HEBRE 9 - Lacid Common Language Bible

Moug: myid' Mo Mo, Yo' Moug: Khung: Mo Mo, Noku Coung" Nghei Khyoo:

¹ Xang: shed" mo dang: soo" to" da" thang" cab, moo noku coung" nghei khyoo: bo nyid ziyo' dakhyoo" ti"- byu lo, yo' koid da" noku joyoo we' jo, ca" wa nghoid.

² Khasu" wim gari gyeungshang: da" joyoo ga: da" xang: shed" pyaid moo noku zoem" daloem: koid to" boem. Houg: mo xang: shed" yab, moo myibung: ki" jang: yo' Mangsoo ri xoin" to' byid: zooyho' ke" da" zoobui" jo, jo.

³ Hau: lho: eig loem: ein: da" pain" xiyam, da" akhau: shoid moo gyeungshang: thang da" joyoo ein: da" zoem" jo, jo.

⁴ Hau: jang" moo nam, pyo: ja: nghe, nghei" byid: da" sheing: yo' koid to" da" phoin: yo' dagung goin" sheing: yeing shoin" da" Dang: Theing Kuid: bo jo. Hau" kuid: zei: khoug: moo Mana' zooyho' bo da" dibu: we' afu' nu" toid' lo nyid da" Arun da" lham: dung: we' tung: to" tarha" lhid" to" da" lug yho' eig khyab, we' bo jo.

⁵ Hau" soodeug da" atho' moo- dung eig khyab, dab, da" Kherubim soolhoo: eig khyab, jo wigi Mangsoo bo zung" nyid da" aved, ri thu nhang: boem. Nyangnu" da" dung joem ri youg: noo yooboo ri khyoid pyam byid: joyoo ein: da" soodeug amyhid" tho' moo pyo: nghoeb, to" boem.he: da" dangkang: ri jid" nug nug phoid: kho" nyid aca" loo.

⁶ He: da" noku coung" nghei byid: da" thung" ri yo' dakhyoo" ti"- azi akhoo: ri bain' jhoeb, to" thang: ri khainjung agyi yi gi nyangnu" da" noku shu" vhu" she: da" moo" ri voin, vu, wa shid re" zoem" khoug: mo xang: shed" ju" vang lo" da" yab, moo nyid" khang" moo" vang lo" nyid boem.

⁷ Nghoid loug we' zoem" khoug: mo noku joyoo moo koem gi khainjung agyi gyi: thang su: za: nya: shid re" we' mung" byu yi asi aboin: loo: shoid vhang: da" yoobo shid re" we' xoin" to' byid: da" suid" ri ci: lho: dazain' ri dalheing: za: date: yo" vang lo.

⁸ Hau: da" thung" yo' dakhyoo" ti"- xang: shed" ju" vang lo" da" yab, goin" dageung: jo, jo, gi gyeungshang: da" yab, khyoo: khoem" aphang shi" wa da" khyoo: hau: gyeungshang: da" venyi gi bang bang jhoug" byid: nyid.

⁹ He: da" khyoo: gi he: pyaid mo da" khyoo: ri toin" shid nyid dang: tu, daloem: nghoid nyid Hau: da" dangkang: gi Mangso jhang khyoo:- ngei" byid: nyid da" jhung: shug jhung: lang: yi yo' gougnyhoug xoin" du: joem gi noku coung" nghei su: da" ung: khoug: nheigloem: ri yo" joeb, byeung" loo" nhang: wa zi anghoid.

¹⁰ Hau: gu: gi zoo: noem, shug phoo" yo' ced" yung" ced" lho, da" thung" aja: ja: yo' sen: lho: wigi zei: da" khyoo: za: nghoid nyid. Hau: gu: giMangso wigi aseig dioem nyheung so' da" apyaid' aju" shi" uri byam, koid to" da" atho' pyam: yo' sen: da" cang yhe: loo" wa tarha" thung" ri nghoid nyid.

¹¹ Nghoid loug we' Khristu gi akhid" nyhang" yo" kham, zo: nyid bye: da" nyid ge nyid de, loo wa khyo: da" khainjung agyi moo" khyo" nyang: ju" ri" bye. Nyang: noku xoin" ngei" byid: da" zoem" gi lo, wigi akoid to" da" he: phain" too" shau" da" mougmyid yo" asen: da" je" gyi: lho: joeb, byeung" da" noku zoem" nghoid nyid.

¹² Khristu gi gyeungshang: da" joyoo khoug: khyoo: - pyaid mo too: mo shid re" dalheing: dam- bain' sho' vang lo" da" uri xoin" ngei" byid: wa shid' re" shoobaid' suid"- nujung lo: suid" ri aci: vang loo" loo: za: Nya: da" suid" yo' vang lo" wigi ngoonu" shid re" apyaid' atoo: mo khyoid yu khyoo: ri yo" yu nhang: bye.

¹³ Shoobaid' suid" nujung lo: suid"- myi: moo nghe, pyam bye: nujung nu" da" myimoeb, yo' aco' ajhoid bue" da" byu yi tho' moo noku coung" nghei da" thung" tarha" yo' dakhyoo" ti"- byeug shoin" gyoin: kaid' ri-ayung" asain lo: da" byu yi ri yo" ced" yung" ced" lho, zi dadeung nghoid rigi

¹⁴ Khristu da" suid" gi hau: tho' mo je" wigi yo" ced" yung" ced" lho, byid: zi anghoid goo" la". Khristu gi hau: apyaid' atoo: mo venyi yo' nya: da" gung du: ri ce" noo abo da" xoin" khyo" wigi Mangsoo ri ngei" byid: pyam bye. Dadei nyid da" Mangsoo ri ngoonu" yo" noku coung" nghei sho' Khristu da" suid" gi ngoonu" da" nheigloem: e" myed ri akyu" abo da" noku loem, khau: khyoo: moo cang lo" jang" mo yo" ced" yung" ced" shang: yu byid: bye.

¹⁵ Khyoo: he: khaid khyo" Mangso khe: yu zi shau" bang: gi Mangsoo nyang: dang: soo" khoin" byid: too" bye: da" apyaid' atoo: mo mainkaid jeju"- shau" kham: yu boem baja" ga: Khristu gi dang: thang" cab, aseig rinyheing byid: bye. Hougsu" kham: yu wa da" amyeing" akhang" ri yo" yu da" khyoo: gi xang: shed" mo da" dang: theing khoin" akhoug: moo nyid uri shoid vhang: lo" da" youg: noo yooboo mo khyoid lhoid kaid' wa shid re" shid: kham, khyoo: dakhaid bue" thu loo yoomo nghoid bye.

¹⁶ Agyid asoo: yo' sen: da" dang: soo: khoin" ri bue" thu' loo nhang: wa da" shid re" dang: theing go" too" bye. Gyeing" nyang: shid: bye: khyoo: sagsi: ri toin" shid' ca" nyid.

¹⁷ khasu" wim gari dang: soo" too" su: dadei nyid shi" uri gi dang: soo" age bui" shi"- dang: soo" too" su: gi shid: lo" thang: rishe,- hau: dang: soo" khoin" gi dageung: jo.

¹⁸ Houg: su" nghoid yoomo xang: shed" mo dang: theing khoin" lang" ri suid" ci: lho: dageung: teung jo.

¹⁹ Xang: shed" ri Moshe gi tung: to" tarha" moopyeung: to" khyoo: dangain" ziri byumyu" yi ri bain tid kyoo" lang" gi ne" da' yan, moug" yo' husub, seig kung: riyu lho: nushain: lo: suid" shoobaid suid" joem yo' gyid yo' cam" wigi tarha" mougsoug" deing: moo we' byu yi dangain" ri we' byeug sain" gyoin: kaid' da.

²⁰ Hau: thang: ri nyang: gi ‹‹He: zi gi nanu" tam" gyo: lho: cang yhe: loo" wa shid re" to" da" dang" theing khoin" ri dazid' baid' lho" geung: teung jo, nhang: da" suid" nghoid ga tid.

²¹ Houg: yo' dakhyoo" ti"- Moshe gi noku zoem" khung: tho' moo we' noku coung" nghei uri ci: da" zi joem dangain" da" atho' moo we'-hau: suid" yo' byeug sain" gyoin: da.

²² Toung: to" tarha" yo' dakhyoo" ti" ga: rigi-ziyoo jo, moo jo, alug bain sho' ri suid" yo' yo" ced" yung" ced" shang: loo nhang" wigi suid" shoin: byid: khyoo: khyo" za: youg: noo yooboo ri yo" khyoid pyam byid: nyid.

Khristu Ngei" Byid: Da" Xoin" Khyo" Za: Yooboo Yo" Khyoid Byid:

²³ Mougkhung: moug: di tho' moo akhang: re jo' gu zi joem yi da" la: du- hau: khyoo: khyo" za: yo" ced" shang: gyeung yu nyid. Nghoid loug we' Moug: khung: mo zi joem ri nyang: gi je" ge da" xoin" to' byid: ziyo' yo" ced" shang: byid: ca" nyid.

²⁴ Khasu" wim gari Khristu gi gyeing" nyang: gyeungshang: joyoo gyeung" da" ladu nghoid - byu yi da" lo, wigi koid to" da" gyeungshang: joyoo moo avang loo" loo: za: moug: khung: khyoo: nyang: vang lo" wigi akhid" yha" da" gung thid' Mangso shid' khoin" moo thu' myhang loo" bye.

²⁵ Yuda khainjung agyi moo" gi gougnyhoug suid" ci: lho: hau: gyeungshang: da" yab, moo zain' khang" moo" vang lo". Nghoid loug we' Khristu gi nya: gung du: rimyoo" sho' lheing: xoin" to' ca" nyid zi anghoid.

²⁶ Houg: su" xoin" myo" sho' lheing: dato' nyid ca" shi" nghoid rigi mougmyid' ri phain" shed" jang" mo nyang- myo" sho' lheing: doem: shid: kham: kham: koid nyid wam: bye. Akhid" koem' gi mougmyid pyaid thang wa zi jhang lo nyid uri pyaid didu shid mo dalheing: dam, bain sho' nya: gung du: ri xoin" to' pyam' bye: ziyo' youg: noo yooboo ri shoem" shoung: pyam byid: bye.

²⁷ Xang: su: byu yi yug khang" moo" gi dalheing: za: shid: lo" lho: hau: thang: ri Mangso da" dang: phyed zi shau" shi" wa nghoid.

²⁸ Houg: yo' dakhyoo" ti"- Khristu we' byu yi myoo" sho' mo, da" youg: noo yooboo joem ri pyaid didu shid' re" dalheing: dam, bain sho' nya: gung du: ri xoin" du: koid lho: to' ngei' byid: pyam bye. Yooboo ri bo voin, pyam byid: wa khyoo: yo' asen: loo: za: nyang: ri dalang" nyid mo, ri khyoid yu wa shid re" eig lheing: ein: lheing: moo doem, thu' myang loo wa zi nghoid nyid.