KOLOSE 3 - Lacid Common Language Bible

¹ Nanu" gi Khristu yo' dage" doem dei to'' loo bye: ziri shau" kham: yu boem, bye: yoomo Mangsoo, yo shoid mo nya: Khokham" zhung: tang moo zhoung: jo, da" Khristu nyid da" moug: khung: mo zi joem ri nheig danhei: nyid ge'.

² Moug: myid tho' moo jo, da" zi joem ri anghoid loo: za: moug: khung: tho' moo jo, da" ziyoo joem moo nheigloem: zug jo, ge'.

³ Khasu" wim ga: ri nanu" gi shid: bye: mo, nghoid- nanu" da" kangso' gi Khristu yo' dae"- Mangsoo moo yheom" shoung: to" boem bye.

⁴ Re" da" kang: so' gyeing" gi Khristu nghoid lho: nyang: doem, thu' myang lo da" uri nang we' nyang: yo' dage" thu' myang lo wigi nya: myonhoo: phung" yoeb, ri bo shau" kham: yu wa zi nghoid.

Kang: So, Dei Khyoo: Axoug" Yo' Aseig

⁵ Houg: yoomo nanu" da" akhoug: moo bo da" aved, avhu: moo"- myo, jang anyau, da" moo"- nyam, da" moozoo"- akhyeing" ashoeb, khyoo: yo' vhoo: boo loug gyi: da" khyoo: gi soolhoo: no" da" khyoo: daja: nghoid- hau: ziri said' pyam' boem ge'.

⁶ Houg: yhang: te" da" khyoo: joem ri koid nyid boem yoomo nyang: ri atam" gyoo: bang: da" atho' moo Mangso da" nheig khoo" yo: khyoo: gi ju" ri" wa zi nghoid.

⁷ shid' phyang" mo nanu" da" kangso' khyoo: bain' sho' moo hau: khyoo: joem wigi nghoeb, oung: ci uri gi nanu" nyang: we' houg: yhang: te" da" yooboo ri koid lho: wigi kangso' dei lid lo boem bye.

⁸ Akhid" koem gi nheig yo: zi nheig no, nyang: yo: khyoo: anoug angei da" nheig loem-yooboo ri xoem" to" khyoo: sube" da" gei, sang: shang pyang: ziyo' khoin" co' loeb, khyoo: ri nanu" da" nhoid mo athu' nhang: loo: go.

⁹ Nyang: cang" nyang: -mhau' da" dang: ri atid nyid lo go"- khasu" wim ga: ri ri byu xoug" yo' dage" hau: da" akyang joem ri nanu" khyoid pyam' lho: gung du: aseig zhoug yu boem abye: go.

¹⁰ Phain" so: to" da" Aseing: Mangsoo gi hau: byu seig ri Mangsoo nya: da" alhoo: aved' yo' je" je du goo" sho' khanham we' daso koid daso' nyheung nyid houg: su" so' koid so' nyheung: khyoo: gi nanu" gi hau: Aseing: ri joeb, byeung" sho' se' loo wa shid mo nghoid.

¹¹ He: khyoo: yoomo Yuda byumyu" yi yo' Heleni byumyu" yi gi athang: yham" kham' su: yo' akham' su: siyoo soogam: byu yi-byu kyang: byu lam" joem- join, yi yo' loid byoin, byu yi ga- nyangnu" da" akhoug: moo kho' go" koin, nyid wa khyoo: ajo, loo- Khristu gi nanu" dangain" bang: tho' moo-je" yhoug: gyen: su: nghoid wigi nanu" dangain" bang: yo' dage" nyid nyid.

¹² Nanu" gi Mangso byu yi nghoid boem bye: yoomo nyang: gi nanu" ri jheddab wigi nya: shid re" khyen: yu shau" bang: nghoid- houg: yoomo nanu" gi jhed' thang kang: athang- nheig khyeig shoo" myen: zi nheigloem: nyhoem: zi sam" dab, nu" nham, ziyo' nheigloem: gyi: sheung: ziri void. ci: ge'.

¹³ Nanu" mo dayug yug da" atho' moo yooboo foin: jang: jo, nghoid rigi nyang: cang" nyang- kham, zeing: go" ziyo' nyang: cang" nyang: yooboo ri khyoid pyam' byid: go" nyid ge'- hau: Aseing: gi nanu" da" yooboo ri khyoid pyam' byid: bye: ziyo' dakhyoo" ti"- nanu" nyang: cang" we' yooboo ri khyoid pyam byid: goo" ca" nyid.

¹⁴ Hau" yoem: so' dangain" da" atho' moo joeb, byeung" da" nheigloem: shikain" shoin" khyoo: bue" loo sho'-houg: dangain" tho' moo ziyoo jo, moo jo, ri yo" myeug deung: da" jhed' khyeing: kang: khyeing: ri pug void ci: ge'.

¹⁵ Khristu byid: da" ngei pyo: khyoo: gi nanu' da" nheigloem: ung: khoug: moo davhoeb, khang" nyid wigi houg: gi nanu" myid phyed' pharan da" khyoo: moo khyoo: shed' vhu" she: nyid baja"- khasu" wim ga: ri hau: ngei pyo: da" khyoo: ri shau" kham: zoo wa shid re" Mangsoo gi nanu" ri gung du: daloem: za: khyo" khe: yu bye: yoomo jeju" ri boin: so" nyid ge'.

¹⁶ Khristu da" mungdang: gi nanu" da" nheigloem: khoug: moo byeung jo, nhang: ge'- phajhi" byen- ya jo, moo jo, yo' nanu" nyang: cang" jhoug" goo" mhoo, goo" ge'. coung" nghei dang- Jikhoin" nghei, coung" dang: joem- venyi yo' sen: da" lid' jhoem" dang: joem yo' nanu" da" emyid, khoug: moo Mangsoo ri jeju" boin: ziyo'-coung" nghei nyid ge'.

¹⁷ Houg: yoomo nanu" ce" moo" thu' nghoid loug we' mung main: khyoo: moo we' moozoo" jid: zo" khyoo: moo we' Aseing Yesu myeing ri lang: lho: dangain" ziri dakoid nyid wigi nya: khoug: khyo" phoo mangsoo ri jeju" daboin: so" nyid ge'.

Kangso' Khyoo: Seig Moo Dayug Yo' Dayug Zoem" Khau: Khyoo:

¹⁸ Yhoem: seing: myhi' we"- nyang: nya: da" yhoem: seing: pho, tid khyo" cang nyid ge'- hau: khyoo: gi Khristain byu dayug khyo" wigi hau: Aseing: moo cang yhe: loo" wa du, da" khyoo: nghoid.

¹⁹ Yhoem: seing: pho, we' nanu" da" yhoem: seing: myhi' ri jheddab nyid wigi nyangnu" ri anoug akhyoid' pyi: sho: da" dang: ri atid nyid goo.

²⁰ Zoo: shang: mi" we"- ce" ja: khyoo: moo we"- re" myhi, yo' re" pho, da" dang: ri khanham we' datam" gyo: nyid ge'- hau: khyoo: gi Khristain yi cang zei: loo" eung: da" moo" nghoid - Khasu" wim gari hau: khyoo: gi Mangsoo vho: da" khyoo: nghoid.

²¹ Myhi, phoo yi we"- nanu" da" nya: zoo: yi ri nheigloem: aze" sho" nyid goo"- houg: su" koid lang" nyangnu" gi nheig nge yoem: gyau: lo" byug boem wa zi nghoid.

²² Join, yi we"- nanu" da" xangsu: yhoem: seing: yi ri khyoo: khaid khang" moo" moo tam" gyoo: byid: nyid ge, nanu" gi myonhoo: shoo: nau, ziyo' nyangnu" shid' moo dang: tam" gyo: khyo" akoid loo: za: Aseing: ri gyoug phau" zoo re" nyangnu" da" dang: ri gyeungshang: ziyo' tam" gyo: nyid ge'.

²³ Nanu" gi ce" ja: koid nghoid loug we' byu shid' re" koid ti" anghoid loo: za: Aseing: shid re" koid yahg: ti"- nanu" da" nheigloem: emyid dangain" yo' yoem: kaid' nyid ge'.

²⁴ Aseing: gi nya: byumyu" yi shid' re" shoung: to" da" agyid asoo: ri jhung: shug khyo" wigi nanu" ri byid: zi nghoid ziri daboin: so" nyid ge'- khasu" wim ga: ri Khristu koem gi pang" zei: nyid da" Aseing: agyeing" nyang: nghoid bye.

²⁵ Adeung amain" khyo" koid nyid da" byu yug khang" moo" ri nyang: koid nyid adeung amain" da" moo" zo" shid re" latoo: doem, phoug zi shau" zoo: wa nghoid- khasu" wim ga: ri Mangsoo gi tarha" dang: phyed khyoo: moo myonhoo: khyen: nyid su: anghoid.