoo: ri we' byu myoo" sho' mo, da" shid' khoin" moo tid kyo.

⁴⁸ Yesu gi nga" zoomyi: zoo: we"- re" da" loem" jeing" nheigloem: gi nang ri noo ge loo" nhang: bye. Myenjham" zoore" daloo" re, nyang: ri ga: tid kaid.

⁴⁹ Houg: su" ga: Aseing: tid nyid da" ayo, moo Tarha" jung vhoeb da" zoug: phoo yhoem: mo lagyoo: dayug ju" re" Ya-i-ru ri re" zoomyi: zoo: gi shid: bye- Sara: ri akhe: nhung yen" loo: ga: re" tid.

⁵⁰ Hau: da" dang: ri Aseing Yesu shaug" gyoo: lang" Ya-i-ru ri nang Myid amyoo:- nang moo loem" jeing" da" nheigloem: za: date: boo we' Re" zoomyi: zoo: gi doem yang" loo wa zi nghoid ga: tid.

⁵¹ Nyang: gi hau: yhoem: moo ju" lang" Peteru- Yaku- Yohan yo' myiyi: zo: da" nya: yhed nya: ba" mo, led lho: gootu: hang" ri we' haug ri we' nyang: yo' dage" avang loo" nhang.

⁵² Myiyi: zoo: shid: yoomo byu yug khang" moo" gi nyho: ngoug go" nyid Yesu gi angoug goo"- he: zooshang: gi shid: zi anghoid. Nyang: yhoeb' jo, zi za: danghoid ga: tid.

⁵³ Hau: uri byu yi gi myiyi: zoo: bain shid: bye: zi se' boem yoomo Yesu ri juang" yi nyid boem ago".

⁵⁴ Nghoid loug we' Yesu gi too we' nga" zoo myi: we" myiyi: zoo: da" lo, moo zei: ci: lho: myiyi: zoo: we" ga: yoid.

⁵⁵ Myiyi: zoo: gi kangso' doem vang lo lho: houg: jang: nyang: to' loo bye. Yesu gi myiyi: zoo: ri zoo: noem daja: ja: zhoo" ge" ga a mying" byid:

⁵⁶ Nya: myhi' phoo gi gye" mau" nyid ago". Nghoidloug we' Yesu gi He: bue" lo khyoo: hang" ri we' atid kyoo" goo" ga: zung" nhang: kaid. s