KOLOSE 2 - Lacid Common Language Bible

¹ Ngoo gi nanu" shid re" we' Ladoki byu yi shid re" we' ngoo yo' myonhoo: ashau" myang go" yu" da" gootu: byu yi shid re" we' ngoo khayhi' yoem: kaid' voin, wu, lid loo: bye: da" khyoo: nanu" ri ngoo tid kyoo" ba.

² Hougsu" ngoo yoem: kaid' voin yu, da" khyoo: gi nyangnu" dangain" tho' moo myo, yang" da" nheigloem: yo' joeb, byeung" wigi dayug yo' dayoung da" jheddab da" emyid moo-tei" xo' go" lo" ziyo' nyangnu" gi deingmain" da" lasi, phajhi" mo myo: tham: da" nheig shid: nheig deig khyoo: ri nyangnu" yo" yu wa shid re" nghoid- hougsu" wi nyangnu" gi-he: khyo" wigi Mangso zau" yheom" to" da" no, thang phajhi" ri se' gyo: lo boem wa nghoid hau: phajhi" gi Khritstu nyang: nghoid bye.

³ Nyang: gi Mangsoo nghoeb, too" yhoem" to" da" phajhi" byen-ya yo' lasi, phajhi" soidgain' dangain" ziri phang byid: da" khoem" thoug" nyang: nghoid nyid.

⁴ Xo, lho: ngoo nanu" ri tid nau zigi gye" jo yhang: ti" du nyid nghoid loug we' shoid da" ngeug se: dang: khoin" joem yo' hang" wigi we' nanu" ri ajhu, phyo' nhang: pyam goo.

⁵ Khasu" wim gari ngoo nanu" yo' ngoo nya: gung du: nyang: dage" ashau" nyid nghoid loug we' Venyi khyo" nanu" yo' dage" nyid nyid zi nghoid yoomo nanu" da" geung: teung yoem: kaid' nyid da" nheigloem: yoem: vhoo" yo' Khristu ri loem" jeung" khyoo: moo dage" yab, jo, ziri ngoo yu" gau nyid.

Khristu Mo Joeb, Byeung" Da" Kangso' Khyoo:

⁶ Nanu' gi Khristu Yesu ri Aseing: ga: wigi lhoem: yu bye ziyo' dakhyoo" ti" -nyang: yo' dage" deung: shoin" lho: kangso' dei nyid ge'.

⁷ Jhau" mho' ziri kham: yu bye: ziyo' dakhyoo" ti"- nyang: moo agyi: no" no, cen, lho: nyang: moo yha" da" kangso' dei khyoo: qei" to" wigi nanu" da" loem" jeung" khyoo: ri je" geung: teung jo, nhang: ge'. jeju" ri coung" nghei myid' nanu" moo byeung" jo, baja".

⁸ Khristu da" akhyoo" shed' to" ziyo' dakhyoo" ti"- anghoid loo: za: byu xangsu: yi da" akhyoo" shid' khyoo: mo thu' da" jhau" shed' dang: joem yo' dei moo dei nyid moo nyid ri vhoeb khang" da" yu join: joem jang" mo thu' lo da" jhau" shed' dang: nghoid da" ce" akyu" we' abo mhau' fain" da" xangsu: phajhi" yo' hang" wigi we' nanu" ri join, akoid nhang: pyam' goo"-zed" lhid" nyid ge'.

⁹ Mangso da" joeb byeung" layung gung gi-xangsu: gung du: nghoid da" Khristu moo bo jo.

¹⁰ Nanu" gi nyang: yo' shoin" deung: to" jang mo joeb byeung" da" kangso' riyo" yu boem bye- hau: nyang: vhoeb khang" da" venyi dangain" yo' amyeing" akhang" yoo" bang: dangain" mo, da" atho' moo je" gyi: lho: myhang: thang su: nghoid nyid.

¹¹ Nanu" gi hau: Aseing: yo' dadeing: daloem za: bue" lho: wigi kangso' dei da" uri athang: yham" khyoo: ri kham: yu bye: nghoid nyid hau: zigi byu yi da" lo, wigi koid zi anghoid loo za: he: yooboo dab, da" gung sho" yoem: so' mo lhoid pyoin, kaid' ein: da" Khristu wigi ze" bui" byid: da" athang: yham" khyoo: nghoid.

¹² Nanu" gi Babtisma kham: yu da" bidnyid ri nyang: yo' dage" myhoeb, pyam' zi shau" wigi Khristu ri shid: jang" mo doem dei to' loo nhang: Mangso da"-yoem: moo" ri loem" jeung da" laloem, lakhoug: yoomo Khristu yo' dage" dei to'' loo nhang: zi shau" boem bye.

¹³ Nanu" gi shid' phyang" venyi moo shid: mang nghoid nyid ago- khasu" wim gari nanu" gi yooboo koid da" tung: to" tarha" ayo" da" tung: bau byumyu" yi nghoid ago- nghoid loug we' akhid" Mangsoo gi Khristu yo, dage" dei da" khyoo: khyoo: shu" loo" bye-

¹⁴ Mangsoo gi yha" da" yooboo dangain" ri khyoid pyam' byid: wigi. Nyang: gi yha" da" anghoid akhuang da" yoobo jhen: zhayen" ri we' houg: yo' sen: da" tarha" joem ri we' pyang" zeing tho' moo ten" zei: yo' baid' jen" tab' wigi shoem" shoung: pyam' byid: bye.

¹⁵ Hau" da" pyang" zeing tho' moo Khristu gi vhoeb, khang" da" venyi joem amyeing" akhang" yoo" mo, ri-oung: pyam' wigi nyangnu" ri thung: byu bui" nhang: pyam' lho: oung: doid' loo" bang: yain: so" lo" jang" mo cang so" loo" nhang: ziyo' byu dangain" bang: wigi coem, yu" zi shau" da" byu yi bue" loo" nhang: pyam' bye.

¹⁶ Hougsu" nghoid yoomo zoo: noem shug noem, yo' sen: khyo" we' ayo, bidnyid moo cang lho: lhoo, xain" nyid" yo' gyeungshang: Bidnyid mo pui" joem yo' sen: lho: hang" wigi we' nanu" ri yoobo dang: aphyed' nhang: go".

¹⁷ Houg: yhang: te" da" khyoo: dangain" gi ju" lo da" ayo, moo bue" thu' loo wa da" khyoo: joem da" ayoeb, abang za: nghoid nyid agung gyeing" nyang: gi Khristu nyang: nghoid nyid.

¹⁸ Ladu lid' sho' shoid vhang: da" khyoo:- nyang: tu: nya: da" gung du: ri khyo, nyhoem: pyam' wa ziyo' moug: lagyoo: yi ri no" ca" ga: goozu: xen, da" yoeb, myang yo" we' shoid vhang: da" khyo, nyhoem: khyoo: moo nyhen" zei: nyid bang: yo' moug: lagyoo: yi ri noku da" khyo" we' nyang: nya: gung du: ri dangain" tho' moo je" nghoid thang su: ga: khyo" tid phau: nyid mo, -hang" su: wigi we' nanu' ri yoobo dang: phyed' wa da" akhang" abyid: goo"- Houg: yhang: te" da" byu yi gi ce: sei abo da" xang: su: myid soin: khyo" nyang: nya: gung ri tid phau: yu lho.

¹⁹ Gung du: da" vhuloem nghoid nyid Khristu moo xo' nhei: khau: nghe: jang" mo phoug pyeug loo" mo, nghoid ago- Khristu vhoeb, khang" da" akhoug: moo dagung goin" gi hau: da" youg: xeig youg: myo, yo' shoo" gyi: youg: khyang: joem wigi myheug shoin" to" lho: khu: gyi: kaid' ziyo' Mangsoo myid vho: khyo" gyi: sheung: loo wa nghoid.

Khristu Yo' Shed: Lho: Dei Nyid Khyoo:

²⁰ Nanu" gi Khristu yo' dage" shid: byug boem bye: nghoid yoomo jo, moo jo, ri seung: nyid da" venyi joem khoug: mo lhoid pyoin, kaid' ziri shau" boem bye- houg: su" nghoid rigi ci: yoomo nanu" gi he: mougmyid da" join, yi yhang: ti"- kangso' dei nyid go" la".

²¹ He: ziri ajham" yu"- he: ziri azang" thung goo", ga: da" tarha" ri datam" gyo: nyid shigo" la".

²² Hau" tarha" joem dangain" gi dalheing: ci: yhung: bye: thang: rigi ce: akyu" aboo lo: ziyo' sen: da" tarha" za: nghoid lho: byu xangsu: yi koid thu' da" tarha" ri jhoug" byid: khyoo: joem za: date: nghoid.

²³ Houg: yo' dakhyoo" ti"- moug: lagyoo: yi ri agyoo: ayoid noku nhang: da" khyoo: we' nyang: nya: gung ri shoid vhang: khyo" khyo, nyhoem: khyoo: moo we' hau: da" taha" joem gi phajhi" bo yhang: ti" du nyid nghoid loug we' gung shoo" vho: da" nyam, nheigloem: ri vhoeb khang" khyoo: mooce" akyu" we' aboo nghoid da.