LUKA 20 - Lacid Common Language Bible

Yesu Da" Amyeing" Akhang" Ri: Myed: Yu" Khyoo:

¹ Danyid" ri Yesu gi No' ku" yhoem: moo" moo byu yi ri jhoug" byid: lho: Lu dang: gi ri kho" kyo" nyid uri khainjung agyi moo" yi tarha" sara: yi yo" phoung: vhu" jhung: yi gi Yzheing: re" lo boem.

² Houg: bang: gi nyang: ri Nang he: moo" ri hang" amyeing" akhang" khyo" koid. Ngoonu" ri tid kyoo" we' he: amyeing" nang ri hang" byid: ga: myid: boem ago".

³ Yesu nyangnu" ri doem phougtu" tid zigi ngoo we nanu" ri dang: dakhoin" myid: yu" shid" ba.

⁴ Yohan Babtisma kham: byid: zigi Mangso da" amyeing" akhang" khyo" nghoid la". Byu da" amyeing" akhang" khyo" nghoid la". ngoori tid kyoo" ge'.

⁵ Nyangnu" gi gyeing" nyang: Mangso da" amyeing" khyo" koid: ein: ngoonu" tid nghoid rigi Houg: ri Yohan ri nanu" ciwim aloem" jeing" go" ga: nyang: tid wa.

⁶ Houg: su" anghoid lang" gi Byu yi da" amyeing" akhang" khyo" koid:- ein: tid nghoid ri yen gi Byu myoo" sho' mo, gi Yohan ri Lapi: dayug khyo" loem" jeing" to" boem yoomo ngoonu" ri luggo yo' du" boem wa nghoid. Nyhang" khasu" sang: wa lha"» ga: nyang: cang" nyang: sham: ngeig go" nyid.

⁷ Houg: yoomo nyangnu" gi Hang" da" amyeing" akhang" yo"- Babtisma kham: byid: da" khyoo: kha: mo re" zi ri ngoonu" asi ga: ngoonu" ga: nyangnu" phoug tid boem.

⁸ Houg: yoomo Yesu tid zigi «ngoo koid da" moo" we' hang" da" amyeing" akhang" khyo" koid ziri nanu" ri tid kyoo" anoo"» ga: tid.

Zabyid Khyam: Nghoo" Zei: Mo, Da" Dangtu'

⁹ Hau: thang: ri Yesu gi byu yi ri he: da" dangtu' tid kyo. Shid' phyang" byu dayug gi zabyid khyam: daloem: nyheing sho' to" lho: byu dayug ri nghoo" byid: kho' lho: nya: yhoem: mo thu' lo" wigi ayo, myang" sho' ye nyid byug

¹⁰ Ayo, ju" loo lang" join dayug ri khyam: nghoo" moo" zei: mo, jhang khyoo: khyam: phoug" mho' nhang: kaid. Nghoidloug we' khyam: moo" zei: mo, gi hau: join ri lhoem: nhug lho: gung koem: doem nhang: kaid.

¹¹ Hau: thang: ri khyam: seing: gi join gootu: dayug ri doem nhang: kaid. Nghoidsho' loug we' khyam: moo" zei: mo, gi nyang: ri we lhoem: coem nhug lho: asho' ashid: koid' wigi gung cen: doem: nhang: kaid.

¹² Hau: thang: ri dalheing: khyam: seing: gi soem" yug ein: join ri doem nhang: kaid loug we' khyam: moo" zei: mo, gi hau: da" join ri we' dam byid: lho: nghi: khyoo: du" khyo, pyam.

¹³ Hau thang: khyam: seing: gi ngoo khasu" koid: wa lha". Ngoo mo dayug kyeing" da" zooti" zoo: ri nhang: kaid wa danghoid loo: sam. Nyangnu" gi nyang: ri gyeing" gyeing" lhoem: phau" myang: boem wa ga: tid.

¹⁴ Nghoidloug we' khyam: moo" zei: mo, nyang: ri myang lang" - khyam: moo" zei: mo, gi He: yug gi khyam: seing: da" nga: zoo: nghoid. Nyang: ri said pyam shang nya: da" ziyoo gi nyha" zibui" wa ga: nyang: cang" nyang: tid go" nyid.

¹⁵ Houg: yoomo khyam seing: da" nya: zoo: ri nghi: khyoo: she: thu' lho: said pyam boem ago". «Houg: lang" khyam: seing: gi he: khyam moo" zei: mo, ri khasu" koid: wa lha".» ga: Yesu myid.

¹⁶ Nyang: gi re" lho: houg: bang: dangain" ri bain said pyam wigi zabyid khyam: ri we' byu gooji ri nghoo" byid: pyam wa ga: tid. Hau: da" dang: ri shaug" gyoo: boem lang" byu yi gi hid: su" age koid ga: tid boem.

¹⁷ Yesu gi byu yi ri yu" lho: lug yhoem: zhug mo, khyen: lheig to" da" lugloem: gi dangain" tho' moo je" akhyag thang da" yhoem: jhoin lug zing bue" loo bye: ga: da" jhoem: dang: mo dangkang gi ce: noem nghoid? na? ga: myed:.

¹⁸ Hau: lugloem: tho' moo gyoo" loo" su: gi adu du gyau: loo" wa. Hau: lugloem: wi doem gyo" baid su: gi mhoin' mhoin' moin" loo" wa ga: tid.

Khang" Dug Kaid Da" Dang: Myid:

¹⁹ Tarha" sara: yi yo" khainjung agyi moo": yi gi nyangnu" ri yeing lho: he: da" dangtu' tid ziri se' gyoo: yoomo Yesu ri myab myheig pyam wa shid' re" yoem: kaid nyid boem bye. Nghoidloug we' ayang nu" gi byu phung: yi ri gyoug nyid ashi" go.

²⁰ Houg: yoomo nyang: bang: gi axeig amyo gi ri shoo: go" nyid. Nyangnu" gi Yesu da" Mungdang: mo tid shoid wa da" dang: ri myid: lho: nyang: ri Roma khokham" da" lo, moo ab pyam wa shid' re" gi goin koid da" jooyu" mo, ri Yesu jhang khyoo: nhang: kaid to" boem.

²¹ Hau: da" jooyu" mo, gi Sara: we" nang kho" kyo" da" mungdang: joem gi deung main" nyid ziri ngoonu" se' Aseing: gi myonhoo: vhu" zung akhyen- nghoid da" main" da" ziyo' dakhyoo" ti"-byu xangsu: shid re" Mangsoo da" deungmain" khyoo: ri jhoug" byid ga: Yesu ri tid.

²² Ngoonu" gi Roma khokham" ri khaug" dug kaid ri yha" tarha" ri thougtheung zi nghoid wa la". Houg: su" anghoid lang" akaid loo: nyid wa la". ngoonu" ri tid kyoo" we'.

²³ Yesu gi houg: bang: da" nheigloem: guid" da" khyoo: ri se' yoomo

²⁴ Ngei deing" ga" dakyab nga" jhang toin" shid' yu" ge' he: ngei kyab moo hang" da" soolhoo: yo"- myeing dab lha"» ga: myid: ‹‹nyangnu" gi khokham" da" soolhoo:-» ga: tid.

²⁵ Yesu doem tid zigi khokham" yo" sen: gu: khokham" ri byid: ge' Mangsoo yo" sen: gu: gi Mangsoo ri byid: ge" ga: tid.»

²⁶ Nyangnu" gi byu yi shid' khoin" moo Yesu shoid da" yooboo ri ashau" shoo: yoomo Yesu phoid: kyo" khyoo: ri gyoo: mau" lho: sam" zoo: nyid byug ago".

Shid: jang" mo Doem Dei To, Lo Zi Yo' Seng: Da" Dang: Myid:

^27-28 Hau: thang: ri Saduke dayham" gi Yesu jang" moo tain" re" ago". Nyangnu" gi byu shid: jang" mo ayo" doem dei loo loo:- ga: loem" mo, nghoid. Nyangnu" re" tid zigi sara" we"- Byu dayug gi zoo: du ayoo" loo: za: nya: yhoem seing: myhi ri shid: cau too" loo" lang" gi cougmoo" myhi, ri nya: nhung" lo, doem xo' yu zi nghoid. Nya: mang: da" yhoemkhung: ri nya: nhung" doem nyid xo' yhi: ca" ga: ngoonu" ri Moshe Tarha" lhid" byid: to" bye.

²⁹ Dalheing: ri nya: mang: nya: nhung" nyhed yug nyid boem. Mang: moo" gi myhi: yu lho: zoo: aboo shi" ri doem shid: lo.

³⁰ Hau: yug shid: lo" thang: ri mang: laid' yung we' hau cougmoo" ri lo, doem xo' yu. Hau: nya: nhung"

³¹ Hau thang ri soem" yug ein: yug we' lo, doem xo' yu- houg: yo' dakhyoo" ti"- nya: mang: nya: nhung" nyhed yug goin" coug" koem: lho: zoo: ayoo" zi zheing: shid: khare" boem.

³² Thang: ri hau: yhoem: seing: myhi' we' doem cang shid: lo.

³³ Nya: mang: nya: nhung" yi nyhed yug goin"- hau: myiyi: myhi, yo" deungkhu: zheing: qei" boem yoomo shid: jang" mo doem dei lo da" bidnyid ri Hau: myhi' zeing gi kha: youg da" yhoem: seing: myhi' bui" wa ga: Yesu ri myed: boem.

³⁴ Yesu tid zigi he: pyaid mo byu yi gi loxo' deungkhu: qei" ago".

³⁵ Nghoidloug we' shid: da" jang" mo doem dei to' lo da bidnyid rigi loxo' deungkhu: aqei" boem loo.

³⁶ Nyangnu" gi moug: lagyoo: yi yhangti" nghoid yoomo yo" shid: loo: wa zi anghoid. Nyangnu" gi shid: da" jang" mo doem dei to'' loo mo, nghoid yoomo Mangso da" nya: zoo: yi nghoid boem bye.

³⁷ Myi: yham: dab nyid da" mhain" pung moo toin" shid' nyid da" uri Moshe gi Mangsoo gi Abraham da" Mangsoo- Isag da" Mangsoo- Yaku da" Mangsoo nghoid ga: tid zigi shid: loo" mo, doem dei loo wa da" khyoo: ri bang bang sag si toin" shid nyid. zi nghoid.

³⁸ Houg: bang: gi kangso' dei nyid mo, nghoid yoomo nyag: gi shid: loo" mo, da" Mangsoo anghoid. Dei nyid mo, da" Mangsoo danghoid ga: tid.

³⁹ Houg: yoomo sara: we"- nang tid da" dang: yi gi gye" du da" dang: nyang: nghoid bye: ga: tara" sara da yham tid byid: boem.

⁴⁰ Houg yoomo nyangnu" gi nyang: ri dang: dakhoin" we' azheing: voem" myid: boem boem loo..

Meshia Da" Khyoo: Dang: Myid:

⁴¹ Yesu houg: bang: ri tid zigi Meshia gi David da" akung: mo nghoid ein: khasu" wim tid go"

⁴² David khokham" nyang: lang" coung" nghei mougsoug" moo tid to" zigi

⁴³ Ngoo gi re" da" gyivoo yi ri re" khyid: ki" goo bui" nhang: da" ayo, ju" sho' nga" da" lo, yo shoid moo zhoung: jo, we' ein:- nga" da" Aseing: ri tid ga: wigi tid to.

⁴⁴ David khokham" gi nyang: ri Aseing: ga: tid nghoid rigi khasu" wim wigi Meshia gi David da" Byu kung se' nghoid wa lha"» ga: myid.

Yesu Tarha" Sara: Yiri Tid' Poin Khyoo:

⁴⁵ byu phung: yi myoo" sho' tam" gyoo: nyid boem da: uri Yesu nya: cangzoo: yi ri tid da" zigi

⁴⁶ Tarha" sara" yigi nyangnu" da" byidsheing: joem ri void ci: wigi so" lheing: yen" nau lho: kid" vang" cang moo we lhoem: phau" myang: boem wa ziri vho: ngei ago". Tarha" jung joem moo we' goo" zu: xen nyheing to" da" zhungtang joem ri khyen: yu ago". Pui" cang we reng: thang da" zhungtang joem ri vho: ngei boem ago".

⁴⁷ Cougmoo" myhi, yi da" yhoem: zi yoo khuid" joem ri we' atarha" khyo" lhoid yu lho: subi" gyo: loem" wa khyo" akyu" sheing: sheing: cang mho' yen" boem. Nyangnu" ri je no, thang da" yoobo dam byid: wam: bye: ga: tid.