HEBRE 11 - Lacid Common Language Bible

Loem" Jeung" Khyoo:

¹ Loem" jeung" khyoo: ein: zigi ngoonu" nheig byu to" da" zi joem ri gyeing" nyang: bue" loo wa" ein: da" khyoo: ri nheig shid: nheig deug nyid ziyo' amyang yu" shi" da" zi joem ri gyeing" nyang: jo, bye" ein: se' gyo: loem" yu khyoo: ri loem" jeung" khyoo: ga: zi nghoid.

² Goo" nham mo da" byu yi gi nyangnu" gi loem" jeung" da" nheigloem: bo boem yoo mo Mangsoo myed vhoo: myed ngei lho: joo bye: ga: da" khyoo: ri yo" yu boem bye.

³ Amyang yu" shi" da" zi joem mo myang yu" bye: da" zi joem bue" loo wa shid re" Mangso mungdang: yo' he: da" jo, moo jo, ri phain" too" bye" khyoo: rinyang: nu" gi yo" se' yu boem bye: zigi hau: loem" jeung" da" nheigloem: yoomo nghoid nyid.

⁴ Loem" jeung" da" nheigloem: yo' Abela gi Ka-in tho' moo je" ge da" xoin" ri ngei" byid: bye. Nyang: loem" jeung" khyoo: ri yu" yu" lho: nyang: ri deing byeung" da" byu- ga: wigi Mangsoo lhoem: kham: yu byid: abye:. Khasu" wim gari nyang: to' byid: da" xoin ri Mangsoo nyang: vho: ngei nyid yoomo nghoid- Abela gi shid: byug bye: nghoid loug we' loem" jeung" khyoo: yoomo akhid" nyid ju" sho' nyang: gi dang: da tid nyid ashi.

⁵ Loem" jeing" yoomo Enug gi ashid: loo: za: Mangso wigi shu" to' yu ziri shau" abye:. Houg: yoomo nyang: ri hang" we' amyang loo- Mangso wigi shu" to' yu zi ashug" shi" da" uri Enug gi Mangsoo vho: ngei nyid su: nghoid, ga: wigi jhoem: mungdang: moo bo nyid.

⁶ Loem" jeung" zi abo nghoid rigi hang" we' Mangsoo vho: ngei zi ayo" bui. Khasu" wim gari Mangso jhang khyoo: yu: vang loo" mo, hang" we' Mangsoo nyid nyid ziyo' nyang: ri cang shoo: bang: ri jeju" toug" byid: nyid ein: da" khyoo: ri yo" loem" jeing" su: nghoid wa zi nghoid.

⁷ Ju" loo wa da" ayo, moo bue" loo wa da" amyang yu" shi" da" zi joem yo' sen: lho: wigi Mangsoo tid poin" nyid ziri No- a shau" gyo: zigi nyang: loem" jeung" nyid yoomo nghoid. Nyang: gi Mangso dang: ri tam" gyo: wigi Sang phoo lhid' daloem: ri zhug lho: nya: yhoem: ikoin deungkhu: ri yo" khyoid yu abye:. Hougsu" nghoid yoomo mougmyid ri nyang: dang: phyed' wigi No-a gi loem" jeung" khyoo: yo' sen: da" deingmain" da" agyid asoo: riyo" kham: yu abye:.

⁸ Abraham gi Mangsoo nyang: ri byid: wa"- ga: da" dang: soo" bo nyid da" mung" khyoo:- thu' yhe: loo" wa da" shid re" loem" jeung" nheigloem: gi nyang: ri tam" gyoo: nhang: nyid. Houg: yoomo nyang: gi khakhyoo: yhe: loo" wa zi lang" ase' zi nya: mungdain: mo wigi thu' so" loo" bye.

⁹ Mangsoo dang: soo" byid: to" da" mung" khyoo:- nyang: gi being" voo, yhang: ti" yhe: nyid yen". Nyang: gi Mangso jang" mo, nyang: yhang: te" dang: soo" khoin" da" agyid asoo: ri yo" coem, kham: yu da" Isag yo' Yaku, yhang: ti" - pain" zoem" khoug joem moo loung" jo.

¹⁰ Khasu" wim gari Abraham gi Mangso wigi akhyoo" toin" shid lho: geung: teung da" apoem: ayang: yo' bain' zhoug too" bye: da" voogung ri nyang: gi nheig byu lho: dalang" nyid.

¹¹ Abraham gi gye" mang: hau: loo" bye- Sa: ra nyang: we' apyaid bain' lid loo" bye: yoomo zoo: age yoo" loo. Nghoid loug we' Abraham da" loem" jeung" nheigloem: yoomo zoonu" nya: ba" doem, yo" bue" loo bye. Mangsoo gi Nya: dang: soo" khoin" byid: to" ziyo' dakhyoo" ti"- kyed' da" Aseing: nghoid nyid ziri Abraham gi loem, khau: nyid.

¹² Abraham gi gyeing" nyang: sushid: gung te" da" yug gi danghoid loo: loug we' nyang: dayug mo nyid byo lo da" nya: amyed ashen yi gi Moug: khung: mo kyi: joem myhoo,- Panglai gyid yam, mo atho' nghab da" mid' coo: doem: yhang ti"- myo: lug da" myid: yi zoo: yi nyid je: lo boem abye: go.

¹³ He: da" byumyu" yi dangain" bang: gi hau: loem" jeung" khyoo: moo shid: lo" boem abye: go. Nyangnu" gi Mangsoo byid: da" dang: soo" khoin" yo' sen: da" agyid asoo: ri ashau" kham: yu boem- nghoid loug we' nyangnu" gi hau: khyoo: ri vi" vi: mo yo" yu" myang boem bye: ziyo' lhoem: yo" tau, yu nyid boem bye. Nyangnu" gi he: moug: myid tho' moo lam" yen" da" tungbau, being" voo joem yhang: ti"- te: nghe: khau: nyid mo, date: nghoid nyid boem ziri bang bang za: yhen: yu khare" boem bye.

¹⁴ Hau: khyoo: joem ri hougsu" ga: wigi tid mo, gi nyangnu" nyid wa da" mungdain daloem: sho: nyid boem zigi bang bang myang nyid.

¹⁵ Nyangnu" gi nyangnu" thu' too" kho' da- voogung mungdain ri myid boin: lho: nheig nge nyid boem zi anghoid- hau: mung" moo dato' loo" nau: rigi yo" lo" da" akhang" yoo" mo, nghoid.

¹⁶ Akhid" koem gi hau: tho' mo je" pyo: da" moug: khung: moug di mo voogung mungdain ri nheig nge nyid boem- houg: su" nghoid yoomo Mangsoo gi nyangnu" da" Mangsoo ein: wa ziri sho: nyid zi anghoid. Khasu" wim gari Mangsoo gi nyangnu" nyid wa da" joyoo daloem: ri nyheung too" byid bye.

¹⁷ Abraham gi Mangso wigi ca: yu" zi shau" nyid uri loem" jeung" ziyo' nya: zoo Isag ri xoin" du: khyo" ngei" byid: pyam bye. Abraham gi Mangso jang" mo dang: soo" khoin" kham: yu shau" su: nghoid- nghoid loug we' nyang: gi nya: zooti" zoo: ri xoin" du: khyo" ngei" byid: pyam' wa zi jen" nyid gu nghoid.

¹⁸ Mangsoo gi Abraham ri " Ngoo nang ri dang: soo" khoin" byid: to" da" amyu" akung: ako'' joem- Isag mo wigi nyid yab, byo lo boem wa,, ga: wigi tid to.

¹⁹ Mangsoo gi Isag ri shid: jang" mo doem dei to' loo nhang: wa ga: wigi Abraham myid soin: to" ziyo' dakhyoo" ti"- gyeing" nyang: Abraham gi Isag ri shid: da" jang" mo doem yo" yu bye.

²⁰ Loem" jeung" ziyo' Isag ri ju" loo wa da" ayo, moo kham: yu wa zi nghoid da" mainkaid jeju" yo' sen: lho: wigi Yaku yo' Eso eig yug ri dang: soo" khoin" khyo" mainkaid byid: bye.

²¹ Loem" jeung" ziyo' Yaku gi nyang: shid: lo" nyid uri Yoseb da" nya: zo: eig yug ri mainkaid byid wigi nya: lham: dung: phyoo" moo thoug nghe: ci: lho: noku da.

²² Loem" jeung" ziyo' Yoseb gi nyang: shid: wa zi jhang lo da" uri Israela byumyu" yi Egutu meing: mo byoin, thu loo wa da" khyoo: ri tid kyeing" tid poin" kyo" lho: nya: shoo" youg: shoo" yang joem ri khasu" koid wa da" khyoo: ri we' pyeung: too" kho.

²³ Loem" jeung" ziyo' Moshe da" nya: myhi' yo' nya: pho eig yug gi nyang: ri bain' khu: lang" lham" moo" soem" khyab, - nyang: ri yhoem" to. Moshe gi gye" young" da" zoonu" nghoid ziri nya: eig yug myang yoomo Khokham" tid to" dang: ri ngeug pyam wa ziri agyug nghoid ago".

²⁴ Hau" Moshe gyi: loo lang" gi Phara, u myi: yi: zo: da" nya: zoo: ein: wa ziri ngeug gyang: pyam bye.

²⁵ Nyang: gi dayo' daboin: za: yubag yoobo da" pyo: khyoo: moo Mangso da" byumyu" yi yo' dage" kyi" khyeug jamjau shau" wa ziri nyang: je vho: nyid.

²⁶ Nyang: gi Meshia shid mo juang" yi boem zi shau" wa shid re" gi Egutu soid' gain' dangain" tho' moo gi je ge nyid"- ga: myid soin: bye. Khasu" wim gari nyang: gi ju" loo wa da" ayo, moo shau" kham: yu wa da" myonhoo: ngi shab, jhung shug ri nheig byu lho: dalang" nyid.

²⁷ Loem" jeung" ziyo' Moshe gi Khokham" phoo nheig yoo: wa ziri agyug loo: za: Egutu meing: mo thu lo" abye:- Nyang: gi myojid" yo' amyang da" Mangsoo ri myang yhang: ti" nyang- Egutu meing: khyoo: doem tau" loo" khyoo: ri ngeug pyam bye.

²⁸ Nyang: gi loem" jeung" ziyo' zooshid" yi ri said pyam lo da" mau: Lagyoo: yiri Israela byumyu" yi da" zooshid" yi ri abo said pyam wa shid re" lhed: kai da" pui" ri shu" koid shed" wigi yang suid" joem ri khoem" bung zeing yo' khoem" baid joem moo byeug sain" gyoin: too" wa shid re" pyeung: too" bye.

²⁹ Loem" jeung" ziyo' Israela byumyu" yi gi tung: gung yhang: ti"- gyid thoem" ni khoug: khyo" yo" phyed lo boem bye. Egutu byu yi we' houg: su" bo gu: neug ca: yu" boem ga: rigi noeb, shid: lo" pyam' byug boem bye.

³⁰ Loem" jeung" ziyo' Israela byumyu" yi gi nyhed nyid" bain' sho' Yerikho" voogung ri bain so" lheung yu thang: ri hau: voomoo" vang khyam: ri yo" khyau" mhoin' phyo' sain" byid: pyam' boem bye.

³¹ Loem" jeung" ziyo' shava myhi, Rahab, gi Israela dab, mo jooyu" mo, ri si' go" khyo" lhoem: zoem" khau: kham yu yoomo Mangsoo ri atam" gyo: da"-yooboo yo" mo, ri said pyam' da" jang" moo abo shid:.

³² Ngoo xo' tid shi" wa la". Khasu" wim gari Gidon gi Barag Samson yeb tha:- David Samuela yo' lapi yi dangain" mo, da" khyoo: ri tid kyoo ba, ein: rigi nga" da" ayo, gi tho' tham: wa zi anghoid.

³³ Houg: bang: gi loem" jeung" ziyo' sube" mung" ri gyi zain: lho: yo" oung: lo boem- nyangnu" gi deingmain" khyoo: ri cang zei: lo" boem wigi Mangsoo byid: to" da" dang: soo" khoin" ri shau" kham: yu boem bye.

³⁴ Gye" thain: nge" da" myi: so' ri we' yo" said' pyam boem wigi sube" sham: soo" mo we' yo" loid byoin, lo" boem bye. Nyang: nu" gi yoem: nu: boem nghoid loug we' yoem: foin, byid: zi yo" yu boem yoomo gyi zain: jang: moosa" rhi, yo" koid boem ziyo' tungbau gyiphung: joem ri yo" zain: oung: lo" boem.

³⁵ Myi: yi yi we' loem" jeung" ziyo' shid: byug bye: ngoonu" da" bidnoem yi ri doem, dei to'' loo nhang: khyoo: ri doem, yo" yu boem bye. Byu dayham" gi nyangnu" ri lhoid pyoin kaid wa ga: da" amyeing" akhang" ri atam" gyoo: loo: za: je" ge, thang da" kangso' dei khyoo: khyoo: dei to'' lho: yo" vang loo" wa shid re" shen" yhen khyoo: kham' zo: lho: shid: lo" boem bye.

³⁶ Dayham" ri gi juang" yi gei sang: lho: youg baid' said pyam wigi dayham" rigi myheug tei" thung moo lhoung pyam zi shau" nyid ago".

³⁷ Nyangnu" gi lug go, yo' du" said pyam zi seig sheig yo' adu du sheug phyid pyam zi sham: yo' jab, said' pyam zi shau" nyid ago".

³⁸ Nyangnu" gi sho" jhen: jamjau zi shau" boem wigi nghe: khoug: jang: sho: yhen" da" byu yi yhang: ti"- siyoo soogam: moo boem moug: mo lug ug joem moo myid khyung: joem moo cang nyid yen" boem ago".

³⁹ Houg: bang: dangain" mo, gi nyangnu" da" loem" jeung" khyoo: yoomo coung" byid: nghei byid xoin" to' zi shau" yu boem ago". Nghoid loug we' Mangsoo byid: to" da" dang: soo" khoin" mo agyid asoo: gi ashau" kham: yu boem shi" nghoid ago".

⁴⁰ Khasu" wim gari Mangsoo gi nyangnu" shid re" je" ge da- nyheung, soin' khyoo: ri koid too" byid: bye- houg: su" nyheung soin' to" da" khyoo: joem gi nyangnu" gi ngoonu" bo ri za: joeb byeung" mo, yo" bue" loo wa shid mo nghoid nyid.