GYUNG: SOO" 7 - Lacid Common Language Bible

Vhujhung: yi Da" Xoin" Joem

¹ Moshe gi Aseing da" Zoem" ri bain zhug da" bidnyid moo nyang: gi Zoem" yo' houg mo jonu" ougkhu langbain dangain"- phoin: yo' houg mo jonu" ougkhu langbain dangain" ri xu: joid wigi shugbyid: wa zi nghoid.

² Hau: thang: Israela byumyu" vhujhung: yi nghoid wigi byu zhayhen" mo vhujhung: yi nghoid lo da" byumyu" akung: vhujhung: yigi

³ nyangnu" xoin" joem ri Aseing jang" khyoo: ci: re" ago". Hau: joem gi rheing" khyug loem: yo' nujung loo: daxe: eig du: nghoid lho: vhujhung: eig yug shid re" rheing" daloem:- vhujhung: dayug shid re" nujung loo: dadu: du: nghoid da:. Nyangnu" hau: joem ri bain shugbyid: thang: ri

⁴ Aseing gi Moshe ri

⁵ «Hau: Zoem" koid pain' jang" moo ci: wa shid re" hau: jhungshug joem ri lhoem: yu we'. Houg: lho: nyangnu" zei: soo" ca" da" moo" ri cang wigi Levi byu yiri gam byid: we'» ga: tid.

⁶ Houg: yoomo Moshe gi rheing" joem yo' nujung loo: joem ri Levi byu yiri byid: bye:.

⁷ Nyang: gi rheing" eig loem: yo' nujung loo: myid: du: ri Gershon kung: yiri byid: wigi

⁸ rheing" myid: loem: yo' nujung loo: shid du: ri Merari kung: yiri byid: da:. Nyangnu" moo" zoo" dangain" ziri Arun da" nya: zoo: Ithama vhu" she: da" akhoug: moo: zei: pyam ago".

⁹ Nghoid loug we' Moshe gi Kohad kung: yiri gi rheing" joem yo' nujung loo: joem ri abyid: nghoid da:. Ciwim gari: nyangnu" yu" goin coung: da" younglho' jonu" joem ri nyangnu" kootho' moo vu, ca" yoomo nghoid da:.

¹⁰ Vhujhung: yigi phoin: shugbyid: wa akhyoo" koid wa shid re" xoin" joem ri we' ci: yhe: ago". Nyangnu" da" jhungshug joem ri phoin: moo shugbyid: wa zi nyangnu" jen" lang"

¹¹ Aseing gi Moshe ri «Phoin: shugbyid: wa shid re" daxe: eig nyid" gu: moo nyid" khang" nyid" vhujhung: yi danyid" dayug nyang: nya: jhungshug ri shugbyid: wa shid re" nyangnu" ri tid we'» ga: tid.

^12-83 Nyangnu" gi nyangnu" da" xoin" ri vhoo: moo: lhid" to" ziyo' dayhang: ti" shugbyid: bye: Bidnyid Akung: Vhujhung: 1 nyid" Yuda Aminadab nya: yuggi zoo: Nashon 2 nyid" Ishkha Zura nya: yuggi zoo: Nethanela 3 nyid" Zebulun Helon nya: yuggi zoo: Eliaba 4 nyid" Ruben Shedura nya: yuggi zoo: Elizura 5 nyid" Simun Zurishadai nya: yuggi zoo: Shelumila 6 nyid" Gad Duela nya: yuggi zoo: Eliasab 7 nyid" Ephrim Amihu nya: yuggi zoo: Elishama 8 nyid" Manashe Pedazura nya: yuggi zoo: Gamalela 9 nyid" Benyamin Gedomi nya: yuggi zoo: Abidan 10 nyid" Dan Amishadai nya: yuggi zoo: Ahiza 11 nyid" Ashe Okhran nya: yuggi zoo: Pagila 12 nyid" Naphtali Enan nya: yuggi zoo: Ahira bang: nghoid ago". Nyangnu" yugkhang" moo" ci: yhe: boem da" xoin" joem gi tarha" vang da" azhang ri ci: wigi leug ri 34 rung bo da" ngei khu daloem. Dakyen" jain" bo da" ngei jarung: daloem. Hau: eig loem: goin" moo shivoo: xoin" khyo" xu: yo' lheig to" da" cen: moin" phei" byeung" sho'. 3 rung bo da" sheing: bain dabain moo: nam pyo: ja: byeung" sho'. Nuloo: nu" dadu:- yang loo: dadu: yo' dazain byeung" da" yang nu" dadu: ri nghe' ngei" xoin" khyo" yooboo xoin" shid re" coidbaid dadu:. Zoem" khau: xoin" khyo" nuloo: eig du:- yang loo: wim: du:- coidbaid wim: du:- dazain byeung" da" yang nu" wim: du: nghoid da:.

Bidnyid Akung: Vhujhung:

^84-88 Phoin: ri shugbyid: wa shid re" vhujhung: daxe: eig yug wigi ci: yhe: go" da" ngei" xoin" joem dangain" gi vhoo: moo: lhid" to" ziyo' dayhang: ti" nghoid da:. -Dangain" zi daxe: khyug joid: jain" bo da" ngei khu daxe: eig loem: yo' ngei jarung: daxe: eig loem:- -Nam pyo: ja: byeung" sho' bo lho: 33 rung bo da" sheing: bain daxe: eig loem- -Nghe' ngei" xoin" shid re" nuloo: daxe: eig du: yang loo: daxe: eig du:- dazain byeung" da" yang nu" daxe: eig du: yo' houg: yo' bo ngei" byid: wa da" shivoo: xoin" joem -Yooboo khyoid xoin" shid re" coidbaid daxe: eig du: -Zoem" khoug: xoin" shid re" nuloo: eig xe: myid: du:- yang loo: khyug xi: du:- coidbaid khyug xi: du:- dazain byeung" da" yang nu" khyug xi: du: nghoid da:.

⁸⁹ Moshe Aseing yo' dang: ji goo" wa shid re" Zoem" khyoo: vang: yhe: da" uri Dang: Theing Kuid: amyed" adang Dung dab da" dei noem eig du: agyoo: mo Aseing wigi nyang: ri dang: ji thui: ri Moshe shau" gyo: da:.