HEBRE 7 - Lacid Common Language Bible

Khain: Jung Phoo, Melkhizedeg Da" Khyoo:.

¹ He: da" Melkhizedeg gi salem voogung mo khokham" yo' Myhang: thang da" Mangso khainjung agyi phoo nghoid. Khokham" myid: yug ri zain: ong: lho: Abraham doem ju" lo da" uri Melkhizedeg gi nyang: ri lhoem: tau, yu lho: main, kaid' byid.

² Abraham we' nyang: ci: lo da" zi yoo joem mo xi: boem, mo daboem gi Melkhezedeg ri byid: da. (Melkhizedeg ein: da" myeing dangkang: gi Deing byeung" da" khokham" nghoid wigi Salem Khokham" ga: zigi Ngei bu da" khokham" ein: da" dangkang: nghoid.)

³ Melkhizedeg da" nya: myhi' nya: phoo- byu kung: byuko' byu jhung" ri we' Nyang: khu: lo ziyo' shid: lo" da" mhoo: myid: ri we' agyo: yu" amyang yu" yoomo nyang: giMangso da" nya: zoo: yo' du, nyid wigi pyaid moo too: moo danyid nyid da" khainjung phoo nghoid.

⁴ Nya: da" dain' thu nya: phoug" nya: phoo Abraham gi Gyipui" mo yo" yu lo da" dangain" jang" mo daxi: boem mo daboem- Melkhizedeg ri xoin" to' byid: nghoid rigi houg: yhang: te" xoin" to' byid: zi rikham: yu su: gi khayhi' gyi: su: nghoid ein: ziri nanu" myid soin: yu" ge'.

⁵ Khain: jung aya: yo" yu da" Levi nya: myid: nya: zoo: yi gi Abraham da" akung: ako' mo byo gyo" loo bang: nghoid loug we' nyang: nya: da" mang: nhung"- Israela byumyu" yi lang" gi daxi: boem, mo daboem: ri kuid: yu wa shid mo hau: toung: to" da" tarha" moo tid too" bye.

⁶ Melkhizedeg gi Levi amyu" mo anghoid loug we' Abraham jang" mo daxi: boem, daboem, ri kham: yu lho: Mangsoo jang" mo dang: soo" khoin" yo" yu ci: da" Abraham ri main, kaid' byid: bye.

⁷ Main kaid' byid: su: gi main, kaid' byid: ziri kham: yu su: tho' mo je gyi: su: nghoid zigi ci: ngeig goo" wa khyoo: ajo.

⁸ Khain: jung agyi yi khyo" daxi: boem, mo daboem da" alu: ri kuid: yu zigi shid: loo" se' da" byu yi jang" mo nghoid nyid nghoid loug we' Melkhizedeg yu da" daxi: boem mo daboem gi jhoem: mungdang: moo tid to" ziyo' dakhyoo" ti" dadei nyid su: kuid: yu da" xi: boem mo daboem nghoid.

⁹ Xi: boem mo daboem: da" alu: ri kuid: yu da" Levi byumyu" yi gi Abraham da" lo, khyo" wigi daxi: boem mo daboem ri Melkhizedeg ri byid bye- ein: we' yo" tid bye.

¹⁰ Khasu" wim gari Melkhizedeg gi Abraham ri lhoem: tau yu da" uri Levi akhu: ri" shi"- nya: phoug" Abraham da" phyid" doem: moo dabo jo, shi ein: wigi yo" tid nyid.

¹¹ Israela byumyu" yi ri hau: toung: to" da" tarha" byid: uri Levi da" akung: ako' mo khainjung aya: moo apoem: ayang: qei" lho: byid: too" bye. Akhid" Levi da" byumyu" akung: mo khainjung aya: ri joeb byeung" sho' yo" voin, vu, deung" deung nghoid rigi Arun da" gung thid' Melkhizedeg da" aya: ri kham: yu da" khainjung goo" tu dayug thu loo anoo" loo.

¹² Khasu" wim gari hau" khainjung aya: ri dayo" thed' pyam nghoid rigi hau: toung: to" da" tarha" we' yo" thed' pyam wa zi nghoid.

¹³ Hid: akhid" tid nyid ziyo' sen: su:- ngoonu" da" Aseing: gi Amyu" goo" tu: yo' sen: su: nghoid wigi hau: amyu" mo hang" we' khainjung dayug khyo" wigi khanham we' phoin: tho' moo xoin" ri ngei" yu" zi anghoid.

¹⁴ Aseing: gi Yuda byumyu" mo khu: thu' lo zigi bang bang nyang nghoid nyid Moshe gi khain: jung yi yo' sen: lho: wigi tid uri Yuda byumyu" da" mhoomyid: ci" we' atid too.

¹⁵ Melkhizedeg yo' du go" da" gootu: khain: jung- dayug thu loo yoomo khainjung amyu" thed' lo" byug bye: zigi je" bang thu' loo bye.

Melkhizedeg Yo' Du Go" Da" Gootu: Khain: Jung.

¹⁶ Hau: yug gi Khain: jung aya: moo byu wigi nyheung soin' to" da" akhyoo" again khyo" cang lho: aya: tang: too" shau" su: anghoid.Athang agoin da" kangso' yoem: moo" khyo" tang: too" shau" su: nghoid.

¹⁷ Khasu" wim gari jhoem: mungdang: moo (Nang gi Melkhizedeg da" aya: moo xo' lho: wigi apyaid' atoo: mo khainjung dayug bue" loo wa ga: tid to.

¹⁸ Xang: shed" mo da" tarha" gi yoem: neung: lo" lho: akyu" aboo loo: yoomo dangain" shoem" shoung: pyam zi shau" nyid bye.

¹⁹ Khasu" wim gari Moshe da" tarha" gi ce" ja: khyoo: moo we' joeb, byeung" sho' yo" koid bue" khyoo: ajo- akhid" koem gi hau" toung: to" da" tarha" da" gung thid'- je" ge da" nheig byu joyoo yo" byid: bye: yoomo ngoonu" gi Mangso jhang khyoo: yo" yu: tain" vang lo" boem bye.

²⁰ Hau: tho" moo gootu- Mangsoo thang" cab to" da" dang: jo, shi"- hau: lho: gootu: bang: gi jham, tang: zi aboo loo: za: khainjung aya: moo tang: to" zi shau" ago".

²¹ Nghoid loug we' Yesu gi jham, tang: to" dang: yo' khainjung bue" loo bye. Mangsoo nyang: ri tid zigi (Nang gi apyaid' atoo: mo khainjung bue" loo wa" ga: wigi hau: Aseing: gi datheung tid bye: yoomo Nyang: tid to" dang: ri yoeb, yu loo: wa zi anghoid, ga: wigi tid.

²² Hid: yhang: ti" aya: kham: yu jang" moo shai" go" nyid yoomo Aseing Yesu gi je" ge da" dang: khoin" ri koo" kham: kham: byid: su: bue" loo bye.

²³ Hau: lho: wigi-shai" go" khyoo: gootu: boo shi"-khainjung aya: ri kham: yu da" khainjung gootu: myoo" sho' yug boo shi"- nyangnu" gi shid: lo" da" khyoo: ri ayo" jang" pyam' boem yoomo nyangnu" da" moozoo" ri ayo" xo' zei: loo" nghoid ago".

²⁴ Nghoid loug we' Aseing Yesu gi apyaid' atoo: mo kangso' dei nyid su: nghoid wigi nya: da" khainjung aya: we' byu dayug yug da" lo, moo yo" thoid' vang loo" wa zi anghoid.

²⁵ Hougsu" nghoid nyid yoomo-nyhang" gi nyang: ri loem, nghe: khau: lho: Mangso jhang khyoo: yu: tain" vang loo bang: ri-khanham we' khyoid khyu: yu wa da" yoem: moo" bo nyid. Khasu" wim gari" nyang: gi nyangnu" nya: shid re" -Mangso jang" moo mho' tung" bain: byid: wa shid' mo khanham we' dadei nyid.

²⁶ Hougsu" wigi Aseing Yesu gi ngoonu" moo bue" nyid da" ca" vho: khyoo: joem ri pang" byid: thug byid: wa ngoonu" shid re" gye" yhoug: gyen: da" khainjung agyi moo" nyang nghoid bye. Nyang: gi gyeungshang: su: nghoid nyid wigi-nyang: moo shoid vhang: zi youg: noo yooboo ci" we' aboo. Nyang: gi yooboo yoo" mo, phung: moo aboo- gooki" led' da" moug: khung: moug di moo ju" sho' coung" nghei tu: to' kaid zi shau" su: nghoid.

²⁷ Nyang: gi gootu: da" khainjung agyi yi yhangti"-xang shed" ri nyang: tu: nya: da" youg: noo yooboo shid re"-nyid" khang" moo" xoin" nghei" byid: nyid wa ca" su: anghoid. Nyang: gi nya: da" gung du: ri xoin" du: koid lho:-xoin" to' byid: uri-dalheing: za: yo' bain' sho' ngei" byid: pyam bye.

²⁸ Moshe da" tung: to" tarha" gi-yoem: neung: lo" lho: ajoeb, abyeung" da" byu yi ri-khainjung aya: moo tang: too" byid. Nghoid loug we' toung: to" da" tarha" thu lo thang: ri apyaid atoo: moo joeb byeung" da" nya: zoo: ri Mangso dangtheung yo' thang" cab byid: wigi khainjung agyi zeung da" aya moo tang: byid: to" zi nghoid.