LUKA 19 - Lacid Common Language Bible

Yesu Yo' Zake

¹ Yesu gi Yerikho voo khoug: moo vang lho: lid: lo" nyid.

² Hau: joyoo moo Zake ga: da" kheing" khyu: zoo: su: dayug nyid. Nyang: gi sathi" dayug nghoid.

³ Nyang: gi Yesu ga zi hang" nghoid myang wa shid' re" yoem: kaid nyid. Nghoidloug we' gung nyhoem: su: nghoid yoomo mung" byu yi kyo: to" wigi Yesu ri ayo" myang.

⁴ Houg: yoomo byu phung: yi da" shid' khyoo: gei lo" lho: Yesu ri myang wa shid' re" lafoem gam moo do, lo.

⁵ Yesu gi hau: joyoo moo ju" lo" da" uri nyang: yu" kaid lho: «Zake we"- myab gyoo" loo we' akhid" nyid" re" yhoem: moo ngoo theing: wa» ga: tid.

⁶ Zake gi seig gam mo myab myab" gyoo" lho: Yesu ri atho' tid loo: sho' gau yi ziyo' tau yu.

⁷ Hau: khyoo: ri myang da" byu yi gi «he: yug gi yooboo yoo" su: da" yhoem: moo theing: wa ga: yhe: loo" bye: nhung» ga: kyiyang myeing ago".

⁸ Zake gi yab jo, lho: Aseing: ri «tam" gyoo: we' sara: we"- nga" da" soidgain dago" yi" gi shojhen mo, ri gam byid: pyam wam: bye: ngoo gi gyeing" nyang:- byu dayug yug jang" mo atarha" khyo" mhau' mho' yu ci: da" ngei bo lang" rigi hau: ngei tho' mo myid: boem doem lung: byid: wa» ga tid.

⁹ Yesu gi «He: yug we' Abraham da" nya: myid: nya: zoo: nghoid yoomo khyoid yu da" jeju" gi akhid" nyid" nyang:- he: da" yhoem: moo ju" ri" bye.

¹⁰ Byu nya: zoo: gi byug bye: mo, ri shoo: lho: khyoid yu wa shid' re" ju" ri" bye.

Sheing: Kyab Dangtu'

¹¹ Byu phung yi hau khyoo: ri tam" gyo: nyid shi" ri Yesu gi xo' lo: nyangnu" ri dang: tu, daloem tid. Hau: uri Yesu gi Yerusalem voo yam moo ju" lo" nyid. Byu yi gi Mangso mungdain: gi kho: nyang: thu' loo wam: bye:- ga: nyangnu" jho: nyid boem.

¹² Houg: yoomonyang tid zigi shid' phyang" daleing: khokham" nu" dayug gi khokham" aya ri yhe: kham: yu lho: doem loo wa shid' re" mung" da mung" khyoo: thu' lo.

¹³ Gyung: aso" loo" shi" ri nya: join daxi: yug ri khe: yu lho: dayug ri sheing: dakyab kyab byid: wigi ngoo doem ju" lo nyid" ju" sho' phaga: koid: nyid lang" ge" ga: tid.

¹⁴ Nghoidloug we' nya: da" mung" byu yi gi nyang: ri ngheing" boem yoomo he: yug khokham" bui" zi ngoonu" avhoo:- ga: lagyoo: yi ri nya: thang: moo cang tid nhang: kaid.

¹⁵ Hau: yug gi khokham" aya ri kham: yu lho: doem ju" loo bye. Hau: yug gi kho: za: nyang: anhi" byid kho" da" join yi ri amyaid khamyhoo' yoo" bye: la' ga: myang noug yoomo re" ge" ga: amyeing" lo byid:..

¹⁶ Dei zoo: xang shid" dayug jure" wigi Aseing: we" nang byid: khare" da" sheing: kyab yo" wigi amyaid daxi: kyab yo" shoo: bye: ga: re" tid.

¹⁷ Nyang: tid zigi-shoeb' su: we"- nang gi join, gi dayug nghoid. Nge da" moo" moo deungmain" yoomo nang ri voo zeing daxi: voo moo vhoeb nhang: wa ga: tid.

¹⁸ Eig yug ein: da" join we' jure" lho: sara: we"- nang byid: kho" da" sheing: kyab yo"- amyaid wim: kyab yo" yu bye: ga: re" tid.

¹⁹ khokham" phoo gi nang ri we' voo zeing: wim: voo ri vhoeb khang" nhang: wa ga: tid.

²⁰ Join goo" yug we' jure" lho: Aseing: we"- nang byid: khare" da: sheing: kyab hid: jo, shi"- hau: sheing: ri ngoo phajed mo keug lho: yhoem" to.

²¹ Aseing: gi gye thain: su: nghoid yoomo ngoo gi gye gyoug. Nang gi nanyang: aseing: da" ziri lhoung: shoem" yu lho: nang nyang: asho" jang" mo lhoung shab yu ga: re" tid.

²² Nyang: gi nyang: ri tid zigi-akhyeing" da" join gang:- nanya: nhoid mo thu' dang: yo" nang ri dang: phyed wa. Ngoo gi gye thain: su: nghoid yoomo aseing: ziri shoem" yu se' zi we' asho" jang" mo lhoung shab yu ziri we' nang se.

²³ Ngoo byid: da" ngei ri ngoo doem lo yo, moo anhi" yo" amyaid ngoo vho: zi se' lho: ciwim wigi ngei jhi: moo ayhe: kaid to" lha"»ga: tid.

²⁴ Hau: thang: hau joyoo moo yab jo, mo ri nyang: gi «nya: jang" mo sheing: kyab ri yu lho: sheing: kyab daxi: yoo" su: ri byid: pyam ge"» ga: tid.

²⁵ Nghoidsho' loug byu yi gi nyang: ri tid- sara: we"- hau: youg jang" moo sheing: daxi: kyab jo, bye: ga: tid.

²⁶ Nyang: gi nanu" ri ngoo tid zigi yo" jo, su: ri so' lung: byid: wa shojhen su: jang" mo gi jhoid" lhoid yu shi" wa.

²⁷ Hau: tho' moo gootu: ngoo vhoeb khang" khyoo: ri anau kham: mo, nga" gyivoo joem ri hid: moo shu" lo lho: nga shid' mo said khyo pyam ge" ga: tid.

Oung: doid Ziyo" Yerusalem Voo Khyoo: Vang Lo"

²⁸ Houg: su" bain tid thang: ri Yesu gi Yerusalem voo khyoo: nyangnu" shid' moo yhe: lo.

²⁹ Zhainlun ga: da" boem mo Bedphage voo yo" Bethani voo yam moo jhang loo" lang" nya: cangzoo: eig yug ri shid' mo voogung khyoo: nhang: lho:

³⁰ Pyeung: kaid da" zigi «voogung moo ju" loo lang" hang" we' azhoung: yu" shi" da" loo zei: bam zoo: dadu: ri tei" shoem ge" tei" too" lang" ziri myang goo" wa, tei" phoid: lho: hid: moo she: loo ge'.

³¹ Byu dayug yug gi re" eig yug ri ci: koid: loozei: tei" phoid: go" ga: to' tid nghoid rigi he: loozei: ri ngoonu" da" Aseing: ci: ca" ga: ein: nyang: ri tid ge» ga: tid.

³² Nhang: kaid su: eig yug we yhe: lo" da" uri-Yesu: pyeing kaid ziyo' dakhyoo" ti"- hau: khyoo: dangain" ri khyag shau" myang bye.

³³ Nyangnu" loozei: tei" phoid: nyid da" uri loozei: seing: mi" gi «re" eig yug cikoid: loozei: tei" phoid: go"» ga: myid:.

³⁴ Nya: eig yug gi «he: loozei: ri ngoonu" Aseing: ci: ca"» ga: phoug tid tid lho:

³⁵ Hau: loozei: ri Yesu jhang khyoo: she: loo bye:. Hau: thang: ri loozei: gung nyhau, gung tho' moo nyangnu" da" byi: ri du" ke" lho: Yesu ri hau: loozei: moo zhung: nhang: boem.

³⁶ Nyang: l zhoung: so" lo" da" uri byu phung: yi gi nyang: nya: byi: khyoid yu lho: khyoo: moo myhu" byid: boem ago".

³⁷ Yerusalem voo khyoo: nyang: Yesu jhang loo" lang" zhainlun boem mo gyoo" lo da" khyoo: moo cang lo da" byu phung: phung moo" gi nyangnu" shau" myang bye da" gyi: thang moozoo" yoomo Mangsoo ri thui: zeing: yo" coung" ngei boem.

³⁸ Nyangnu" coung" nghei thui: gi Aseung: myeing yo" jure" da" khokham" phoo gi ngilho' dang: khab nyid baja" o"- Mougkhung: mougdi moo Mangsoo phung" yoeb myonhoo: yo, myenjham" nyid baja" o".

³⁹ Hau: jang" mo byu phung: khoug: moo bo da" Pharishe yi dayham" gi sara: Yesu ri tid we"- re" cangzoo: yi ri sam: sam: nyid ge" ein: a myeing" byid we' ga:

⁴⁰ Yesu gi nanu" ri ngoo tid nau zigi hid: bang: sam: zoo: nyid lang" gi lug zeing joem nyho: phau: lo boem wa ga: tid.

Yerusalem Voo Goung Shid' Re" Yesu Ngau

⁴¹ Nyang: gi Yerusalem voo yam moo ju" lo" wigi hau: voo ri myang lang" ngau lho: tid nyid zigi.

⁴² Voogung nang we"- myenjham" ngei pyoo: khyoo: yoo" nhang: da" khyoo: ri akhid" nyid" myang se' nghoid ri nang ngi lhoo wa. Nghoidloug we' hau: khyoo: ri khid" nyid" nang amyang asi nghoid da.

⁴³ Re" gyivoo yi gi kadug du:- dab goin" lheing khoem jhed lhoung lo ayo, ju" wa.

⁴⁴ Nyangnu" gi nang ri we' re" da" vang khoug: moo nyid da: byu dangain" mo, ri we' lhu: phyo' sain" pyam boem wa. Lug daloem: tho' moo daloem: lang" aki" loo: wa, ce: noem wim la"» ga: ri Nang gi nanyang: ri khyoid yu wa da" Mangsoo gyoo" lo da ayo, ri nang asi yoomo nghoid ga: tid.

No ku" yhoem: Moo" Khyoo: Yesu Yhe

⁴⁵ Hau: thang: ri Yesu gi No' ku" yhoem: moo" khyoo: vang lo" wigi kid" ung" mo, ri khaid thu' pyam lho:

⁴⁶ Nyang: nu" ri tid zigi Nga" khyu" mho' yhoem: gi Akyu" mho' da" yhoem: ein:- myheing wa ga: Mangso jhoem: dang: moo ‹‹Nghoidloug we' nanu" gi No' ku" yhoem: moo" ri khyangtoug: joem gau" jo, da" lug ug dakoid: nyid goo" nhung: lha"» ga: tid.»

⁴⁷ Yesu gi nyid" khang" nyid"- No ku" yhoem khoug: moojhoug" byid: nyid. khainjung agyi moo": yi Tarha" sara: yi yo" mung" byu yi da" vhu" jhung: yi gi nyang: ri said pyam nau boem.

⁴⁸ Nghoidloug we' Byu dangain" mo, gi Yesu da" mungdang: ri tam" gyo: kham: yu nyid boem yoomo Yesu ri said pyam wa khyoo: ashau" shoo dang: dakhoin" lang" avoem" shoid boem.