HEBRE 3 - Lacid Common Language Bible

Yesu Gi: Moshe Tho' Je" Gyi: Su: Nghoid.

¹ Mangso khyen: khe: yu zishau" da" nga" Khristan mang: nhung" yi we"- ngoonu" yhen: kham: yu bye: da" noku thung" laloem lakhau: da" khainjung moo" zeung bue" loo wa shid re" Mangsoo nhang: kaid da" Yesu ri myid yu" ge'.

² Moshe gi Mangso da" yhoem: mo nya: moozoo" moo kyed koeb yhangti"- he: moo" ri zei: wa shid re" khyen: yu shau" su: we' Mangsoo moo jhug zug nyid.

³ Yhoem: daloem: ri zheung" zhoug too" su: gi hau: yhoem: tho' moo je" gyi: da" myonhoo: yo" nyid yhangti"- Yesu we' Moshe da" tho' moo je gyi: da" myonhoo: phung" yoeb yo' coung" byid: nghei byid: ziri kham: yu wa zi: moin: yi" nyid bye.

⁴ Yhoem: ga: zigi byu dayug yug wigi koid to" zi nghoid- jo, moo jo' ri koid too" su: koem gi Mangsoo nghoid nyid.

⁵ Moshe koem gi ju" lhoo wa ayo' Mangsoo tid kyoo" wa da" khyoo: joem ri sagsi: kham byid: wa shid re" Mangso da" yhoem: goin" jang" mo dei zoo: yhangti" jhug zug su: nghoid nyid.

⁶ Khristu gi Mangso yhoem: ri zung" da" nya: zoo: deung byeung" su: yo' kyed' su: nghoid nyid. Ngoonu" gi yoem: boo so' bo ziyo' nyhang" nya: da" gau yi nheig byu joyoo ri lo" thang moo ju" sho' nheig shid: nheig deug ziyo' geing: geing: teing teing nghe: khau: nyid boem nghoid rigi Mangso yhoem: byu yi nghoid boem wa.

Mangso Meing Byu Yi Da" Doug Noo: Joyoo

⁷ Hougsu" nghoid yoomo hau: gyeungshang: da" Venyi tid ziyo' dakhyoo" ti"- Akhid" nyid" nanu" Mangso dang: shau" gyo: nghoid rigi

⁸ Mangsoo ri gyi koid lho:-dain" pyoid yoo moo nyid yen" ayo, mo nyang: ri jham" yu" da" nanu" nya: phoug" nya: pho yhangti"-vhuloem athain: nyid loo: goo".

⁹ Mangsoo gi nanu" nya: phoug" nya: pho, - zain nyid myid: xi: zain goin"- dain" phoid yoo moo ngoo koid shug da" moozoo" ri myang boem nghoid loug we' ngoori thoutheung jham" ca: yu" nyid ago".

¹⁰ Hougsu" nghoid yoomo ngoo nanu" ri nheig yoo: nau wigi-nyang: gi khanham we ase lhed, zed" o"-nga" tarha" ri we' azheung: cang boem nghoid da: ein: ngoo nheung" too" bye.

¹¹ Ngoo nheig yoo: nau ziyo' nyangnu" gi ngoo nyangnu" ri byid: wa ein: da" doug noo: joyoo khyoo:- khanham we' ayo' vang lo" boem loo: wa ein:- ngoo nheung" too" bye.

¹² Loem" jeung" nyid da" mang: nhung" yi we"- dei nyid da" Mangso jang" mo vhang: lam" loo" sho'-akhyeing" ashoeb da" loem, shoid nheigloem: boo da" byu- nanu" moo dayug we' aboo loo: sho' zed" nyid ge'.

¹³ Nanu" mo dayug we' - youg: noo yoobo wigi mhau, mhed" jhu, phyo' zi shau" lho: nheigloem: thain: nyid da" byu yi abui" goo" baja"- Jhoem: mungdang: moo tid to" ziyo' dakhyoo" ti" - Akhid" nyid" ein: ngoonu" shid re" yo" tid nyid shi" da" ayo, bidnyid moo nyid" khang" moo" nyang: cang" nyang: pang" thoug go" nyid ge'.

¹⁴ Khasu" wim gari Khristain xang: shed" bue" lo da" uri yhang: te"- nheig shid: nheig deug da" loem, khau: khyoo: moo lo" thang bidnyid ju" sho' geing: geing: loem khau: nyid nghoid rigi nyhang" dangain" mo, gi Khristu yo' dage" dadeing: daloem: za: moo" voin, mo, nghoid nyid boem.

¹⁵ Jhoem: mungdang: moo tid to" khyoo: gi " Akhid" nyid" nanu" Mangso da" thui: shau" gyo: boem nghoid rigi Mangsoo ri nanu" da" nya: phoo nya: phoug" - gyi koid lo boem yhang: ti"- nheigloem: thain: nyid agoo" ga: tid nyid.

¹⁶ Mangso da" thui: ri gi shau" gyo: nyid lho: nyang: ri gyi koid nyid bang: gi hang" nghoid nyid boem lha". Nyangnu" gi Egutu meing: mo Moshe shu" thu' loo mo, dangain" bang: nghoid nyid ago".

¹⁷ Zain' ved, myid: xi: zain' goin"- Mangso nheig yo: zi thoung" shau" zo: nyid mo, gi hang" nghoid nyid boem lha". Houg: bang: gi yooboo koid lho: - dain" pyoid yoo moo leung shid: lo" byug mo, nghoid boem ago".

¹⁸ Nyangnu" gi ngoo byid: wa ein: da" ngei pyo doug no: mung" moo khanham we' yo" vang: goo" wa zi anghoid, ga: wigi hang" ri yeung lho: Mangsoo nheung" to" lha". Nya: dang: ri atam" gyoo: lho: gyi koid nyid mo, ri tid nyid zi anghoid goo" la".

¹⁹ Nyang: nu" gi aloem" ajeung" boem yoomo hau: mung" khyoo: ayo" vang lo" boem ziri ngoonu" myang se' boem bye. .