ESAIA 47 - Lacid Common Language Bible

Babelon ri Dang: Phyed Khyoo:

¹ Aseing tid zigi «Babelon we"-re" zhungtang mo gyo" wigi myidgung pheilhoug: boem" moo zhung: we'. Nang gi shid phyang" ayo" ge oung: pyam da" voomoo" zoomyi: gyeing" dayug yhang: ti" nghoid da:. Nghoid loug we' nang gi nu" nu" nham' nham' anghoid loo wa. Akhid" nang gi join nghoid abye:.

² Lug lheing: ri gyeug we' cen: moin" phei" gyeug we'. Re" myo, nghoeb za: pain" ri yu pyam we' re" byimi gi ri khyoid pyam we'. Gyid gyung: gu: dab yhi: wa re" mi sham' ri to' we'.

³ Byu yigi nang gung cen: nghoid ziri shau" myang re" boem wa. Nyangnu" nang ri yu" nyhoem: pyam lho: yu" sho' loo goo" wa. Ngoo gi latoo: phug wa. Ngoo ri hang" we' atoem' goo" wa» ga: tid da:.

⁴ Israela da" gyeung" shang: Mangsoo gi ngoonu" ri loid byoin nhang: kaid bye:. Nya: myeing gi myhang: thang Aseing nghoid.

⁵ Aseing gi Babelon ri «Pug zheig aga: ziyo' moug: coid khoug: moo zhung: jo, we'. Nyangnu" nang ri byumyu" yi da" khokham myhi' ga: akhi: loogoo" wa.

⁶ Ngoo gi nga" byumyu" yiri nheig yo: lho: nyangnu" ri nga" byu yi anghoid lo: da" khyo" koid wa. Ngoo gi nyangnu" ri re" yoem: so' khoug: moo kaid byid: bye:. Nang nyangnu" ri nheig khyeug myid aci: shug byid: nghoid da:. Apyaid gyi: bang: rilang" nang thain: thain: koid da:.

⁷ Nang gi nang khanham we' khokham myhi' bue" jo, wa jho: da:. He: joem ri re" nheigloem: moo akaid too" nghoid da:. Hau: zi dangain" khasu" thang loo" wa ziri we' nheigloem: moo akaid too" nghoid da:.

⁸ Pyo: khyoo: ri jheddab su: we"- he: ziri tam" gyoo: we'. Nang gi goug: nyu: tung" za: goem loem nyid ga: jho: nyid da:. Nang gi Mangsoo yhi' gyi: sheung: su: nghoid. Nang yo' du zi gootu: hang: anyid ga: nang tid da:. Nang gi cougmoo" khanham we' abui" wa ga: nang jho: da:. Re" zooshang: yi byug lo" da" kyi" khyeug khyoo: ri khanham we' akham zoo: wa ga: jho: da:.

⁹ Nghoid loug we' daso' kyeing" ri danyid" kyeing" ri Hau: gu: dangain" bue" loo wa Nang fa" da" phajhi" ri ci: yhung: nghoid loug we' nang re" yhoem: seing: phoo yo' re" zooshang: yiri ci: phyug wa.

¹⁰ «Nang gi nanya: akhyeing" da" moo" moo gyeing" nyang: gi jho: nyid da:. Nang ri hang" wigi we' azang" myang ga: jho: da:. Re" phajhi" yo' lasi laleug gi nang ri khyoo: vhang: shu" vhang: lo" da:. Houg: lho: nang gi nanya: gung ri ‹Ngoo gi Mangsoo nghoid- ngoo yo' du zi gootu: hang" anyid› ga: tid da:.

¹¹ Yau: khi" kyi" khyeug zigi re" adang moo ju" re" wigi re" da" fa" phajhi" ce: ja: wigi we' hau: ziri ayo" toem' pyam nghoid da:. Byo, yoin" zigi re" adang moo nyeigdain tung" ju" lo wigi khanham we' yhoebmo, amo, yu" da" ja: byo, yoin" nhang: wa.

¹² Re" da" fa" ziyo' main dain khain" pha' dangain" ziri zoem: ci: we'. Hau: joem ri nang ngi shi" ayo, mo ci: lo abye:. Hau: joem gi nang ri daja: ja: yo" pang" thoug byid boem abe. Re" gyivoo joem ri yo" kyug tang" kaid abe.

¹³ Nang phajhi" byid: dang: yo" yu sho' nghoid loug we' nang gi yoem: so' aboo nghoid da:. Nanu" lo, kyo' yu" bang:- kyi: ri yu" zhang: nyid bang: nghoid. Lhammoo" dakhyab thang: dakhyab ju" loo wa da" ayo, shid re" boid phyed bang: gi nanu" shid khyoo: re" wigi nanu" dang moo: bue" ri" wa da" akhyoo" mo nanu" ri khyoid yu nhang: we'.

¹⁴ «Nyangnu" gi khoofoo: khaid du joem yo' du wigi myi: gi hau: joem ri nge" pyam wa. Nyangnu" nya: gung rilang" ayo" khyoid yu boem goo" wa. Myiyham: gi nyangnu" shid re" gye" lung wa. Nyangnu" gi myi: ri langi: khyo" ayo" gang wa.

¹⁵ Re" pyaid goin" moo nang dang: myid: myid: lo- lo, kyo' yu" bang gi nang ri akyu" boo sho' koid loo wa zigi vhoo: mo ziyo' dakhyo" nghoid. Houg: zigi nyangnu" dangain" gi nang ri too" kho' lho: nyangnu" nya: khyoo: khyoo: lo" byug goo" wa. Nang ri khyoid yu wa dayug we' adeing goo" wa» ga: tid da:.