HOSEA 1 - Lacid Common Language Bible

¹ He: mungdang: gi Yuda mung" mo Uzia- Yotham- Ahaza yo' Hezekia bang: khokham bue" wigi Israela mung" moo Yehosha da" nya: yuggi zoo: Yeroboam khokham bue" da" ayo, gyoo: moo Beri da" nya: yuggi zoo: Hosea ri Aseing wigi byid: da" mungdang: nghoid da:.

Hosea da" Yhoem: Seing: Myhi Yo' Nya: Zoo: Yi

² Hosea khyo" Israela byumyu" yiri Aseing wigi xang: shi" dang: tid uri nyang: gi Hosea ri «Yhoem: seing: myhi' yhe: yu we'. Re" yhoem: seing: myhi' gi jhug azug su: nghoid wa. Houg: lho: re" zoo: yigi nyang: yo' dakhyoo" ti" nghoid loo goo" wa. Houg: yo' dakhyoo" nga" byumyu" yigi ngoo ri too" kho' lho: jhug azug bang: bue" ri" goo" wa» ga: tid da:.

³ Houg: yoomo Hosea gi Dibla da" myiyi: nu" Gome ga: su: ri lo, xo' yu da:. Nya: tang: zooshid" yuggi zoo: dayug khu: thang: ri

⁴ Aseing gi Hosea ri «Nyang: ri Yezerela ein: myheing byid: we'. Ciwim ga ri Yezerela moo Israela khokham da" phoug" phyid" Yehu wigi byu said da" gang mo Israela khokham ri yooboo dam byid: wa amyang" loo. Ngoo gi Yehu da" khokham byuxeig ri thang nhang: loo: wa.

⁵ Yezerela janggyoin: moo hau: ayo, ri Israela da" gyi yoem: ri ngoo phyo' shoin' pyam wa» ga: tid.

⁶ Gome gi eig yug ein: da" zooshang: doem yo" da:. He: lheing: gi myiyi: nu" nghoid da:. Aseing gi Hosea ri «Nya: myeing ri ‹Ajheddab› su: ein: myheing we'. Ciwim gari ngoo gi Israela byumyu" yiri jheddab myid aci: shug byid: loo wa. Nyangnu" da" yooboo ri we' akhyoid byid: loo wa.

⁷ Nghoid loug we' Yuda byumyu" yiri gi jheddab myid toin" shed byid: wa. Ngoo nyangnu" Aseing Mangsoo gi nyangnu" ri khyoid yu wa nghoid loug we' ngoo gi hau: ziri meing: zain: khyo" akoid wa. Shamcoin"- Lid:- myoo: khaid- myang: yo' myang: jui: bang: ri aci: wa» ga: tid da:.

⁸ Gome gi nya: myiyi: zoo: ri noug" bain kang" thang: ri gung doem lid: re" lho: yuggi zoo: dayug doem yo" da:.

⁹ Aseing gi Hosea ri «Nyang: ri ‹Nga" byumyu" anghoid› ein: myeing byid: we'. Ciwim ga ri Israela byumyu" gi nga" byumyu" anghoid. Ngoo we' nyangnu" da" Mangsoo anghoid» ga: tid da:.

Israela ri Doem Tu: To' Wa

¹⁰ Israela byumyu" yigi panglai: mo midcoo: yhang: ti" atho' nghab- atho' leig loo: sho' myo: loo goo" wa. Akhid" Mangsoo gi nyangnu" ri «Nanu" gi nga" byumyu" anghoid» ga: tid. Nghoid loug we' danyid" nyid" rigi «Nanu" gi Dei nyid da" Mangso nya: zoo: yi nghoid» ga: tid wa bidnyid ju" loo wa.

¹¹ Yuda byumyu" yi yo' Israela byumyu" yigi dadeing: daloem: za: doem bue" byug loo goo" wa. Nyangnu" gi nyangnu" shid re" vhujhung: dayug ri za: khyen: yu loo goo" wa. Houg: lho: nyangnu" gi nyangnu" da" mougmyid moo dalheing: dam gyi: sheung: lho: nyid gi yab ge yoo" zoo: yoo" shug loo goo" wa. Nghoid bye:. Yezerela bidnyid gi bidnyid zeing danyid" nghoid loo wa.