ESAIA 48 - Lacid Common Language Bible

Mangsoo gi Ju" Loo wa da" Ayo, mo Aseing Nghoid

¹ Yuda kung moo gyoo" lo da" Israela byu nanu" we"- he: ziri tam" gyoo: we'. Nanu" gi Aseing myeing ri lang: wigi jham' tang: lho: Israela da" Mangsoo ri noku wa ga: tid ago". Nghoid loug we' nanu" tid zi dakhoin" ri we' acang boem nghoid da:.

² Nghoid loug we' nanu" gi gyeung" shang: da" voomoo" byu nghoid. Israela Mangsoo ri nanu" khau: nghe: nyid. Nya: myeing gi myhang: thang Aseing nghoid da: ga: phau: khuang tid nyid ago".

³ Aseing gi Israela ri «Cibui" wa ein: ziri goonham' goo" co' mo ngoo lapi: pe: too" bye:. hau: thang: ngoo hau: ziri nyeigdain tung" bui" nhang: bye:.

⁴ Nang gi joto' yhi' thain: wigi gyid: mid" yhang: ti" nheigloem: thain: ziri sagse: ci: shug byid: ca" ein: ziri ngoo se'.

⁵ Ngoo gi re" da" ju" loo wa ayo, yo' sen: da" khyoo: ri goonham' gooco' mo lapi: pe: to" wigi hau: joem abui" shi" ri bui" wa khyoo: joem ri tid fu" too" bye:. Hau: lapi: dang: gi nanu" da" yu phara" soolhoo: joem yo' gung du: soolhoo: joem ri bui" nhang: zi nghoid ga nanu" tid ziri toem' pyam wa shid re" nghoid.

⁶ «Ngoo shid tid to" gu: dangain" akhid" bue" lo abye:. Nga" lapi: dang: jo ziri nanu" kham yu ca" da:. Akhid" ngoo shid phyang" atoin" shid yu" shi" da" khyoo: joem ju" loo wa da" khyoo: aseig joem ri ngoo nanu" ri tid kyoo" wa.

⁷ Akhid" za: ngoo hau: joem ri bui" nhang: nyid zi nghoid. Lid: lo da" ayo, moo hid: yhang: ti" zi abui" yu" shi" hau: zi bue" yu" nghoid rigi hau: khyoo: dangain" ri nanu" se' ga: tid goo" wa.

⁸ Nanu" gi thougtheung gyi koid to" zi khanham we' meing: fu" lo boem yoomo nanu" ri age loem da" khyoo: ri ngoo se'. He: gang mo nanu" khanham we' ashau" gyo: yu" nghoid ago". Dakhoin" we' nanu" nukhyab khyoo: ciwim yoomo aju" re" la.

⁹ «Byumyu" yi nga" myeing ri coung" nghei byid: goo" wa shid re" nga" nheig joem: yo: ziri ngoo zeing: ci:. Ngoo gi hau: ziri tau" yu pyam lho: nanu" ri aphyo' pyam wa.

¹⁰ Ngei ri myikhyoem' moo kyeung sain' pyam yhang: ti" kyi" khyeug kham zo: da" myi: moo ngoo nang ri jham" ca: too" bye:. Nghoid loug we' nang ce: phoug" adab ziri ngoo myang bye:.

¹¹ Ngoo koid zigi ngoo nya: shid re" koid zi nghoid ngoo gi nga" myeing ri ngi: ayoem" nhang: wa. Phung" yoeb ri gootu: hang" ri we' abo kham yu nhang: wa. Hau: zigi nga" re" nghoid ein: yoomo nga" re" za: nghoid» ga: tid da:.

Kuru gi Aseing wigi Khyen: To" da" Vhujhung: Nghoid

¹² Aseing tid zigi «Ngo wigi khe: to" da" Israela byu yi we"- nga" dang: ri tam" gyoo: ge'. Ngoo gi Mangsoo nghoid- xang: shi" yug we' lo" thang yug we ngoo Mangsoo nghoid.

¹³ Nga" lo, wigi mougmyid apoem: ayang: ri koid to" wigi mougkhung: ri pyo: nghoeb to" Mougmyid yo' mougkhung: ri ngoo khe: kaid lang" houg jang: ju" lo boem wigi nyang: nya: da" gung ri re" ci: shug byid: la.

¹⁴ «Nanu" dangain" bang: we" zeing: foem: re" lho: tam" gyoo: we'. Ngoo wigi khyen: too" su: wigi Babelon ri gyi zain: wa ga: ziri yu phara" joem khayug we' lapi: ayo" pi: nghoid ago". Ngoo nyang: ri koid noug nhang: da" moo" ri nyang: koid loo wa.

¹⁵ Ngoo gi nyang: ri dang: tid wigi khe: yu su: nghoid. Ngoo gi nyang: ri shu" thu yu wigi nyang: ri oung: doid nhang: wa.

¹⁶ «Akhid" nga" jhang tab tab re" lo wigi ngoo tid ziri gyo: yu ge'. Xang: shi" mo ngoo gi bang bang tid loo bye:. Houg: lho: nga" dang: khoin" joem gi khanham we' joeb byeung" re" da» ga: tid da:. (Akhid" myhang: thang Aseing gi nya: yoem: so' ngoo ri byid: wigi nhang: kaid abye:.)

Nya: Byumyu" yi Shid re" Aseing da" Soin' to" Khyoo:

¹⁷ Nanu" ri khyoid yu da" Aseing Israela da" gyeung" shang: Mangsoo tid zigi «Ngoo gi nanu" akyu" shid re" nanu" ri jhoug" shid byid: noug su: nanu" yhi: eung: da" khyoo: ri lhoem: shid byid: su: nanu" Aseing Mangsoo nghoid.

¹⁸ Nanu" nga" amyeing" dang: joem ri za: datam" gyo: nghoid rigi Khanham we' akain" da" gyid zoo: gyung: yhang: ti" mainkaid jeju" joem re" shid re" yau nyid wa. Gyid yam mo do, lo da" being: lhung" yo' dayhang: ti" oung: doid zigi re" dang moo ju" loo wa.

¹⁹ Re" amyed ashen yigi midcoo: yhang: ti" myo: loo wa. Nyangnu" khanham we' phyo' shoin' pyam ashau" goo" wa ein: ziri ngoo si' nhang: wa» ga: tid da:.

²⁰ Babelon mo phang: thu ge'. phang: loid loo" ge'. Ngei bu: tung" lu dang: ri nyho: tid we'. «Aseing gi nya: dei zoo: Israela ri khyoid yu abye:» ein: da" lu dang: ri khyi' khang" moo" khyoo: fu" kaid ge'.

²¹ Aseing gi nya: byumyu" yiri lung ziyo' kyug hei' da" dain" pyoid yoo khyo" shu" lid: lo" uri nyangnu" gyid ashed goo" nghoid da:. Nyang: gi nyangnu" shid re" lugboem mo gyid yau thu loo nhang: da:. Nyang: gi lugboem ri go, bang" loo nhang: wigi gyid yau thu loo nhang: da:.

²² «Yooboo thug: yi shid re" goem loem wa joyoo ajo,» ga: Aseing tid da:.