HOSEA 2 - Lacid Common Language Bible

¹ Houg: yoomo re" Israela mang: nhung" yiri «Mangso byumyu" yo' ‹Aseing wigi' jheddab bang:› ein: khi: we'» ga: tid da:.

Jhug Azug Da" Gome- Jhug Azug da" Israela

² Nga" zoo: yi we"- re" nham: ho' nya: myhi' gi nga" yhoem: seing: myhi' anghoid loo:. Ngoo we' nya: yhoem: seing: phoo anghoid loo- nghoid loug nyang: ri coem' jhoug" tid ge'. Nyang: ri myi shoid lang shoid moo" yo' shava myhi' akoid wa shid re" bo coem' jhoug" tid we'.

³ Nyang: atheing: nghoid rigi ngoo gi nyang: ri khu: re" da" bidnyid moo gung cen khu: re" ziyo' dakhyo" ngoo gi nyang: ri byimi khyoid pyam byid: wa. Ngoo gi nyang: ri myid kyug myid gang: yo' dakhyoo" ti" koid pyam wa. Houg: lho: nyang: gi gyid shed lho: shid: lo" byug wa.

^4-5 Ngoo gi nya: zoo: yiri nheig khyeug myid aci: shug wa. Nyangnu" gi sho' ase' da" shava myhi' da" nya: zoo: yi nghoid ago". Myiyi: myhi' nyang: nyang: gi «Ngoo vho: ngei bang: jang" khyoo: yhi: wa. Nyangnu" gi ngoo ri voem: yo' gyid- soug" goug" yo' zin: yung" pain" gi zhainloin: xu: yo' zabyid yhid: byid: ago"» ga: tid nyid.

⁶ Houg: yoomo ngoo gi nyang: ri zu: kyen: pung yo' kyam' pyam lho: nya: khyoo: moo vang khyam: koid xau' pyam wa bye:.

⁷ Nyang: gi nya: vho: ngei bang: jang" khyoo: cang khaid yhi: wa nghoid loug we' nyangnu" ri cang myhi: wa zi anghoid. Nyang: gi nyangnu" ri cang sho: nghoid loug we' nyangnu" ri ashoug" wa. Hau: thang: nyang: gi «Ngoo gi xang: shi" mo nga" yhoem: seing: pho jang" khyoo: doem tau" loo" wa. Ngoo gi nyang: yo' dage" nyid zigi akhid" tho' mo je ge da» ga: tid loo wa.

⁸ Nyang: gi nyang: ri shivoo:- zabyid yhid:- zhainloin: xu: yo' nyang: Bala ri no' da" uri nyang: ngei" byid: da" ngei yo' sheing: dangain" gi ngoo byid: zi nghoid ga: ziri khanham we' yhen: yu zi anghoid.

⁹ Houg: yoomo gug zoo shivoo: yhoem" yo, ri ngoo gi nga" jhungshug shivoo: yo' zabyid yhid: ri doem tau" yu pyam wa. Nyang: ri byimi shid re" ngoo byid: to" da" soug" goug" yo' zin: yung" pain" gi ri doem yu pyam byid: wa.

¹⁰ Ngoo gi nyang: ri nya: vho: ngei bang: da" shidkhoin" moo byimi khyoid pyam byid: lho: gung cen: koid pyam byid: wa. Nga" lo, yoem: so' mo nyang: ri hang" dayug we' are" yo" khyoid yu wa.

¹¹ Ngoo gi nya: pui" joem nghoid da" zain khang" moo" mo pui"- lhammoo" khyab khang" moo" mo pui"- Dougno: Bidnyid pui"- noku thung" khyo" foem: phung: da" pui" dangain" ri thang loo" nhang: wa.

¹² Nya: da" vho: ngei bang: ri nyang: wigi dei byid: da" aphoug" khyo" nyangnu" wigi byid: to" zi nghoid ga: tid da" nya: zabyid nei joem yo' nya: lafoem shigam joem ri ngoo phyo' shoin' pyam byid: wa. Ngoo gi nya: da" zabyid khyam: joem yo' shi" khyam: joem ri siyoo bui" nhang: pyam wa. Siyoo gougnyhoug joem wigi hau: gu: ri phyo' shoin' pyam byid: loo wa.

¹³ Nyang: gi nya: vho: ngei bang: jang cang loo" wa shid re" Bala ri nam pyo: ja: nghe' ngei" byid: lho: phoug" dab sheing: ziyoo void da" uri ngoo ri to" myhed pyam yoomo nyang: ri ngoo yooboo dam byid: wa. Aseing tid abye:.

Nya: Byumyu" yi Shid re" Aseing da" Jheddab Myid.

¹⁴ Houg: yoomo ngoo gi nyang: ri dain" pyoid yoo khyoo: doem shu" yhi: loo wa. Hau: joyoo moo ngoo gi nyang: ri jheddab dang: khyo" doem tid oung: yu wa.

¹⁵ Ngoo gi nya: zabyid khyam: joem ri doem byid: wigi yau: khe" janggyoin: ri we' myid byu wa khoem" moo" duang: bui" nhang: wa. Hau: joyoo moo nyang: gi goonham' Egutu mo nyang: phang: lo da" ayo, nyang: ngi shi" uri yo' dakhyo" ngoo ri doem phoug" myang: loo wa.

¹⁶ Hau: thang: nyang: gi ngoo ri nya: yhoem: seing: phoo khyo" doem ji loo wa. Nyang: gi ngoo ri nya: da" Bala ga: amyheing loo wa.

¹⁷ Ngoo gi nyang: ri Bala da" myeing ri khanham we' atid thu nhang: loo: wa.

¹⁸ Hau: ayo, moo ngoo gi siyoo gougnyhoug yo' ngho' joem dangain" ri dang: theing to" lho: nyangnu" gi nga" byu yiri dam atab goo" wa. Ngoo gi hau: mung" mo gyi zain: wa gyi jonu" dangain" ri yu pyam byid: wa. Shamcoin" dangain" yo' lid: dangain" ri yu pyam byid: lho: nga" byumyu" yiri yug yo ziyo' goem loem nyid nhang: wa.

¹⁹ Israela we"- ngoo nang ri nga" yhoem: seing: myhi bui" nhang: wa. Ngoo gi deingmain" wigi jhug zug wa. Ngoo gi nang ri abei abyo, da" jheddab myid yo' nheig khyeug ziri ci: shug byid: wa. Houg: lho: nang ri apyaid atoo: moo nga" re" bui" nhang: wa.

²⁰ Ngoo gi nga" dangsoo" ri zoem: ci: wigi nang ri nga" re" bui' nhang: wa. Houg: lho: nang gi ngoo ri re" Aseing khyo" kham: yu loo wa.

^21-22 Hau: ayo, ri ngoo gi nga" byumyu" Israela da" akyu" mho' thui: ri gyoo: byid: wa. Ngoo gi myidgung moo moug: vo khyoo' nhang: wa. Houg: lho: myidgung gi shivoo: zabyid yo' zhainloin: ri thu nhang: loo wa.

²³ Ngoo gi nga" byumyu" yiri hau: moug: moo de: nyhed: to" lho: nyangnu" ri nyid di nhang: wa. Ajheddab yug ein: myheig pyam bye: bang:- nga" byumyu" anghoid ein: myheing pyam bye: bang: ri ngo wigi jheddab myid ci: shug byid: wa. Ngoo gi «Nanu" nga" byumyu" yi nghoid» ein: tid wa Houg: lho: nyangnu" gi «Nang gi ngoonu" da" Mangsoo nghoid da» ga: tu" loo goo" wa.