LUKA 24 - Lacid Common Language Bible

Dei To, Lo Da" Khyoo:

¹ Labain nyid" no' re hau: myiyi: yi gi nyang: nyang: nyheing to" da" moora: xu: joem ri zheing: ci: lho: loeb khyoo: yhe: lo" boem.

² Loeb khoem" dung: mo lugloem: ri tu: lhei" to" ziri yhe: zheing: myang boem.

³ Loeb khoug: moo vang lo" yu" nghoid loug we' Aseing Yesu da" nghain" doem: ri azheing: myang boem loo:.

⁴ He: khyoo: yo" sen: lho: nheigloem: ahei" afoo" wim ziyo' yab, jo, nyid boem uri gye" bang da" byimi void ci: da" byu eig yug gi nyangnu" da" shid' khoin" moo dalheing: dam thu' myhang lo.

⁵ Hau: myiyi: yi gi gye" gyoug yoomo myid gaung: moo goeb yoin" to" boem. Hau: byu eig yug nyangnu" ri doem tid zigi ci: yoomo dei nyid su: ri shid: mo, nyid jang" moo re" sho: nyid go".

⁶ Nyang: gi he: joyoo moo anyid loo doem dei to' loo" bye. Aseing: nyang: Galile meing: moo nyang: nyid shi" uri

⁷ Byu nya: zoo: gi yooboo yoo" mo, da" lo, moo ab pyam zi shau" wa. Pyang" zeing: moo baid jen" said pyam zi we' shau" wa. Nghoidloug we' hau: thang: soem" nyid ein: da" nyid" ri shid: jang" mo doem dei to'' loo wa"- ga: nanu ri tid da" dang: ri myid: soo" ge'» ga: tid.

⁸ Hau: uri myiyi: yi gi Yesu tid khare" da" dang: ri doem myid: boin: lo boem lho:

⁹ Loeb mo nyang: nya: yhoem: khyoo: doem lo" boem wigi nya: cangzoo: daxe: dayug yo"- cangzoo: dangain" mo, ri houg: loeb moo bue" lo da" khyoo: bain sho' tid kyo" boem.

¹⁰ Lagyoo: yi ri houg: su" lo" tid kyoo" mo, gi Magadala Mari- Yoana- Yaku da" nya: myhi, Mari yo"- gootu: myiyi: yi nghoid.

¹¹ Nyangnu" lo" tid kyo" da" dang: joem gi lagyoo: yi shid' re" dang: kang aboo yoomo lagyoo: yi gi agyo: loem" boem.

¹² Nghoidloug we' Peteru gi to' loeb khyoo: gei yhe: lo" lho: loeb khoug: moo goeb yu" kaid. Pain" boem mo gootu: ci" we' amyang hau thang: ri nyang: gi hau: khyoo: ri mau" lho: yhoem: khyoo: doem lo.

Ema U Voo Khyoo: Yhe: Lo"

¹³ Hau: nyid" ri nyang:- cangzoo: eig yug gi Ema u ga: da" voo davoo khyoo: zheing: yhe: lo. Hau: voogung gi Yerusalem voo mo nyhed main koo ve: zi nghoid.

¹⁴ Hau: eig yug gi bue" lo da" khyoo: dangain" ri khyoo: moo tid go" lo.

¹⁵ Houg: su" tid go" lo" da" uri Yesu gi nyang: eig youg jang" moo ju" lo lho: nya: eig yug yo" bo so" lo.

¹⁶ Nghoidloug we' nya: eig yug gi nyang: ri myang ase' yu" nghoid loug we' wa da" myo, goo byid: to.

¹⁷ Yesu gi «re" eig yug khyoo: so" lo da" uri ce: noem khyoo: tid loo go"» ga: myid. Houg: lang" nya: eig yug gi myonhoo: shoem" shid: yid koid: ci: lho: wigi hau: joyoo moo yab no: nyid.

¹⁸ Nya: eig yug mo Khleopa ga: su: gi Yerusalem moo jure" da" being: voo yi mo nang dayug za: akhayo, bue" lo" da: khyoo: ri asi shi" zi danyid nhung: lha"» ga: nyang: ri myed:

¹⁹ Nyang: Yesu gi «ce: noem moo" bue" lha"» ga: doem myid: Hau: eig yug gi Nazared mo Yesu yo" sen: da" moo" nghoid ga: tid kyo. Hau: yug gi Mangsoo yo" byu dangain" mo, da" shid' khoin" moo lo, moozoo" yoem: boo su:- nhoid tid sang: ziyo' dakhyoo" ti" koinsu nghoid.

²⁰ Ngoonu" da" khainjung agyi moo" yi yo"-vhoeb, khang" zoug: yi gi nyang: ri tarha" dang phed lho: nyang: ri Pyang" zeing: mooshid: kham wa shid' re" nyang ri ab pyam bye.

²¹ Hau: Aseing: gi Israela byu yi ri lhoid pyoin kaid wa su nghoid. Ein: ngoonu" nheigbyu lo yu boem. Hau: da" moozoo" bue" lo zigi akhid" nyid" yo" ri soem" nyid shi" danghoid.

²² Ngoonu" da" byen cang" myi: yi: yi dayham" gi nabsoin: no" re" loeb khyoo: zheing: yhe: lo" boem.

²³ Nyangnu" gi nghain" doem: ri ayhe: myang boem. Mouglagyoo: yiri yoeb bang khyo" yhe: myang boem ga. Ngoonu" ri lo tid kyo" boem. Mouglagyoo: yi gi nyang: gi doem dei to'' loo" bye" ein: lhoem: tid kyo" boem ga. Ngoonu" ri tid kyo" boem. Houg: yoomo ngoonu" gi gye" gyo: mau" nyid boem.

²⁴ Ngoonu" phung: mo byu dayham" bang: we' loeb khyoo: yhe: yu" boem ri myiyi: yi tid kyo" ziyo' dakhyoo" ti" te: yhe: myang boem ga. Nyang: ri koem gi amyang boem loo: ga: ga: tid kyo".

²⁵ Houg: lang" Yesu tid zigi lapi: yi kho" kyo" to" da" dang: dangain" ri loem" jeing" wa shid' re" gye" thang: gyo" nyid shi" da" anya, yi we"-

²⁶ Meshia gi myonhoo: phung" yoeb akham: yu shi" ri hid: yhang: te" da" kyi" khyeug yau: khe" khyoo: ri kham: zo: ca" nyid anghoid goo" la"» ga: tid.

²⁷ Hau: thang: ri-Yesu gi xang: shi" da" Moshe da" mougsoug" pug moo boda" jhoem: dang: mo wigi Lapi: yi tid to" da" mungdang: dangain" moo nyang yo" sen: da" jhoem: mungdang: dangain" ri he: eig yug ri tid pang kyo".

²⁸ Houg: bang: lo" da" voo yam moo ju" loo" lang" Yesu gi shid' khyoo: lid loo" wa da" aved thu nyid.

²⁹ Nghoidloug we' nyangnu" gi akhid" moug coid zoo" nghoid bye. Nyid" ayo, we thang: loo" bye:- houg: su" yoomo nga" eig yug yo" lo" theing: shang ga: nyang ri lhoung. nyang: gi nya: eig yug yo" dage" theing: wa shid' re" cang lo.

³⁰ Zoobui" moo nya: eig yug yo" dage" zhoung: jo, lho: zooyho' ri yu lho: mainkaid byid:. Hau thang: myang gi zooyho' ri phe, lhoi nya: eig yug ri gam byid: bye.

³¹ Hau: uri she, nya: eig youg da" myo, nghoeb gi gyeing: lo wigi nyang: nghoid ziri se' lo. Nghoidloug we' nyang: gi nya: eig youg shid' khoin" mo byug loo" khare".

³² Nya: eig yug gi khyoo: moo nyang: gi yha" eig yug ri dang: tid nyid da" uri we' Jhoem: mungdang: phoid: kyo" uri we' yha" eig youg da" nheigloem: moo myi: yham: dab nyid yhangti"- wim nyid anghoid la"» ga: nyang: cang" nyang: tid go" nyid.

³³ Nyang: tang: gi kho: to' lho: Yerusalem voo khyoo: doem lo" ago". Hau: joyoo moo cangzoo:- daxe: dayug yo"- gootu: cangzoo: yi zheing: foem: too" lang" ziri lo" myang.

³⁴ Zheing: foem: to" mo, gi «gyeing" nyang: Aseing: gi shid: jang" mo doem dei to' loo" bye" ga: wigi Peteru ri nya: gung thu' shug bye:» ga: tid go" nyid lang.

³⁵ Hau: thang: ri hau: eig yug gi khyoo: moo bue" da" zi we' zooyho' phe, gam nyid uri Aseing: nghoid zi boin: gyeing: lo da" khyoo: we lo" tid kyo" boem.

Nya Cangzoo: Yiri Yesu Da" Gung Thu' Shoug Khyoo:

³⁶ Hau: da" khyoo: joem ri cangzoo: eig yug tid kyo" nyid da" uri Aseing: gi nyangnu" da" mo, phung: gung moo nyeigdain tung" thu' myhang lo lho: nanu" moo myenjham" nyid goo" baja" ga: tid.

³⁷ Nyangnu" gi soobyo, ri nyang ga: myid: boem wigi dain' nain" nyid boem.

³⁸ Nghoid loug we' nyang: nyangnu" ri tid zigi ciwim gyoug nain" nyid go"- ce: noem wim nanu" da" nheing loem: khoug: moo loem" shoid lho: aloem" akhoo: koid: nyid go" lha".

³⁹ nga" das" lo, yo' khyid; moo yu" ge'- Nanu" myang nyid su: gi ngoo nyang: nghoid bye:- soo byoo gi gung sho" yo' sho" youg: aboo- Nanu" myang ziyo' dakhyoo" ti" ngoo moo gung suid" shoo" bo.

⁴⁰ Hau: zi bain' tid lho:-nya: da" khyid: yo" lo, ri toin" shid bye:.

⁴¹ Nghoidloug we' nyangnu" gi gye" yu" mau" nyid boem shi" yoomo ayo" loem" koid: nyid shi" uri nyang: gi nanu" moo zoo: noem daja: ja: yoo" go" la"» ga: myid.

⁴² Nyangnu" gi ngoo: kang: zi dadu: byid: boem.

⁴³ Nyang: gi yu lho: nyangnu" da" shid' khoin" moo zo: shug nyid.

⁴⁴ Hau: thang: ri nyang: gi Moshe da" tarha"- Lapi: yi da" tarha" mungdang: yo"- coung" nghei mougsoug" moo nga" khyoo: yo" sen: wigi lhid" to" da" khyoo: joem gi bui" nyang: bue" loo wa ein: wigi nanu" yo" dage" nyid shi" uri ngoo tid kyoo" bye: the,- ga: nyangnu" ri tid.

⁴⁵ Hau: thang: ri cangzoo: yi gi jhoem: mungdang: ri se' gyoo: wa da" shid' re" nyangnu" da" nheigloem: khoem" duang: byid.

⁴⁶ Nyang: nyangnu" ri tid zigi Meshia gi kyi" khyeug kha, lho: hau: thang: ri shid: jang" mo soem" nyid" kyoo: lang" doem dei to' loo wa ga: lhid" to".

⁴⁷ Nya: myeing khyang" ri loem" jeing" lho: yooboo ri khyoid pyam byid: khyoo: yo" yu nheigloem: thid lo da" khyoo: ri Yerusalem voo mo ayang: qei" lho: byumyu" bain sho' ri kho" kyo" loo" ge'.

⁴⁸ Nanu" gi hau: da" moozoo" yo" sen: lho: wigi myo, moo gyo, bo myang da" sagsi: yi nghoid.

⁴⁹ Nga" phoo Mangsoo byid: wa ga: dang: theing" to" akyu" jeju" joem gi nanu" ri ngoo yo" yu nhang: wa zi nghoid. Nghoidsho' loug we' Nanu" gi mougkhung: mo yoem: vhoo" ri ayo" kham: yu yu gi Yerusalem voo moo dalang" nyid shi" ge" ga: tid.

Yesu Ri Mougkhung: Khyoo: Shu" Do, Lo" Khyoo:

⁵⁰ Nyang: gi nyangnu" ri Yerusalem mo, - Bethani voo yam khyoo: khe: shu" yhe: lo. Nya: lo, tu: lho: mainkaid byid.

⁵¹ Hid: su" mainkaid byid: da" uri Yesu gi cangzoo: yi jang" mo thu' lo" lho: mougkhung: khyoo: shu" do, lo" zi shug bye.

⁵² Cangzoo: yi gi Yesu ri noku lho: gye" gau yi ziyo' Yerusalem voo khyoo doem lo boem.

⁵³ No' ku" yhoem: moo" moo byeing abyid: Mangso da" jeju" ri coung" nghei ziyo' danyid nyid boem.