HEBRE 4 - Lacid Common Language Bible

¹ Akhid" Mangsoo gi ngoonu" ri ngei bu doug shau" no: khyoo: ri kham: yu nhang: wa ga: wigi byid: to" da" dang: theing khoin" jo, bye. Hau: dang: theung to" da" ngei bu doug noo: joyoo ri nanu" mo dayug we' ayo" yu mo, abui" goo" baja"- ngoonung" gung youg yau nyid boem.

² Khasu" wim gari ngoonu" gi goonham, mo mo, yo' dakhyoo" ti"- hau: ngei bu lu dang: seig ri shau" gyo: yu boem bye- Nghoid loug we' nyangnu" shau" gyo: da" ngei bu lu dang: gi ngoonu" shid re" ce" akyu" we' aboo- Khasu" wim gari nyangnu" shau" gyo" da" uri nyangnu" gi hau: khyoo: ri loem" jeung" myid' yo' alhoem: yu boem nghoid ago".

³ Loem" jeung" nyid mo, ngoonu" koem gi Mangsoo dang: theung to" da" ngei bu doug no: khyoo: ri shau" kham: yu boem bye. Hougsu" nghoid yoomo Ngoo nyangnu" ri nheig yoo: yoomo nyangnu" ri ngoo byid: wa ein: da" ngei bu myen, jham" da" mung" khyoo:- khanham we' ayo" vang loo" goo" baja"- ein: wigi ngoo dang: theung ziyo' nheung" too" bye ga: wigi nyang: tid nyid ziyo' dakhyoo" ti"- nghoid nyid. Moug: myid ri Aseing: nyang: phain" to" jang" mo wigi nyang: zei: ca" da" moo" ri dangain" zei: pyam bye. Nghoid loug we' nyang: dang: da tid nyid shi".

⁴ Khasu" wim gari jhoem: mungdang: dayoo moo nyhed nyid" da" bidnyid yo' sen: lho: tid to"- Mangsoo gi nyhed nyid" moo gi nya: moozoo" dangain" mo, doug no: nyid, bye.

⁵ He: khyoo: yo' sen: lho: doem, pug tid to" khyoo: gi ngoo byid: wa ein: da" ngei bu doug no: mung" moo nanu" khanham we' ayo" vang loo" goo" wa ga: wigi doem tid to.

⁶ Hau: da" ngei bu: lu dang: seigri xang: shed" shaug" gyoo: mo, gi hau" lu dang: ri aloem" jeung" boem yoomo hau: ngei bu doug noo: jang: moo ayo" vang lo" boem. Houg: su" nghoid yoomo hau" doug no: joyoo gi goo tu: da" byumyu" yi ri kham: yu wa da" akhang" byid: pyam bye.

⁷ Houg: su" yo" kham: yu da" khyoo: ri (akhid" nyid" ga: da" bidnyid goo" nyid" Mangsoo: doem nyheung xoem" too" byid: bye, ga: da" khyoo: dakhaid yo' sagsi: toin" shid ' nyid. Aseing: gi jhoem: mungdang: moo tid too" bye: ziyo' dakhyoo" ti"- zain, void, gye" myang" thang: ri David da" nhoid yo') Ngoonu" khuid" nyid" nya: da" thui: shau" gyo: boem nghoid rigi nanu" u" loem: athain: nyid loo: goo".

⁸ Mangsoo dang: soo" to" da" doug no: khyoo: gi Yoshu gi gootu: byumyu" yi ri bain byid: bye: nghoid rigi bidnyid gootu: danyid" khyoo:- Mangsoo gi thang: ri doem tid loo wa zi anghoid.

⁹ Hougsu" nghoid nyid yoomo nyhed nyid" ri mangsoo gi doug no: nyid yhang: ti"- Mangso da" byumyu" yi shid mo doug noo: wa da" bidnyid danyid" boo shi".

¹⁰ Khasu" wim gari mangsoo dang: soo" byid: to" da" doug no: khyoo: ri shau" kham: yu mo, hang" nghoid loug we' Mangsoo doug no: nyid yhang: ti"- nya: moozoo" mo doug shau" noo: wa zi nghoid.

¹¹ Hougsu" nghoid yoomo nyangnu" aloem" ajeung" jang" mo wigi doug noo: jang: moo ayo" vang lo" da" Israela byumyu" yi yhang: ti"- ngoonu" hang" we' houg: su" abue" loo" baja"- hau" doug noo: joyoo khyoo: yo" vang loo" wa shid mo yha" da" yoem: vhoo" bain' sho' yoem: kaid boem shang.

¹² Khasu" wim gari Mangsoo mungdang: khoin" gi dadei nyid ziyo' - sham: soo" eig shoid tho' lho: ce: ja" lhab, sham: tho' mo we' je, tho' jo.Hau: zigi kangso' venyi yo' nheigloem: shau" go" da" joyoo ju" sho' we' shoo" youg xeig yo' youg: khyang: khau: moo ju" sho' we' dangain" ziri yo" kho' khyam" lo" wigi byu yi da" e" myed nheigloem: khoug: mo myed soin' lo" khyoo: dangain" ziri dang: yo" phyed' pharan byid: nyid.

¹³ Mangsoo amyang asi sho' yo" yhoem" nghoeb, to" zi ci" we' ajo- jo, moo jo, dangain" gi nya: shid' khoin" moo diri cen: nghoid nyid wigi nyhang" zei: nyid da" moozoo" dangain" we' nyang: ri zhayen" ci: shug boem ca" wa nghoid.

Gyi Thang Khainjung Moo" Yesu

¹⁴ Hougsu" nghoid nyid yoomo ngoonu" yhen: yu lho: loem" jeing" bye: da" loem khau: khyoo: moo nheigloem: zug jo, shang- Khasu" wim gari Mangso da" shid khoin" moo khyang: vang loo" bye: Mangsoo da" nya: zoo:- Yesu ga: da" Khainjung zeing dayug- ngoonu" yoo" nyid bye.

¹⁵ Khasu" wim gari ngoonu" da" khainjung agyi moo" gi ngoonu" ca" nyid da" gung nham, yoem: nu: khyoo: ri nheig ase' khyeig su: anghoid- ngoonu" yhang: ti"- khyoo: khaid khang" moo" moo gung" lau" thoung" shau" yu" nghoid loug we' youg: noo yooboo akoid yu" da" khainjung moo" nghoid.

¹⁶ Hougsu" nghoid yoomo ngoonu" gi nheigloem: moo yoem: bo ziyo' Mangso jeju" zhung: tang shid' khoin" khyoo: yu: vang yhe: lo" boem shang. Houg: su" nghoid lang" gi ngoonu" ca" yo lo da" ayo, moo- ngoonu" moo pang" thoug da" je ju" joem ri shau" kham: yu boem wa zi nghoid nyid. .