LUKA 23 - Lacid Common Language Bible

Yesu Ri: Pilaid Shid' Khoin" Khyoo: Shu" Yhe:

¹ Phung: goin" bang: gi to' lo boem lho: Yesu ri Pilaid shid' khoin" khyoo: shu" yhe: lo" boem.

² Hau: thang: ri nyangnu" gi he: yug gi byu phung: yi ri khyoo: vhang: nhang: wa shid' re" Ketha khokham" ri khang" dug ayo" kaid ga: tid khyoo: ri we' ngoonu" nyang: myang boem bye: ga: tid - Hau: lho:» ga: tid yoomo ngoonu" nyang;r i: myheig lho: nyang: ri yooboo foin boem.

³ Pilaid khokham" gi nyang: ri «nang gi Yuda khokham" nghoid la"» ga: myid. Yesu gi nang myid: ziyo' dakhyoo" ti"- deung nyid ga: phougtu".

⁴ Hau: thang: ri Pilaid khokham" gi He: yug ri said pyam wa da" amyeing" khyo, wa shid' re" yooboo daja: ri we' ngoo amyang ga: khainjung agyi moo" yi yo"- byu phung yi ri tid kyo.

⁵ Nghoidloug we' nyangnu" gi He: yug gi Galile mung" mo wigi akhid" Yuda mung" ngam sho' mung" byu yi ri kho: kyo" lhu: phyo' yen" ga: yooboo foin: boem.

Yesu Ri: Herod khokham" Jhang Nhang: Kaid'

⁶ Pilaid khokham" gi hau: dang: ri shaug" gyoo: lang" He: yug gi Galile mung" byu la"» ga: nyang: myid.

⁷ Herod vhoeb khang" da" Meing: mo mung" byu nghoid zi si' lang"-nyang: ri Herod jhang nhang: kaid' khyoo: Yerusalem hau' yo, ri Herod gi Yerusalem voo moo re" ju" nyid da" ayo, nghoid.

⁸ Herod khokham" gi Yesu ri myang lang" soo" soo" gau khasu" wim gari nya: da" khyoo: myoo" sho' shau" gyo: nyid yoomo nyang: ri myang nau zi we' gye" myang" bye. Yesu toin" shid' da" mau" pho" alhoo: again joem dayham" ri shau" myang yu" yoo: ga: ngham" lang" nyid su: nghoid.

⁹ Herod khokham" gi Yesu ri dang: myoo" sho' ja: myid: nghoid loug we' Yesu gi adoem phoug tid.

¹⁰ khainjung agyi moo": yi yo"- tarha" sara: yi gi shid' khyoo: re" lho: Yesu ri gyi" sho' da" yooboo re" foin: boem.

¹¹ Herod khokham" yo' nya: gyizoo: yi gi Yesu ri aphoug" akhyoid koid: lho: juang" yi ago". Hau: thang: ri gye" reng: da" byi: sheing: ri foid lho:-nyang: ri Pilaid khokham" jhang khyoo: doem nhang: kaid.

¹² Akhang: mo gyi nghoid nyid da" Pilaid khokham" yo"- Herod khokham" eig yug ri hau: bidnyid gi bidnoem bue" loo bye.

Yesu Ri: Said Pyam Wa Dang: Phyed Khyoo:

¹³ Pilaid khokham" gi khainjung agyi moo" yi vhu" jhung: yi yo"- byu phun: joem ri zeing: foem: nhang.

¹⁴ Hau: thang: ri He: yug gi mung" byu yi ri khyoo: shu" vhang; su: nghoid nyang: ri nga" jhang khyoo: khe: shu" re. Nanu" da" shid' moo ngoo cid" kyeing yu" bye. Nghoidloug we' nanu" tid ziyo' dakhyoo ti"- hau: yug ri yooboo foin: wa khyoo: daja: we' ngoo amyang.

¹⁵ Herod khokham" we ce: yooboo amyang. Houg: yoomo nyang: ri nga" jhang khyoo: doem de" kaid. He: yug gi shid: moin: da" yooboo daja" we' ashoid too.

¹⁶ Houg: yoomo nyang: ri ngoo yoo bo dam, byid: lho: doem nhang: kaid wa ga: tid.

¹⁷ Pilaid khokham" gi lhid: kaid da" pui" moo byu yi shid' re" thung: byu phung: dayug yug ri khyam" sa: byid: lhoung lhoid kaid da" thung" bo.

¹⁸ byu phung: yi dangain" mo, gi he: yug ri shid: dam, dabyid: we"- ngoonu" shid' re" gi Baraba ri khyam" sa: lhoid pyoid byid: we'- ga: byu phung: dangain" bang: gi yoid ngoug go" lo boem.

¹⁹ Baraba gi voogung khoug: moo byu said su: nghoid yoo mo, thung khoug: moo lhoug too" su: nghoid.

²⁰ Pilaid khokham" gi Yesu ri lhoid pyoin khyam" sa: byid: noug yoomo byu joem ri dalheing: doem myid.

²¹ Nghoidloug we' byu joem gi nyang: ri pyang" zeing: tho' moo baid jen" lho: said pyam ge' pyang" zeing: tho' moo baid jen" said pyam ge" ga: nyangnu" danyhoo: go" nyid.

²² Pilaid khokham" gi he: yug ce: noem yooboo ri zei: shoid lha". nyang: ri said pyam wa shid: moin: da" yooboo daja: we' ngoo amyang. Houg: yoomo nyang: ri yooboom byid: lho: nhang: kaid wa" ga: soem" lheing: ju" sho' houg: su" za: da tid nyid.

²³ Nghoidloug we' byu phung: joem gi Yesu ri pyang" zeing: tho' moo baid jen" said pyam wa shid' re" khyung" jid' loo" sho' sho' nyho: yoid mho' nyid boem. Houg: yoomo lo" thang moo gi yo" mho' yu lo" boem ago".

²⁴ Pilaid khokham" gi nyangnu" mho' ziyo' dakhyoo ti"- Yesu ri dang: kho" byid: pyam bye.

²⁵ Doin: lhoem" theing shang" ziyo'- byu said yoomo thung: gyo" jo, su: rigi-nyangnu" yoid mho' nyid ziyo' dakhyoo" ti"- lhoid pyoin da" akhang" byid: kaid bye. Yesu rigi nyangnu" cikoid: noug cikoid wa shid' re" ab byid: kaid bye.

Yesu Ri: Pyang" Zeing Moo Baid Jen" Said Pyam Khyoo:

²⁶ Gyizoo: yi gi Yesu ri shu" thu lo" uri siyoo voogung mo zi voomoo" khyoo: gyoo" re" nyid da" Kureni byu Simun ga: su: yo' nyangnu" shoug" go" da. Nyangnu" gi nyang: ri myheig yu lho: pyang" zeing yu nhang: wigi Yesu da" thang: moo cang soo" nhang: da.

²⁷ Byu phung: moo" gi nya: hang: moo cang yhe: lo" boem. Myiyi: yi dayham" mo, gi nyang: nya: yanggang moo thoin: zoore"- cang ngau yhe: lo" boem.

²⁸ Yesu gi hau: myiyi: yi jhang khyoo: lheing: yu" kaid lho: Yerusalem myiyi: nu" yi we"- nga" shid' re" angoug goo"- nanu" nyang: yo' nanu" da" nya: zoo: yi shid' re" da ngoug ge'.

²⁹ Zoo: abo ziyo'- zoonu" noug" ashug yu" da" myiyi: gi ngi lhoo wa" ga: tid da" ayo, gi ju" lo boem wa.

³⁰ Hau: da" bidnyid moo byu yi gi boem lang joem ri ngoonu" tho' moo re" byo, gyo" du" boem" too" byid: ge' ga: we' bouggung joem ri ngoonu" tho' moo re" boid zeig too" byid: ge' ga: wigi we' mho' yoid da" ayo, gi ju" lo boem wa.

³¹ Nyau young" jo, da" seig joem: gam yo" du da" ngoori- nyangnu" hid: yhangti" shen" yhen nghoid rigi seig kyug gam yo" du da" nanu" ri khasu" je koid: wa zigi si' ge'.

³² Byu yi gi said pyam moin: da" byu eig yug ri we' Yesu yo" dage" said wa ga: bo shu" yhe: lo" boem.

³³ Vhu" gyab' boug ga: da" joyoo moo ju" lang" Yesu yo" said moin: da" byu eig yug ri pyang" zeing: moo baid jen" to" boem. Said moin: da" eig yug ri dayug gi lo, yo shoid khyoo:- dayug rigi lo, koung" shoid khyoo:- bo baid jen" lhang" to" boem.

³⁴ Yesu tid zigi O" nga" phoo we"- hid: bang: da" yooboo ri khyoid pyam byid: we'. Nyangnu" zei: da" moo" ri nyangnu" ase' boem ga: mho' tung" pain: byid. Byu yi gi nya: da" atho' byi: zeing ri me" lab lho: gam, go" boem.

³⁵ byu phung: yi gi yab jo, lho: yu" nyid boem. Yuda byumyu" da" vhu" jhung: yi gi he: yug gi byu goo" ji ri yo" khyoid yu gyeing" nyang: Mangso khyen: to" da" Meshia nghoid rigi nya: gung ri we' khyoid yu yu" baja". Ga: tid juang" yi nyid ago".

³⁶ Gyizoo: yi we' nyang: ri juang" yi, boem lho yhid: jhen: yeung yhoin" jhoug boem lho: wigi

³⁷ Nang Yuda khokham" nghoid rigi na nya: gung ri khyoid yu yu" we' ga: juang" yi nyid ago".

³⁸ Nya: da" vhuloem phyoo" moo He: Yug Gi: Yuda khokham" Nghoidga: lhid" tab to" boem.

³⁹ Pyang" zeing: moo said moin: yoomo bo baid jen" lhang" too" su:- eig youg jang" mo we' dayug gi nang Meshia nyang: anghoid la". nang nyang: ri we' nga" eig yug ri we' khyoid yu yu" we' ga: aphoug" akhyoid juang" yi da.

⁴⁰ Said moin: su: gootu: dayug gi hau: yug ri tid zigi nang gi Mangsoo ri agyug rhe"- yha" eig yug gi he: yug su: dam, bo kham: nyid nghoid loug we'

⁴¹ Yha" eig yug gi nyang: nyang: kham: eung: da" yooboo dam, dakham: nyid he: Aseing: koem gi ce: yooboo we' ashoid yu" ga: wigi tid poin.

⁴² Hau: thang: nyang: Yesu ri tid zigi khokham" yhang: ti" doem ju" gyoo" lo da" uri ngoori we myid boin: we'.

⁴³ Yesu nyang: ri tid zigi akhid" nyid"- nang yo" ngoo dage" pharadisu moo nyid wam: bye" ga: ngoo nang ri dang: soo" byid.

Yesu Kang: Gyo" Loo" Khyoo:

⁴⁴ Ayo, gi bidnyid" gungtu: 12 nayi: nghoid bye. Hau: ayo, mo wigi bid gam: lo"- soem" nayi: koo: ju" sho' mougmyid daloem: goin"- bid shoem: lo" byug lho: moug coid teing: no, khare".

⁴⁵ No' ku" yhoem: moo" mo pain" xiyam we' eig gang gyam: gyo" loo" khare".

⁴⁶ Yesu gi O" nga" phoo we"- Aseing: da" lo, moo nga" Venyi: ab byid: bye" ga: thui: zeing: yo" gyi" sho' nyho: lho: kang: gyoo" khari" bye.

⁴⁷ Hid: su" bue" lo da" moozoo" ri gyizoug: zeing: bain sho' myang lang" Mang"Soo: ri coung" lha he: yug gi gyeing" gyeing" nyang:- byu gi dayug danghoid» ga: tid.

⁴⁸ He: da" moo" ri bo yu" wa ga: zeing: re" da" byu phung: yi gi Houg: su" bue" lo da" khyoo: joem ri myang yoomo nyang: nya: yanggang moo thoin: lho: dangain" bang: tau" lo" boem.

⁴⁹ Galile mung" mo Yesu thang: moo bo cang re" da:- myiyi: yi yo" dage" Yesu ri si' mo dangain" gi vi" moo yab jo, lho: yu" go" nyid boem.

Yesu Ri: Nyhoeb Shoung: Khyoo:

⁵⁰ Hau: uri Yuda mung" Aramathi ga: da" voo mo Yoseb ga: da" Yuda mo zoug: dayug nyid. Nyang: gi deung main" da" byu gi dayug nghoid lho: wigi Mangso da" mungdain: ju" ri" wa ziri lang" nyid su: dayug nghoid.

⁵¹ Nyang: gi kongsi: moo boo su: dayug nghoid loug we' nyangnu" sham: go" phyed to" khyoo: ri abo veing" su: nghoid.

⁵² Nyang: gi Pilaid khokham" jhang khyoo: yhe: lho: Yesu da" nghain" doem: ri mho' yu.

⁵³ Hau: thang; ri nyang gi Nghain" doem: ri pyang" zeing: mo yu khyo, lho: pain" yo" thoeb to. Hau: thang: ri lugpyo, moo kyoung" to" da" dalheing" we' aci: shi" da" loeb seig moo myhoeb bye.

⁵⁴ Hau: nyid" gi soin' jen" da" bidnyid nghoid wigi Dougno: Bidnyid ju" wa jhang loo bye.

⁵⁵ Galile meing: mo Yesu jang" moo bo cang re" da" myiyi: yi we' Yoseb yo' dage" bo cang yhe: lho: loeb ri we' nghain" doem: ri khasu" koid: ziri we' bo myang boem ago".

⁵⁶ Hau: thang: ri nyangnu" gi yhoem: khyoo: tau" lo" boem lho: nam, pyo: xu: yo" moora: xu: joem ri gung doem: shid: khyag soin' ci: ago". Toung to" tarha" yo' dakhyoo" ti"- Dougno: Bidnyid ri no: nyid ago".