KOLOSE 4 - Lacid Common Language Bible

¹ Yhoem: seing: yi we"- nasnu" we' moug: khung: tho' moo Aseing: dayug nyid ziri myid boin: zoore"- nyang: tu: nya: da" join, yi ri dei nhang: zo: nyid da" khyoo: moo yu" tu, lho: tarha" ziyo' nyeung veung" dain: khyo" dakoid nyid ge'.

Akhyooo" Shed Kaid' Da" Khyoo: Joem

² Anoo: loo- atheing: loo: akyu" damho, nyid ge'. hau: tho' moo gootu: nanu" akyu" mho' khyoo: moo zed" zoore"- Mangsoo ri jeju" daboin: nyid ge'.

³ Aseing Yesu da" no, thang mungdang: ri yo" kho" kyoo" wa shid re" amyeing" akhang" akhyoo" ayo, ge zi Mangsoo gi nyhang" ri byid: baja" ngoonu" shid re" we' akyu" dabo mho' nyid ge'- Khasu" wim gari Khristu da" no, thang mungdang: ri kho" kyoo" yoomo akhid" ngoo gi thung moo loung" jo.

⁴ Ngoo kho" kyoo" eung: ziyo' dakhyoo" ti"- bang bang yo" kho" kyoo" wa shid re" akyu" bo mho' nyid ge'.

⁵ Nanu" yo" yu da" amyeing" akhang" ri goolhoo: zoo: ci: yhoung: lho: aloem" ajeung" bang: yo' zoem" khau: uri-phajhi" bo nyid ge'.

⁶ Nanu" tid da" dang: khoin" joem gi-khanham we' gyo: da" dang: yo' myid' loem" zi nghoid baja"- nyangnu" doem, myed: da" dang: khoin: joem ri jo da" dang: phuid: yo" byid: sho' xei, too" ge'.

Lo" Thang Mo vhu" Kaid' Ziyo' Main, Kaid Byid: Da" Dang:

⁷ Nanu" da" jheddab mang nhung" phoo- kyed, da" moo" voin, su:- Aseing: da" moozoo" jid: zoo" moo bo pang" bo thoug da" dei zoo: nghoid da" Tukhiku gi ngoo yo' sen: da" lu dang: dangain" ri nanu" jhang tid kyoo" wam: bye.

⁸ Ngoonu" dangain" bang: khasu" bue" nyid boem da" khyoo: nanu" ri tid kyo" ziyo' nanu" da" nheigloem: emyid joem ri yoem: foin, byid: zi shug: goo" baja"- ngoo, gi nyang: ri nanu" jhang khyoo: nhang: kaid' zi nghoid.

⁹ Nya: tho' moo je" wigi nanu" jang" mo nghoid da-gye" kyed, da" jheddab mang nhung phoo- Onesimo ri we' ngoo nhang: kaid' bye- nya: eig yug gi hid: moo bue" khyoo: dangain" ri nanu" jang moo tid kyoo" goo" wa su.

¹⁰ Nga" da" thung: loung" luzoem" cang"- Aristaku we' nanu" ri vhu" kaid- hau: lho: Barnaba da" zoo: oug: Marku we' nanu" ri vhu" kaid' (Nanu" jhang khyoo: Marku ju" re" lo uri lhoem: tau, yu byid: ge' ein: tid kaid' da" khyoo: joem ri) nanu" yo" yu too" gu nghoid bye.

¹¹ Yustu ein: we' myheung to" da" Yoshu we' nanu" ri vhu" kaid' hid: bang: seom" yug za: Mangso mungdain shid re" ngoo yo' dage" moo" voin, da" byen, cang" -loem" jeung" da" Yuda byu yi nghoid ago"- hid: bang: gi ngoori gye" bo pang" thoug bye: mo, nghoid ago".

¹² Nanu" jang" mo nghoid da" Khristu da" join, phoo'-Epaphra gi nanu" ri vhu" kaid' da-nanu" gi loem" jeung da" khyoo: moo geung: teung jo, wa ziyo' nheig boo ung: gyeung: ziyo' jhug zug da" Khristain yi bue" loo sho' Mangsoo vho: ngei khyoo: ri khyag cang: lho: nyang: gi nanu" da" shid re" gye" loem" jeung" myid' yo' akyu" mho' nyid.

¹³ Nyang: gi nanu" da" shid re" we' Ladoki yo' Herapoli moo nyid bang: shid re" we' moozoo" ri ashid: asoo" yoem: kaid' nyid zigi ngoo gi nya: shid re" sagsi: kham, byid.

¹⁴ Nga" da" jheddab moocid" sara: Luka yo' Dema gi nanu" ri vhu" kaid' ago".

¹⁵ Ladoki moo nyid da" mang nhung" yi yo' ludaid' myhi, Numpha nya: yhoem: moo shau" go" wigi noku da" phung ri bo vhu" byid: kaid.

¹⁶ Hid: foin: kaid' da" mougsoug" ri nanu" bain' nghab yu lang" Ladoki phung byu yi ri we' nghab nhang: kaid' ge'- Houg: yo' dakhyoo" ti"- Ladoki phung: ri foin: kaid' mougsoug" ri we' nanu" nghab yu" ge'.

¹⁷ Hau: Aseung: moozoo" ri voin, vu, wa shid re" nang ri ab, byid: to" da" yoovoin, ri bain' sho' zei: we' ein: wigi Arkhripo ri bo tid kyoo" byid: ge'.

¹⁸ Ngoo Polu nyang:- nga" lo, yo' he: da" vhu" kaid' mougsoug" ri lhid" kaid' zi nghoid - ngoo gi thung: moo loung" jo, uri we' nanu" ato" myhed, pyam goo" lhe"- Mangso jeju" gi nanu" yo' dage" dabo jo, baja".