HOSEA 7 - Lacid Common Language Bible

¹ Nga" byumyu" Israela ri ngo wigi noo byang" byid: nau uri yo' nyangnu" ri doem yoo" zoo: yoo" shug nhang: nau khang" moo" ngoo shau" myang zigi nyangnu" da" akhyeing" ziyo' nyangnu" koid da" akhyeing" ashoeb da" moo" za: nghoid da:. Nyangnu" gi nyangnu" nyang: cang" mhoug fain" zoo: go" da:. Yhoem: khoug: khyoo: ceig vang yhe: wigi khoug" zo: ago". Nyangnu" gi khyoogung moo byumyu" yiri khyangtoug: koid ago".

² He: akhyeing" ashoeb moo" zoo" ri ngoo myid boin: wa ga: ziri nyangnu" nheigloem: moo khanham we' avang nghoid da:. Nghoid loug we' nyangnu" da" yooboo joem gi nyangnu" ri lheing khoem to" da:. Houg: lho: nyangnu" ri amyang sho' ngoo ayo" jang" pyam nghoid da:.

Khokham Kho" moo Byen Phyoo" Gau" Sham: Khyoo:

³ Aseing gi «Mung" byu yigi nyangnu" da" akhyeing" ashoeb da" khoug: lheing: lheing: wigi khokham yo' nya: gyizoug: yiri mhau' fain" pyam ago".

⁴ Nyangnu" dangain" gi mhau' fain" ziyo' jhug azug mo, nghoid ago". Nyangnu" da" ngheing" zigi myikhyoem moo" mo myi: yo' du da:. Hau: myi: gi zooyho' bung: su: zooyho' bung: wa jen" jen" nghoid sho' alhu: zhang" kaid da" myi: yo' du da:.

⁵ Khokham da" pui" bidnyid moo nyangnu" gi khokham phoo yo' nya: gyizoug: phoo yiri yhid: jhug lho: zabyid yhid: wigi yed nhang: ago".

⁶ Nghoid- nyangnu" gi myikhyoem moo" mo myi: yo' dakhyo" nyangnu" da" khoug: lheing: lheing: da" moo" moo nge" nyid boem ago". Nyangnu" da" nheig yo: zigi damyen goin" myi oem" oem" bo" da:. Houg: lho: nab kyoo' re" ri myiyham: nge" dab thu re" da:.

⁷ Nyangnu" da" nheig yo: zigi lung re" wigi nyangnu" gi nyangnu" da" vhoebkhang" bang: ri said pyam ago". Nyangnu" da" khokham yigi dayug bain thang: dayug khau" said pyam shau" ago". Nghoid loug we' pang" thoug yu wa shid re" nga" jhang hang" we' akyu" amho' nghoid ago"» ga: tid da:.

Israela yo' Byumyu" yi

⁸ Aseing gi «Israela byumyu" gi phoid gyam to" da" zooyho' da loem: yo' du da:. Nyangnu" gi nyangnu" da" aqei: ayam mo byumyu" yiri myid nghe: lho:

⁹ Tungbau yiri khau: nghe: zigi nyangnu" da" yoem: ri lhoid yu pyam ziri aboin: soo" nghoid ago". Nyangnu" da" bidnyid joem gi thang jo, bye:- Nghoid loug we' nyangnu" gi hau: ziri si' lang" asi' goo" nghoid da:.

¹⁰ Israela byumyu" yi da" nghoid boin: zigi nyangnu" ri gyi tau" koid theing nyho: nyid ago". Hougsu" ja: khang" moo" bue" lid loo nghoid loug we' nyangnu" gi nyangnu" da" Ngoo Aseing Mangso jhang khyoo: atau" loo nghoid ago".

¹¹ Israela gi nheig agyeing: da" jid: u yo' dakhyoo" myonhoo: sho: lheing yen" da:. Xang: shi" moo nyangnu" gi Egutu khyoo: pang" thoug yu wa yhe: mho' da:. Hau: thang: nyangnu" gi Asuri jhang tang" yhe: ago".

¹² Nghoid loug we' ngoo gi goin kham: to" wigi nyangnu" lid lo" uri ngho' joem ri yhang: ti" myheig yu wa. Ngoo gi nyangnu" ri nyangnu" koid lid loo bye: da" akhyeing" ashoeb moo" zoo" joem yoomo yooboo dam byid: wa.

¹³ Nyangnu" gi joem lo" abye:.Nyangnu" gi ngoo ri too" kho' wigi ngoo ri thougtheung gyi koid ago". Nyangnu" gi said toem" pyam zi shoug" loo wa. Ngoo gi nyangnu" ri khyoid yu noug nghoid loug we' nyangnu" wigi ngoo ri ajoo aeung: khyo" noku loo bye:.

¹⁴ Nyangnu" gi ngoo ri nheigloem: phyu: ziyo' amho' boem nghoid ago". Nghoid loug we' hau: gungthid nyangnu" gi nyangnu" da" gung ri pyam lheing: kaid lho: tungbau yi yhang: ti" kougshu: yoid ngoug ago". Shivoo: yo' zabyid yhid: re" akyu" mho' uri tungbau byu yi yhang: ti" yham" khyam" wigi nyang: nya: gung ri dam tab yu ago". Nyangnu" gi gye" thougtheung gyi koid mo, nghoid ago".

¹⁵ Ngoo gi nyangnu" ri khu: gyi: lho: nyangnu" ri yoem: boo nhang: yug nghoid sho' nghoid loug we' nyangnu" gi ngoo ri thougtheung gyi khau" koid da:.

¹⁶ Nyangnu" gi nga" jang" mo vi: khyoo: phang: lo" wigi ce: yoem: so' abo da" yu phara" jhang yhe: ago". Nyangnu" gi adu da" lid: yhang: ti" loem age" da" bang: nghoid da:. Nyangnu" da" vhujhung: yigi nghoid boin: dang: tid yoomo nyangnu" gi mi: shid: shid loo goo" wa. Houg: lho: Egutu byu yigi yi juang" byid: goo" wa» ga: tid da:.