HEBRE 12 - Lacid Common Language Bible

Ngoonu" Da" Mangsoo

¹ Akhid" ngoonu" da" shid re" hid: myho, da" sagsi: joem gi ngoonu" ri jhoem: moug" su" thoem" lhoung too" bye. Houg: su" nghoid yoomo ngoonu" gi khyoo: moo lhu: phyo' lhu: keug lang" wa zi ja khang" moo" ri we' ngoonu" moo gye" geing: sho' kyen, dab, jo, da" yooboo joem ri we' shoem" shoung: pyam lho: ngoonu" gei, yhe: loo" wa soin' nyheung to" da" bain: zeing moo ju" sho' yoem: kaid' thoug shang" lho: gei, ju" lo" boem shang.

² Ngoonu" da" loem" jeung" khyoo: ri Apoem: mo aphyoo" thang loo" sho' joeb, byeung" nhang: su:- Yesu Khristu ri yu" zhug too" shang. Aseing: gi nyang: kham: yu wa nghoid da" hau: gau yi, ngei bu: khyoo: yoomo hau: pyang" zeing moo kham, shid: khyoo: ri asho' agyug loo za: kham: yu lho: akhid" Mangso lo, yo shoid mo zhung: tang moo lo" zhoung: jo, bye.

³ Yooboo yoo" mo, wigi atho' tid loo: sho' koid da" anoug angei khyoo: ri hau: Aseing: gi khayhi' gyeing" kham' zoo: bye: da" khyoo: ri nanu" bo myid yu" ge'. Houg: su" nghoid yoomo nanu" moo nheigloem: byo, yoin" gyoeb, gyo" khyoo: aboo goo" baja".

⁴ Nanu" gi yooboo yo' thoung" shau" zain: go" khyoo: moo akhid" nyang: said' pyam wa da" Laki, moo ju" sho' alhoem: theung shang" zain: yu" boem shi.

⁵ Jhoem: mungdang: moo Mangsoo tid to" zigi " Nga" zoo: we' hau" Aseung: wigi nang ri so' koid so nyheung uri tam" gyoo: we'. Nyang: nang ri gyi koid lho: jhau" mho' nyid uri nheigloem: abyo, ayoin" loo".

⁶ Khasu" wim gari Mangsoo gi nyang: jheddab da" bang: hang" ri we' jhoug" byid: mhoo, byid: wigi Nya: zoo: khyo" lhoem: kham: yu bang: dangain" ri shen" yhen se' nyid ga: wigi nyangnu" ri nya: zoo yi khyo" soin: lho: yoem: byid: tid sang: nyid da" dang: khoin" joem ri nanu" gi to" myhed' pyam' boem goo" bye: la".

⁷ Nanu" thoung" shau" nyid kyi" khyeug jam, jau khyoo: joem ri Nya: pho, jhoug" myeing" nghoid ein: khyo" wigi kham, zeung: nyid ge'- nanu" thoung" shau" nyid da" khyi" khyeig jamjau khyoo: joem gi nanu" ri Mangsoo gi nya: zoo: yi nghoid ga: soin: too" bye: ziri toin" shid' nyid. Nya: phoo ajhau" yu" da" nya: zoo: gi khayoo: nyid yu" lha".

⁸ Nya: zoo: nghoid mo, dangain" bang: thoung" shau" yu" yhang: te" da- khyoo: ri athoug" shau" yu" boem nghoid rigi nanu" gi zoo: gyeing" anghoid- neing: gyi yi za: danghoid boem wa.

⁹ Nanu" ri jhau" mhoo, byid: da" xang: su: nya: pho, ri phau" myang: nyid boem nghoid rigi ngoonu" da" Venyi yo' sen: nya: pho, vhoo: moo goeb, jo, boem lho: kangso' dei nyid boem ca" anghoid goo" la".

¹⁰ Xang: su: nya: pho, gi nyhang" ri dayo, daboin: za: nyangnu" gi, eung: ga: shau" myid boem ziyo' dakhyoo" ti"- jhau" mho' loo se' boem. Nghoid loug we' Mangsoo koem gi ngoonu" ge loo wa shid re" nyang: yhang: ti" young" gyeungshang: loo goo" baja" ga- ngoonu" ri jhau" mhoo, byid: nyid zi nghoid.

¹¹ Ngoonu" ri jhau" mho' zi thoung" shau" nyid uri gau yi cang ci: aboo- houg: su" jhau" mho' zi thoung" shau" nyid da" uri koug shu: ja: ti" nghoid loug we' hau: zigi thang: phyang: bidnyid ri houg: su" jhau" mho' akyu" ri shau" kham: yu yoomo tarha" cang yhe: da" byu yi bue" lo ziyo' deingmain" khyo" kang: so' dei aphoug" ein: da" ngei pyo: khyoo: ri yo" yu nhang: nyid.

Khyoo: Shed' ziyo' Lhid' Nhang: Khyoo:

¹² Hougsu" nghoid yoomo nanu" da" byau" lhang" to" lo, joem ri tu: to' kaid lho: nanu" da" yoem: aboo loo: nain" nyid da" poid' lug joem ri yoem: foin: thoug shang" to' loo" loo: ge'.

¹³ Dain: da" khyoo: moo daso" nyid ge'- houg: lang" gi yoin" jo, da" khyid: age so" yen" zi abui" loo: za: ge, yang" zain" lo boem wa zi nghoid.

¹⁴ Byu yug khang" moo" yo' ngei pyoo: tung" za: yo" zoem" khau: nyid sho' we' gyeungshang: da" kangso' dei khyoo: moo ju" loo" sho' we' cang sho: yoem: kaid nyid ge'. Khasu" wim gari hau: ja" jeju" yoem: vhoo" abo nghoid rigi hang" we' hau" Aseing: ri shau" myang wa zi anghoid.

¹⁵ Mangsoo jeju" mo nung phoug lo" zi abui" baja" zung" lhug goin, coung: nyid ge'. Kho" da" seig gyi: youg gyi: lo lho: nya: da" dug yo' jamjau myoo" sho' byid: yhang: ti"- nanu" ri we' houg: su" abui" baja" zed" lhed' nyid ge'.

¹⁶ Aved age ziyo' Venyi laloem lakhoug: abo mo, voem: damyo: da" shid mo nya: mang: mo" aya: ri ung" zo: pyam da" Eso" yhang: ti"- nanu" hang" moo we' abui" baja" zed" nyid ge'.

¹⁷ Nanu" nyang: se' nyid bye: ziyo' dakhyoo" ti"- thang: rigi nya: pho, jang" mo mainkaid byid: da" jeju" ri yo" yu noug nghoid loug we' nyang: ashau" yu loo. Khasu" wim gari nyang: koid shoid lid loo bye: da" khyoo: ri doem, so' nyheung koid wa shid re" ngoug byid' thu sho' phe: sho: yen" nghoid loug we' ashau" myang yu loo.

¹⁸ Nanu" gi Israela byumyu" yi yhang: ti" - lo, yo' nyang: shau" zei: yu" da" myi: nge" nyid teing: yo' no, da" moug: coid khoug: moo ug moo" lid' moo" hau, nyid da"

¹⁹ Laboo" myeung ziyo' thui: zeing myeung lo da" Sina, boem moo nanu" ju" lo" yu" boem zi anghoid. Na nu" gi hau: soin: yoid, thui: shau" gyo: uri gootu: dang: dakhoin" we' ashaug" gyoo: loo: baja" ga- mho' tung" pain: boem.

²⁰ Khasu" wim gari nyangnu" gi gougnyhoug dadu: lang" hau: boem moo yhe: zang" thoung" ri lug go, yo' du" said' pyam ge' ga: tid to" da" mungdang: ri ayo" cang oung: boem nghoid ago".

²¹ Shau" myang ja: dangain" gi gyoug dain' ja: nghoid yoomo Moshe lang" " Ngoo atho' tid gyoug dain' bye ga: wigi tid nyid.

²² Nanu" koem gi Sina, boem da" gung khoo: - Zion boem yo' moug: lagyoo: yi moin, sen, nyid da" dadei nyid Mangso voogung ein: da" - moug: khung: mo Yerusalem moo ju" nyid boem abye: go.

²³ Nanu" gi moug: khung: mo zhayen" moo bo da" - Mangsoo yi da" gau yi phung foem: moo we' byumyu" yi dangain" da" dang: kho' su: ein: da" Mangso jang" moo we' joeb, byeung" nhang: zi shug bye: da" deing: byeung" mo, da" venyi joem jhang khyoo: we' ju" nyid boem abye: go.

²⁴ Nanu" gi dang: thang" cab, seig ri nyheing byid: da" Yesu jhang khyoo: we' Abela suid" yo' yoo" ge da" zi joem tho' moo je ge da" zi joem ri yo" byid: da" - byeung" shoin: lo" suid" jhang khyoo: we' ju" nyid boem abye: : go.

²⁵ Nanu" gi hau: mungdang: tid kaid su: ri gi atam" gyoo: loo: za: ngeug pyam' khyoo: abui" baja" zed" nyid ge'. He: mougmyid tho' moo tid poin" tid kyeing" su: da" dang: ri shug gyo: lho: ngeug pyam nyid bang: gi yoobo dam mo yo" loid lo" boem wa zi anghoid- houg: yoomo ngoonu" gi moug: khung: khyo" tid kaid' su: ri nung thang phoug pyam boem nghoid rigi youg: noo yooboo mo ngoonu" loid loo" wa da" khyoo: gi aje boo loo.

²⁶ Hau: ayo, moo Mangso da" thui: gi mougmyid' ri mhoin' kaid' pyam bye- Nghoid loug we' akhid" gi mougmyid yoosoo" ri za: we' anghoid loo- " moug: khung" moug: di ri we' ngoo dalheing: nhoin, kaid' bye, ga: wigi dang: soo" byid: to.

²⁷ Dalheing: doem nhoin, kaid' ga: da" dangkang: gi phain" too" shau" da" zi dangain" ri nhoin, kaid' lho: shoem" shoung: pyam' wa zi nghoid wigi ayo" loeb, ayo" dei, lo: da" zi joem za: deung jo, wa zi nghoid ga: zi nghoid.

²⁸ Houg: su" nghoid yoomo nanu" yo" yu da" mungdain gi adei aloeb, da" mungdain nghoid wigi ngoonu" Mangsoo ri coung" nghei nyid boem shang. Nyang: rijeju" boin: lho: gyoug phau" myang: da" e" myed yo' Aseing: vho: ngei wa khyo" Mangsoo ri loem, khau: noku nyid boem shang o".

²⁹ Khasu" wim gari Yha" da" Mangsoo gi nghe, shoin, pyam' se' da" myi: nghoid nyid.