LUKA 11 - Lacid Common Language Bible

Yesu Akyu" Mho' Da" Khyoo: Jhoug" Byid: Zi

¹ Danyid" ri Yesu gi joyoo daloem: moo akyu" mho' nyid. Akyu" bain mho' thang: ri cangzoo: dayug gi Aseing: we' Yohan gi nya: cangzoo: yi ri akyu" mho' jhoug" byid: yhangti"- ngoonu" ri we' jhoug" byid: we' ga: mho'.

² Yesu gi «Nanu" akyu" mho' da" uri hid: su" mho' ge'. phoo we"- re" da" gyeungshang: myeing khyang" ri phau" myang: nyid boem baja". Re" da" mungdain: ju" loo baja".

³ Ngoo nu" ca" nyid da" zoo: noem ngoonu" ri nyid" khang" nyid byid: we'.

⁴ Ngoonu" ri subi" shoid da" yooboo- ngoonu" khyoid pyam byid: yhangti"- ngoonu" da" yooboo ri we' khyoid pyam byid: we'. Ngoonu" ri yau: da" jhu, phyo' ca: yu" jang" khyoo: ayhi: nhang.

⁵ Hau: thang: ri Yesu gi nanu" mo dayug yug gi myen" gam gung ri bidnoem dayoug yhoem: khyoo: yhe: lho: bidnoem phoo we" ngoori zooyho' soem" loem jen" jhid" byid: shi" we' ga: mho'.

⁶ Nga" da" yhoem: moo gyung: so" da" bidnoem dayug ju" lo. Nga" jang" moo nyang: ri zhoo" zi ci" we' ajo.

⁷ Yhoem: seing: gi ngoori phi: bu apu- yhoem: khoem" dangain" shung: bye. Zooshang: mi" yo" ngoonu" dangain"- yhoeb' yoo zheing: vang shang boem bye. Houg: yoomo ngoo to lho: nang ri zooyho' joem ri ayo" yu byid: loo: ga: yhoem: khoug: mo tid kaid.

⁸ Yhoem: seing: gi bidnoem dayug khyo" yhoeb' jo, yoomo to lho: zooyho' ri yu byid: wa zi anghoid. Nghoidloug we' hau: yug gi agyug asho' loo: damho, nyid yoomo yhoem: seing: gi to lho: ca" da" zooyho' dangain" ri byid: wa zi nghoid.

⁹ Houg: yo' dakhyoo" ti"- nanu" ri ngoo tid zigi Mho' ge' mho' ri yo" wa. Shoo: ge' sho: ri myang wa ko' ge' ko' lang" khoem" ri phang byid: wa.

¹⁰ Khasu" wim gari Mho' su: hang" nghoid loug yoo" zi nghoid. Shoo: su: gi shau" myang wa. khoem" moo ko' su: ri we' phang byid: wa zi nghoid.

¹¹ Nanu" mo hang" nya: phoo we' Nya: zoo: gi ngoo: do' mho' ri Lhangmyu byid: wa su: nyid go" la".

¹² Gyo, u ga: mho' ri gunggoug" byid: goo" wa la".

¹³ Nanu" akhyeing" mo lang" nya: zoo: yi ri ge zi se' byid: rigi Mougkhung: Aseing:- Nanu" da" nya: phoo gi mho' mo, ri gyeungshang: Venyi: je wigi byid: wa anghoid goo" la"» ga: tid.

Yesu Yo" Bezebula

¹⁴ Dalheing: ri Aseing Yesu gi dang: ase' tid da" yu ri khaid thu' pyam byid: lho: hau: yu phang: thu' loo" lang" dang: ase' tid su: gi dang: yo" tid lo. Byu phung: yi gi gye" mau" nyid boem.

¹⁵ Nghoidloug we' byu dayham" gi Yesu gi yu khokham" Bezebula ri loem: lho: yu joem ri dayo" khaid thu' ga: tid boem.

¹⁶ Byu dayham" bang: gi Yesu ri ca: yu nau boem yoomo mau" pho" mo alhoo: again daja: pya shug we"- ga: mho' boem.

¹⁷ Yesu gi houg: bang: da" nheigloem: ri si' byid: yoomo tid zigi «Mungdain: daloem: loem moo nyang: cang" aveing" goo" lang" gi hau: mungdain: gi amyang" ri byo, yoin" loo" wa zi za: nghoid. Yhoem: deing: khu: daleom: moo we' yhoem: byu nyang: cang" aveing" goo" loo: lang" gi hau: deing: khu: gi byo, yoin" loo" wa zi za: nghoid.

¹⁸ Houg: yoomo satan da" Mungdain: moo dayug yo' dayug aveing" go" nghoid rigi Khasu" wim se' geing teing jo, wa la". ngoo gi Bezebula ri loem: lho: yu yo" khaid thu' ga: nanu" tid ago".

¹⁹ Gyeing" nyang:- ngoo gi Bezebula ri loem: lho: yu joem ri dayo" khaid thu' nghoid rigi nanu" da" cangzoo: yi gi hang" ri loem: lho: yu joem ri yo" khaid thu' go" lha". houg: bang: nyang: lang" nanu" shoid vhang: nyid da" sagsi: yo" kham: boem da.

²⁰ Nghoidloug we' ngoo gi Mangso da" yoem: so' mo yu joem ri yo" khaid thu' pyam yoomo Mangso da" mungdain: gi nanu" jang" moo juri" bye ziri si' loo: ge'.

²¹ Yoem: gyi: su: gi gyi zi gyi khoo: joeb sho' yo"- Nya: yhoem: ri zung" nyid nghoid rigi nya: da" ziyoo jonu" ri hang" ayo" re" vang lhoid yu wa.

²² Nghoidloug we' hau: youg tho' mo yoem: gyi: su: ju" loo lang" gi nyang: ri lo zain: oung: pyam lho: hau: yug myid loem: nyid da" gyi zi gyi khoo: dangain"- lhoid shoem" yu pyam wa. Yo" zain: yu da" ziyoo jonu" we' nya: da" bidnoem yi ri gam byid: pyam wa zi nghoid.

²³ Nga" thang: adab su: gi nga" gyivo thang: dab su: nghoid. Ngoo yo" dadeing: daloem: za: anghoid su: gi abyoo asain" nghoid nyid.

Yu Doem Vang Lo Da" khyoo:

²⁴ Yu gi byu dayug jang" mo thu' lo" lho: kyug kyi, ri da" joyoo moo nyang: nyid jang: sho: yen. Myenjham" joyoo ashau" shoo: lang" gi ngoo akhang:- ngoo nyang: nyid kho" da" yhoem: khyoo doem loo" wa" ga: tid.

²⁵ Houg: yoomo nyang: gi akhang: joyoo moo doem lo ri yung" yung" sain sain shoem" shoung: to" zi lo myang.

²⁶ Houg: lang" nya: tho' aje khyeing" da" yu- nyhed yug doem khe: loung: lho: hau: joyoo moo doem jha" nyid. Houg: yoomo yu vang ci: su: da" aved asam" gi xang: shid" tho' re" je yau: lo" ga: tid.

Deung Main" Da" Ngei Pyo: Khyoo:

²⁷ Yesu gi hid: su" bain tid da" thang: ri byu phung: moo" mo myiyi: dayug gi nang ri khu: lho: noug" jhoug da" myiyi: gi kha: yhi' ngei: pyo: lha"» ga: tid.

²⁸ Houg: nghoid loug Yesu gi Mangso da" mungdang: ri shau" gyo: lho: cang loo" su: gi hau: tho' re je ngei: pyo: ga: tid.

Mau" Pho" Alhoo: Again Toin" Shed Wa Mho' Da" Kyoo

²⁹ Byu phung: moo" gi lheing: khoem: to" da" uri Yesu gi He: pyaid mo byu yi gi gye" akhyeing" ashoeb boem nhung: lha". nyangnu" gi alhoo: again toin" shid wa shid' re" da: mho' nyid ago". Nghoidsho' loug Yona da" alhoo: again mo led lho: gootu: ce" alhoo: again ri we' nyangnu" ri pya shug wa zi anghoid.

³⁰ Nineve byu yi shid' moo Lapi: Yona gi alhoo: again bue" nyid ziyo' dakhyoo" ti"- he: pyaid mo byu yi shid' re" we' Byu da" nya: zoo: gi alhoo: again bue" loo wa.

³¹ Moug: pyi: shoid mo khokham" myhi, gi Phajhi" boo su:- Sholumon da" dang: ri shaug" gyoo: wa shid' re" nya: mung" mo jure. Akhid" hid: moo gi Sholumon tho' je gyi: zigi ju" nyid bye. Houg: yoomo tarha" dang: kho" da" bidnyid ri moug: pyi: shoid mo khokham" myhi gi to' lo lho: houg: bang: ri yooboo foin: dang: kho" wa zi nghoid.

³² Nineve voo byu yi gi Yona kho" kyo" mungdang: joem yoomo nyangnu" yooboo joem mo nheigloem: thid' boem da. Akhid" hid: moo Yona tho' je gyi: zi ju" nyid bye. Tarha" dang: kho" da" bidnyid moo Nineve voo byu yi gi to' lo lho: He: da" byu yi ri yooboo foin: dang: kho" wa zi nghoid ga: tid.

Gung Du: Da" Bid' Bang:

³³ Byu yi gi myibung: ri tab lho: alhoung nghoeb to" yu Lain" wigi we' azhoung" lhoung: to" yu. Yhoem: khoug: moo vang loo mo myo, myang wa shid' re" myibung: ki" jang: moo dalhoung: ke" to.

³⁴ Myojid" gi gung du: da" myibung: yhangti" nghoid. Myojid" ge nghoid ri re" gung goin" bang nyid. Nghoid loug we' myo, amyang nghoid rigi-re" gung goin" moug coid jo.

³⁵ Houg: yoomo:- nanu" moo bo da" bidbang gi moug coid abue" loo" wa shid' re" zed" nyid ge'.

³⁶ Re" gung goin" gi coid jo, zi dajhi' we' aboo loo- bang jo, nghoid rigi myibung: gi doug bang da" bidbang yo"- Re" tho' moo thoin" pang byid: yhangti" Nanu" da" dagung goin" gi doug bang jo, wa zi nghoid ga: tid.

Yesu Pharishe Yi Yo"- Tarha" Sara: Ri: Yooboo Foin: Khyoo:

³⁷ Yesu houg: su" ga: bain tid lo" thang: rigi Pharishe dayug gi Yesu ri nyang yo' dage' voem: zoo wa ga: khe.

³⁸ Nyang: gi hau: youg yhoem: moo yhe: lho: zoobue" moo zhoung: jo. Voem: azoo: shi" da" uri Yesu gi lo, acid" ziri pharishe myang lang" gye" mau" nyid ago".

³⁹ Aseing: gi Nanu" pharishe gi oug" khu joem ri atho' moo za: gye yung" sho' mhoin" cid" nghoid loug we' Nanu" da" nheigloem: khoug: moo gi akhyeing" ashoeb aco' ajhoid ziyo' byeung" jo, ago".

⁴⁰ Akhyeing" da" byugang: yi we"- nghe: shoid ri phain" to" da" Aseing: gi akhau: shoid ri we' bo phain to" anghoid goo" la".

⁴¹ Houg: su" nghoid loug we' Nanu" da" bain khu, moo bo ziri sho" jhen: mo ri byid: pyam ge'. Houg: lang" zi dangain" gi Nanu" shid' re" dangain" gyeungshang: loo wa.

⁴² Pharishe yi nanu" gi joem: loo" goo" wa. Nanu" gi nghang" pho, nyoug yu: fu- shabain sheing: nham: mo ju sho' to xi: boem mo daboem da" alu: kaid boem nghoid loug we' myonhoo: khyen: ziyo'- Mangsoo ri jheddab deung main" khyoo: aboo. Nanu" gi daxi: boem mo daboem da" alu: kaid zi za: anghoid. Myo, nhoo: akhyen: ziyo'- Mangsoo ri loem: khau gyoug phau" khyoo: we' bo koid: tho.

⁴³ Pharishe yi nanu" gi joem: loo" goo" wa. Nanu" da" tarha" jung yi moo we' reng: da" joyoo moo we' zhung: nau. Kid" khoug: moo we' sube" wi- lhoem: phau" myang: wa ziri vho: ngei yen" ago".

⁴⁴ Nanu" gi joem: loo" goo" wa. Nanu" gi ci: azhug xoem" to" da" loeb yo" du nyid. Byu yi gi hau: loeb khuang" tho' khyo" nang: led: lo" da" uri loeb nghoid zi lang" ase' boem ga: tid.

⁴⁵ Tarha" sara: dayug gi Sara: moo" we' nang hid su" ga: kho" kyo" zigi ngoonu" ri keing" da" dang: danghoid ga: tid.

⁴⁶ Yesu gi Nanu" tarha" sara: yi we"- nanu" we joem: loo" goo" wa. Ayo" voin da" yoovoin ri nanu" soin lho: subi" ri voin nhang. Nanu" nyang: gi hau: yoovoin ri lo, vhu" we' azang" thoung" yu" boem.

⁴⁷ Nanu" joem: loo" goo" wa. Nanu" da" nya: phoug" nya: phyid" yi said' kho" da" Lapi: yi da" shid' re" nanu" gi loeb ri koid.

⁴⁸ Houg: su" nghoid ri nanu" da" phoug" phyid" yi shoid vhang: too" khare" moo" moo nanu" we' bo veing" bo zei: mo nghoid bye. Nanu" da" phoug" phyid" yi gi Lapi yi ri said lho: nanu" gi loeb koid: nyid mo, nghoid.

⁴⁹ Houg: su" nghoid yoomo Mangsoo gi nya: nyan: phajhi" yo" tid zigi Byu yi moo Lapi: yi yo" lagyoo: yi moo ngoo nhang: kaid wa dayham" ri nyangnu" shen" yhen lho: dayham" rigi said pyam wa nghoid ga: tid.

^50-51 Houg: su" nghoid yoomo Abela mo he: Noku yhoem: moo" khoug: ju" sho' phoin: da" agyoo: moo said pyam lid lo" da" zakhari moo ju" sho' Mougmyid phain" da" nyid" mo he: gu: said pyam da" Lapi: yi suid" yoomo he: pyaid mo da" byu yi gi yooboo dang: kho" zi shau" wa nghoid. Hau: da" moo" dangain" shid' re" he: pyaid mo da" byu yi gi yooboo dang: kho" shen" yhen zi deung" deing shau" wa ein: ngoo tid ga: tid.

⁵² Tarha" sara: yi nanu" gi joem: loo" goo" wa. Nanu" gi se' da" nyan: phajhi" yhoem: mo, khoem" soo" zo, ri yhoem" to" lho: wigi nanu" nyang: we' avang lho. Vang loo" noug mo, ri we' toem to" boem ago" ga: tid.

⁵³ Yesu da" nhoid mo tid shoid da" yooboo- kha: myho, bo bye: zi si' wa shid' re" cang myid: lhu: tau: yen" boem bye.

⁵⁴ Nyang: ri yo" kuang myheig wa da" dang: thu' ri" sho' khyoo: aja: ja: khyo" pyi: sho: nyid boem.