ESTHA 7 - Lacid Common Language Bible

¹ Houg: yoomo khokham yo' Haman gi Estha yo' dage" zoo: shug pui" koid wa shid re"

² eig lheing: ein: lheing: doem yhe: lo" da:. Khokham phoo gi zabyid yhid: shug uri Estha ri «Khokham myhi' Estha we" akhid" nang ci: vho: la" ngoo ri tid we'. Nang hau: ziri shoug" yu wa. Khokham mungdain: agung dayi" rilang" ngoo nang ri byid: wa» ga: tid da:.

³ Khokham myhi' Estha gi «Ngoo khyo' nyhoem: lho: mho' da" khyoo: ri byid: wa shid re" Aseing: khokham myid vho: nghoid rigi ngoo vho: da" khyoo: gi ngoo ri dei nyid nhang: lho: nga" byumyu" yiri we' dei nyid boem goo" baja".

⁴ Ngoo yo' nga" byumyu" yiri said toem" pyam wa shid re" oung" zo: pyam zi shoug" bye:. Join khyo" oung" zo: pyam zi za: danghoid rigi ngoo sam: zoo: tam" jo, lho: nang ri he: khyoo: yo' sen: wigi phibu re" pu' wa anghoid. Nghoid loug we' ngoonu" gi said toem" pyam wa zi za: danghoid lo:» ga: tid da:.

⁵ Houg: lang" khokham Ahasuru gi khokham myhi' Estha ri «Houg yhang: ti" moo" zoo" ri hang" voem" koid da:. He: yug kha moo: nyid lha"» ga: myid: da:.

⁶ Estha gi «Ngoonu" da" gyivoo- ngoonu" ri shen" yhen wa su: gi he: akhyeing" da" byu Haman nghoid da lhe"» ga: tid da:. Haman gi khokham phoo yo' khokham myhi' shidkhoin" moo: gyoug dain ziyo' yu" zhug nyid da:.

⁷ khokham phoo gi nheig joem: yo lho: to' yab da:. Hau: yab mo thu lo" wigi khokham vang" bain: khyam: khyoo: thu yhe: lo" da:. Haman gi nyang: ri khokham pho wigi he: khyoo: yoomo yooboo dam byid: wa bye: ga: se' yu" yu pyam lho: khokham myhi' Estha da" nungthang moo nyid nyid wigi nya: kangso' loid wa shid re" mho' nyid da:.

⁸ Nyang: gi nheig khyeug yu wa ziri mho' wa shid re" Estha da" yhoeb cuang dang moo nyang: nya: gung ri byam lheing: kaid uri nyang: khokham phoo gi bain: khyam: joem khyo" doem tau" lo da:. Hau: ziri shau" myang lang" khokham phoo gi «He: yug gi nga" khokham kho"- ngoo nya: shidkhoin" moo nyang: khokham myhi' ri doin: zeig rui" wa ga: nhung: la"» ga: yoid nyho: kaid da:. Khokham phoo hougsu" tid kaid yo' nyang: unug bang: gi Haman da" vhuloem ri nghoeb pyam byid: ago".

⁹ Hau: thang: nyangnu" mo Harbona ga: myheing da" unug gi «Haman gi Aseing khokham re" da" kangso' ri khyoid byid: lo da" Modekhai ri cu" lang" said pyam wa shid re" nya: yhoem: nam moo: lang" byu said pyang" zeing daloem bain zhug to" abye:. Houg: zigi nyhed xe: wim: pi: myhang: da» ga: tid da:. Khokham phoo gi «Haman ri houg moo cu" lhang" said pyam ge'» ga: amyeing" byid: kaid da:.

¹⁰ Houg: yoomo Haman ri nyang: wigi Modekhai shid re" ga: zhug to" da" byu said pyang" zeing moo: cu" lang" said pyam ago". Hau: thang: ri khokham phoo gi nheig yoo: gyo" byug da:.