ESAIA 50 - Lacid Common Language Bible

¹ Aseing tid zigi «Nya: yhoem: seing: myhi' ri kang" pyam da" yuggi yhang: ti" ngoo gi nga" byumyu" yiri nhang: kaid wa zi nghoid ein: nanu" jhoo: go" la". Kang" pyam da" mougsoug" khyab gi khayoo: la". Join khyo" nya: zooshang: yiri oung” zo: pyam da" byu dayug yo' dakhyoo" ti" ngoo gi nang ri thung: byu khyo" oung" zo: pyam ein: jho: rhe". Anghoid- nang thung: byu khyo" cang lo" zigi nanya: yooboo yoomo nghoid da:. Re" yhid kang" pyam shau" zigi re" youg: moo" zoo" yoomo nghoid da:.

² Ngoo nyangnu" ri khyoid yu wa nyangnu" jhang yhe: uri nga" byu yigi hau: ziri ciwim wigi aphug tid boem la". Ngoo nyangnu" ri khe: uri nyangnu" ciwim atu" boem go" la". Ngoo gi nyangnu" ri khyoid yu wa yoem: sung neing: yug nghoid rhe". Gyid ayoo" yoomo houg moo nyid boem da" wimdo, joem shid: wa shid re" ngoo gi amyeing" dang: wigi panglai: ri yo" kain" hei' loo" nhang: lho: gyid lang ri dain" pyoid yoo yo" koid pyam da:.

³ Ngoo gi mougkhung: ri shid: mang ri koug ngau yhang: ti" yo" no: loo" nhang: da:.

Tid Dang: Gyo: da" Aseing da" Dei zoo:

⁴ Myung: doug bang: ri ngoo yoem: byid: wa shid re" yoem: moo" bo Aseing gi ngoo khasu" tid wa ziri ngoo ri jhau" byid: abye:. Nab soin: khang" moo" nyang: ngoo ri jhau" shid wa ziri gyoo: nau myid kaid byid: da:.

⁵ Aseing gi ngoo ri se' gyo: da" myid byid: to" lho: ngoo gi goemlu atoo' anghoid lang" nyang: mo we' ngoo aphug loo:.

⁶ Ngoo ri baid bang: shid re" nga" nung" khung: cen: ri ngoo kham byid:. Nyangnu" ngoo ri rue" boem uri ngoo nyangnu" ri atoem' pyam. Nga" nhoid mei: ri nyangnu" phoin' pyam uri yo' nga" myonhoo: ri shakain" byi" gyoin: boem uri ngoo nyangnu" ri atoem' pyam.

⁷ Nghoid loug we' yoem: moo" bo Aseing wigi ngoo ri pang" thoug byid: yoomo nyangnu" rue" zigi ngoo ri dam ayo" tab nghoid da:. Ngoo hau: joem ri yo" zeing: kham: wa ngoo nya: gung ngoo nyang: zeing: ci: da:. Ngoo ngi: ayoem" wa ziri ngoo se'.

⁸ Ciwim gari Mangsoo gi jang" moo nyid wigi ngoo ce: yooboo ayo" da" khyoo: ri nyang: sagse: toin" shed byid: loo wa. Ngoo ri thougtheung su: yooboo hang" yo" zhug la". Tarha" yung" khyoo: dage" yhe: boem shang. Nya: da" yooboo zhug da" khyoo: joem nyang: ri ci: ri" nhang: we'.

⁹ Yoem: moo" bo Aseing nyang: nyang: ngoo ri goem loem byid: da:. Houg ri ngoo ri yooboo yo" da: ga: hang" sagse: yo" toin" shed la". Ngoo ri yooboo zhug bang: dangain" byug lo" byug goo" wa. Nyangnu" gi nhau: wigi zo: pyam da" byimi ri yhang: ti" moin" byug loo" goo" wa.

¹⁰ Aseing ri ngi: shab byid: boem da" bang: dangain" yo' nya: dei zoo: da" dang: ri tam" gyoo: mo, we" nanu" so" lo" da" khyoo: gi no ri no jo, wa. Nghoid loug we' Aseing ri loem khau wigi nanu" Mangsoo ri nghi: ge'.

¹¹ Subi" gootu: ri phyo' shoin' pyam wa gyi khau" koid bang: nanu" dangain" gi nanu" nyang: gyi khau" koid da" moo" wigi nyang: phyo' shoin' pyam zi shoug" loo goo" wa. Aseing nyang: he: ziri bui" nhang: loo wa. Nanu" gi nheigloem: amyen akhyoid kyi" khyeug yau: khi" kham zo: loo goo" wa.