GALATI 6 - Lacid Common Language Bible

Nyang: Cang" Nyang: Yoovoin Coem, Voin Go" Khyoo:

¹ Mang nhung" yi we"- byu dayug yug gi aboin: asoo" loo: za: yooboo zei: shoid nghoid rigi venyi wigi khyoo: shed" khyo" kangso dei nyid mo, nanu" gi houg: yhang: te" su: ri nu" nham, da" myid yo' khyoo: shed byid: ca" nyid nanu" nyang: we' gunglau" wigi jhu, phyo' zi ashug" baja" nyang: tu: nyang: houg: lhed' zed" nyid ge'.

² Nanu" nyang: cang" dayoug yoovoin, ri dayug- bo pang" voin goo" ge'- houg: su" nghoid lang" gi nanu" Khristu da" Tarha" ri cang pyeung zi nghoid wa.

³ Byu yi dayug yug gi yhoug: gyen: da" byu gyeing" nyang: anghoid nyid da" zi yhoug: gyen: da" byu nghoid ga: nyang: nya: da" gung ri nghoid boin: su: gi nyang: nya: da" gung ri mhau' nyid su nghoid.

⁴ Byu dayug yo' dayug gi nyang: nya: da" koid moozoo" ri soin kho' yu" nyid goo" baja"- nyang: nyang: koid da" moozoo" ge zi nghoid nyid rigi hau: ziri gootu: dayug yug da" moozoo" yo' ki' goo" cang aboo loo: za: nyang: zei: da" moozoo" moo gau yi ngei bu: phau: khuang nyid baja".

⁵ Khasu" wim gari dayug yo' dayug gi nyang: tu: nya: da" yooboin, ri voin, vu, nyid boem wa zi nghoid nyid.

⁶ Khirstu da" mungdang: ri jhau" kham: yu su: gi jhoug" byid: da" sara: ri nyang: tu: nyang: yo" da" gye" ge da" soidgain' dangain" ziyo' bo pang" thoug byid: nyid baja".

⁷ Nanu" gi nyang: nya: da" gung du: ri mhau' lho wigi khyoo: avhang: loo" goo"- Mangsoo ri hang" we' aphoug" akhyoid yo" koid wa zi anghoid- byu yi gi nyang: tu: nyang: sho" kaid ziyo' dakhyoo" shau" yham" yu wa zi nghoid.

⁸ Byu da" gung shoo" ein: da" myid' jang: moo sho" kaid su: gi shid: lo" ein: da" byo, yoin" da" amyoug: ashi" ri shau" yham" yu wa nghoid- Venyi ein: da" myid' jang: moo sho" kaid' su: gi apyad' atoo: mo kangso ein: da" amyoug: ashi" ri shau" yham" yu wa nghoid nyid.

⁹ Hougsu" yoomo ge da" moozoo" ri zei wa shid re" ngoonu" myung: soo" doug asoo" loo: koid nyid boem shang- Khasu" wim gari ngoonu" yoem: a shoin: rigi ayo, akhyeing: ju" lang" shau" yham" yu boem wa zi nghoid.

¹⁰ Hougsu" wigi ngoonu" gi ayo, akhyeing: bo jo, shi" uri ge bue" da" ayo, yoo" khang" moo"- byu dangain" mo, shid re" ge lho, da" moo" ri zei: nyid boem shang nghoid loug we' loem" jeung" da" ikoin deungkhu: yi shid re" je" wigi zei: nyid boem shang.

Lo" Thang Mo Vhu" Kaid ziyo' Zed" Lhid' Nhang Mungdang:

¹¹ Kha: yhi' gyeing" gyi: da" lhid" cab, yo' ngoo nanu" jhang khyoo: ngoonya: lo, yo' nyang: lhid" to" ziri yu" yu" ge'.

¹² Athang: yham" da" khyoo: rikham: yu wa shid re" nanu" ri aphoug" akhyoid koid lho: wigi koid nhang: nyid da" byu yi gi ngi zain' shoid mo, laxoem" alhoo: again da" shid re" myonhoo: sho: nyid mo, nghoid ago- nghoid loug we' nyangnu" hougsu" koid da" khyoo: gi Khristu da" pyang" zeing yoomo pyi: sho: shen" yhen zi ashug" wa shid mo koid zi nghoid.

¹³ Khasu" wim gari athang: yham" zi kham, ci: bang: lang" gi hau: toung: to" da" tarha" ri ayo" cang pyeing nghoid nyid ago"- nyangnu" gi nanu" tarha" khoug: khyoo: vang lo wigi athang: yham" zi kham: yu da" jang" moo phau: khuang nghoid boin: nyid nau boem yoomo nanu" ri houg: yhang: ti" koid nhang: nau zi nghoid ago".

¹⁴ Ngoo koem gi ngoonu" da" Aseing Yesu Khristu da" pyang" zeing mo goo tu:- ce: noem khyoo: moo we' myonhoo: sho: phau: khuang jang: ajo- Khasu" wim gari nya: pyang" zeing yoomo he: moug myid gi nga" shid mo shid: mang bue" byug wigi ngoo we' he: mougmyid shid re" shid: mang bue" byug bye.

¹⁵ Byu dayug yug giathang: yham" zi shau" kham: yu-hougsu" anghoid lang" ashau" kham: yu- zigi ce" yhoug: gyen: we' anghoid- byu aseig yo" bue" lo da" khyoo: za: yhoug: gyen: danghoid nyid.

¹⁶ He: da" avoid asam" akhyoo" again da" tarha" ri nyang: nya: da" kangso' dei khyoo: dangain" jang" moo cang yhe: loo" bang: da" atho' moo we' Mangsoo byumyu" yi da" atho' moo we' ngei bu ziyo' nheig khyeig sho" myen: da" khyoo: gi dajo, jo, baja" o".

Dang: Thang

¹⁷ akhid" mo gi hang" nghoid loug we' ngoori aze" youg: aze" nhung byid: loo goo"- Khasu" wim gari nga" da" gung moo dab, dam noo joem gi ngoo Khristu da" moo" voin, join, phoo nghoid da" khyoo: ri sagsi: kham: nyid.

¹⁸ Nga" da" mang: nhung" yi we"- yha" da" Aseing Yesu Khristu da" jeju" gi nanu" da" Venyi yo' dage" danyid nyid baja" o" Amen.