GALATI 1 - Lacid Common Language Bible

¹ Byu da" amyeing" yo' lagyo: aya: moo nyhed: to" zi we' nghoid- byu yi da" byu nyid byu yab khyo" cang lho: wigi nyheung to" da" lagyoo: we' anghoid. Yesu Khristu jang" mo we' nyang: ri shid: loo" bye: bang: mo-dei to'' loo nhang: da" Mangso amyeing" khyo" wigi lagyoo: nghoid nyid da" ngoo Polu gi

² Hid: moo ngoo yo' dage" nghoid nyid da" mang: nhung" yi dangain" yo' Galati mung" mo phung byu yi jhang khyoo: mougsoug" lhid" lho: vhu" kaid' boem.

³ Ngoonu" da" nya: phoo Mangsoo yo' Yesu Khristu jang" mo jeju" yo' ngei bu da" khyoo: gi nanu" moo dajo, jo, baja" o".

⁴ He: da" pyaid mo akhyeing" ashoeb khyoo: mo ngoonu" ri yo" khyoid yu baja"- ngoonu" da" Phoo Mangsoo myid vho: ziyo' dakhyoo" tam" gyo: zoore"- ngoonu" da" youg: noo yoobo shid mo Khristu gi nya: gung du: nyan: ab, byid: pyam' bye.

⁵ Hau: Phoo Mangsoo moo apyaid' atoo:- myonhoo: phung" yoeb dabo jo, baja"- Amen.

Daloem: Kyeung" Da" Ngei Bu: Lu Dang:

⁶ Khristu da" jeju" yo' nanu" ri khe: yu su: jang" mo wigi hid: yhi' gyeing" myab, khyo" nanu" gang: lo" wigi ngei bu: lu dang: gootu: ri lhoem: kham: yu nyid boem yoomo nanu" ri ngoo gye" mau" nyid.

⁷ Gyeing" nyang: ga: rigi Aseing Yesu da" khyoo: mo lid lho: ngei bu: lu dang: gootu: ajo. Nghoid loug we' ngoo hid: su" ein: tid zigi Khristu da" ngei bu: lu dang: ri thed' ze" shoin, wa yoem: kaid' nyid da" byu dayham" nyid boem ziyo' nyangnu" gi nanu" ri myid loem vhu" gyam, myid gyam nyid sho' lhu: phyo' lhu: nhoung nyid boem yoomo tid nyid zi nghoid.

⁸ Nghoid loug we' nanu" ri ngoonu" kho" kyo" to" da" ngei bu lu dang: joem yo' shai" da" ngei bu: lu dang: gootu: ri byu dayug yug gi nanu" ri kho" kyo" nghoid rigi nyang: ngarai mung" yo' moin: yi" nyid bye.

⁹ Nanu" lhoem: yu ci: bye: hau: ngei bu: lu dang: yo' shai" go" da" gootu: ngei bu: lu dang: daloem: ri byu dayug yug gi nanu" ri kho" kyo" nghoid rigi nyang: gi nheing" khoin" zang" baja" ein: wigi xang: shed" moo ngoonu" tid yu" bye: ziyo' dakhyoo" ti" akhid" ngoo da tid nyid shi.

¹⁰ Khasu" wim gari ngoo hid: su" tid nyid zigi byu yi wigi coung" byid: nghei byid: zi yo" yu wa shid re" koid nyid zi nhghoid la". Houg: su" we' anghoid o". Ngoo vho: ngei nyid da" khyoo: gi Mangso myid veung" vho: ngei da" khyoo: yo" yu wa shid re nghoid. Ngoo gi byu shid khoin" moo myeing fu" nheing" sho' ein: yoem: kaid la". ngoo houg: su" dakoid nyid nghoid rigi Khristu da" dei zoo ngoo nghoid wa zi anghoid..

Polu Gi: Khakhyo" Wigi Lagyoo: Bue" Lo Da" Khyoo:

¹¹ Mang nhung" yi we" nanu" ri ngoo kho" kyo" da" ngei bu: lu dang: gi byu yi wigi jhau poin" kaid' zi anghoid loo: za: ngoo nanu" ri tid kyoo" bye.

¹² Kahsu" wim gari byu yi hang" jang" mo we' hau: ngei bu: lu dang: ri ngoo jhau" yu yu" zi anghoid. Aseing Yesu Khristu nyang: Yo' se myang khyo" ngoori toin" shid bye.

¹³ Ngoo gi Yuda noku thung" moo danyid nyid shi" uri khasu" koid nyid lid loo bye: da" khyoo: nanu" nyang: shau" gyo: yu" boem bye- ngoo gi Mangso da" phung ri neig khyeug myid aboo loo za: pyi: sho: shen" yhen lo ziyo' lhu: phyo' mhoin' pyam wa shid re" yoem: kaid' lo yu" bye.

¹⁴ Yuda noku thung" ri khyag cang zei: lo khyoo: moo ngoo gi nga" da" byumyu" mo, yam: cang" yi myoo: sho' bang: tho' moo jain" lho: wigi nheigloem: zug ci: ziyo' phoug" phyid" yi da" jhoug" myeing" joem ri cang pyeung lo yu" bye: zi nghoid.

¹⁵ Nghoid loug we' nga" myhi, da" ung: khoug: moo dabo jo, shi" mo nyang- Mangsoo gi nya: da" jeju" yo' ngoori khyen: yu wigi nyang: ri noku wa ngoori khe: yu bye.

¹⁶ Hau: thang: ri tung bau, byumyu" yi ri nya: zo: da" ngei bu: lu dang: kho" kyoo" wa shid re" nya: zo: ngoori toin" shid' da" uri ngoo gi hang" da" phajhi" byid: khyoo: ri we' amho, yu yu".

¹⁷ Hau: tho' moo gootu: nga" shid' moo lagyoo: nghoid nyid mo, yo' yhe: shau" goo" wa shid mo, ngoo Yerusalem khyoo: ado, loo" loo: za: Arabi mung" khyoo: dalheing: dam yhe: lo" lho: Damasku voo moo doem, lo.

¹⁸ Hau: thang: ri soem" zain' lid loo" lang" Kepha yo' shau" go" lho: nya: jang" mo lu dang: shau" yu wa Yerusalem khyoo: do, lo" wigi nyang: yo' dage" daxe: wim: nyid" koo: nyid kho.

¹⁹ Hau: Aseing: da" nya: nhung" Yaku mo lid wigi gootu: lagyoo: yi ri ngoo amyang.

²⁰ Akhid" ngoo lhid" kaid' da" khyoo: gi deingmain" da" khyoo: nghoid- mhau' fain" da" dang: atid nyid ziri Mangsoo se' nyid.

²¹ Hau: thang: ri Suri mung" yo' Kiliki meing: gyoo: moo ngoo ju" yhe.

²² Hau: ayo, moo Yuda mung" moo nyid da" Khristain phung byu yi mo, byu yi gi ngoo yo, myonhoo: doid' athoung" shau" asi go" boem shi.

²³ Nghoid loug we' nyangnu" gi" xang: shed" ri ngoonu" ri shen" yhen yen" yu" su: gi xang: shed" ri nyang: phyo' shoin, pyam' soin da" loem" jeung" khyoo: ri akhid" kho" kyo" nyid ga: wigi byu gooji yi tid ziri dashug" gyo: yu.

²⁴ Houg su" nghoid yoomo nyangnu" gi nga" khyoo: gang mo Mangsoo ri coung" nghei nyid boem ago".