GYUNG: SOO" 1 - Lacid Common Language Bible

Xang: shi" Lheing: Kuid: Da" Israela Zhayhen"

¹ Israela byumyu" yi Egutu mo thu lo thang: eig zain lhammoo" eig khyab xang: shi" nyid ri Aseing gi Sina dain" pyoid yoo mo nya: zoem" moo: Moshe ri dang: tid da:.

^2-3 Nyang: gi «Nang yo' Arun gi Israela byumyu" yi da" zhayhen" ri byu kung: yo' yhoemkhung: ri kho' wigi koid: yu we'. Gyi moo" yo" voin bye: da" eig xi: zain anghoid lang" hau: tho' je gyi: da" yuggi dangain" bang: ri lhid" xoem" too" we'.

⁴ Re" tang: ri yo" pang" wa shid re" akung: khang" moo" mo vhujhung: dayug ri mho' yu ge'» ga: tid.

^5-16 He: yuggi yi gi hau: moo" zoo" shid re" byu phung: mo khyen: yu shau" da" nyangnu" akung: joem mo vhujhung: yi nghoid. Akung: vhujhung: Ruben Shedura da" nya: yuggi zoo: Elizura Simun Zurishadai da" nya: yuggi zoo: Shelumila Yuda Aminadab da" nya: yuggi zoo: Nashon Ishkha Zua da" nya: yuggi zoo: Nethanela Zebulun Helon da" nya: yuggi zoo: Eliab Ephrim Amihu da" nya: yuggi zoo: Elishama Manashe Pedazura da" nya: yuggi zoo: Gamalela Benyamin Gideoni da" nya: yuggi zoo: Abidan Dan Amishadai da" nya: yuggi zoo: Ahiza Ashe Okhran da" nya: yuggi zoo: Pagila Gad Duela da" nya: yuggi zoo: Eliasab Naphtali Enan da" nya: yuggi zoo: Ahira bang: nghoid da:.

Akung: vhujhung:

¹⁷ Moshe yo' Arun tang: gi he: yuggi daxe: eig yug wigi pang" thoug byid: ziyo'

¹⁸ Lhammoo" eig khyab xang: shi" nyid" ri byu phung: dangain" ri khe: zheing" to" lho: byumyu" dangain" bang: ri byu kung: joem yo' yhoem: byu yiri kho' wigi lhid" xoem" too" bye:. Aseing da" amyeing" yo' dayhang: ti" eig xi: zain byeung" anghoid lang" hau: tho' je gyi: da" yuggi yi dangain" bang: da" myeing ri nghab wigi lhid" xoem" too" bye:.

¹⁹ Sina dain" pyoid yoo moo: Moshe gi byumyu" yi da" myeing ri koid: yu bye:.

^20-46 Yaku da" zooshid" yuggi zoo: nghoid da" Ruben byumyu" mo shid" wigi gyi moo" yo" zei: bye: da" eig xi: zain yo' hau: tho' je gyi: da" yuggi yiri byu kung: yo' yhoem: byu yi kho' ziyo' dayhang: ti" myeing ri koid: yu wa zi nghoid. Dangain" gi vhoo: moo: lhid" to" ziyo' dakhyo" nghoid. Akung: Nghab youg Ruben 46,50 Simun 59,30 Gad 45,65 Yuda 74,60 Ishakha 54,40 Zebulun 57,40 Ephrim 40,50 Manashe 32,20 Benyamin 35,40 Dan 62,70 Ashe 41,50 Naphtali 53,40 Dangain" 603,55

Akung: Nghab youg

⁴⁷ Levi byumyu" yigi gootu: byumyu" yi yo' dage" myeing koid: yu zi ashau" nghoid ago".

⁴⁸ Ciwim gari: Aseing gi Moshe ri

⁴⁹ «Gyi moo" voin ge" da" yuggi yi zhayhen" koid: uri Levi kung: ri abo kaid.

⁵⁰ Hau: gungthid- Levi yiri nga" shidkhoin" Zoem" yo' jonu" joem dangain" ri yu" coung: zei so" loo" wa shid re" moo" foin: we'. Nyangnu" rigi hau: zoem" yo' zoem" mo jonu" joem ri vu, de"- hougmoo: dei byid: wigi nyangnu" gi hau: zoem" lheing khab mo dab koid wa zi nghoid.

⁵¹ Nanu" da" dab ri pyoung" shu" khang" moo" Levi byumyu" yigi zoem" ri phyo' lho: dab aseig moo: doem zhug wa zi nghoid. Hau: zoem" khyoo tab re" da" gootu: hang" nghoid loug we' said pyam zi shoug" wa nghoid.

⁵² Deing da" Israela byu yigi phung: yo' phung: yugkhang" moo" gi nyang: yug nya: phung: yo' dage" nyang: yug nya: da" dung khoin: vhoo: moo: dab ri koid wa zi nghoid.

⁵³ Nghoid loug we' hau: zoem" khyoo: hang" we' ayo" tab ri" lho: Israela byumyu" phung goin" ri nga" nheig yo: zi ashau" nhang: wa shid re" Levi byu yigi hau: zoem" ri goem loem nyid wa shid re" zoem" lheing khab moo dab koid nyid wa zi nghoid» ga: tid.

⁵⁴ Houg: yoomo Israela byumyu" yigi Moshe ri Aseing wigi amyeing" byid: to" da" gu: ja: khang" moo" ri koid bye:.