ESAIA 43 - Lacid Common Language Bible

Aseing gi Nya: Byumyu" yiri Khyoid Yu wa Dangsoo" To" da" Khyoo:

¹ Israela we' nang ri phain" so: to" da" Aseing tid zigi ‹Agyug- ngoo nang ri khyoid yu wa. Ngoo gi nang ri myeing lang: wigi khe: too" bye:- nang gi ngoo seing: zi nghoid.

² Nang gyid thoem" no, khyo" so" lid: lo" uri ngoo nang yo' dage" nghoid wa. re" da" yau: khi" gi nang ri aoung: pyam wa. Nang myi: khyo" so" lid: lo" uri nang angi" wa. Yau da" jham" yu" khyoo: ju" lo ri nang ri dam atab wa.

³ Ciwim ga ri ngoo gi re" Aseing Mangsoo nang ri khyoid yu su: Israela da" gyeung" shang: Mangsoo nghoid. Nang ri loid byoin nhang: wa shid re" ngoo gi Egutu ri ab pyam wa. ngoo gi Etiopi yo' Seba ri ab pyam wa.

⁴ Re" kangso' ri khyoid yu wa shid re" ngoo gi byumyu" yi dangain" ri ab pyam wa. Ciwim gari nang gi nga" shid re" phoug" dab da:. Ciwim gari ngoo nang ri jheddab lho: nang ri ngi: shab byid: wa.

⁵ Agyug- ngoo nang yo' dage" nghoid. Ve: da" bidthu shoid mo yo' ve: thang da" bidbang shoid mo ngoo gi re" byu yiri yhoem: khyoo: shu" loo wa.

⁶ Ngoo gi mougzhung: we"- houg: bang: ri nhang: kaid byid: we'. Mougpyi: we"- houg: bang: ri atoem' too" ein: tid wa. Nga" byu yiri ve: da" mungdain joem mo mougmyid khyi khang" moo" mo thu loo nhang: wa.

⁷ Nyangnu" gi nga" byu yi nghoid. Nga" phung" yoeb ri bang nhang: wa shid re" ngoo nyangnu" ri phain" to" zi nghoid» ga: tid.

Israela gi Aseing da" Sagse: Nghoid.

⁸ Mangsoo tid zigi «Nga" byumyu" yiri tarha" yung" khyoo: zheing" yu bye:. Nyangnu" gi myojid" dab nghoid loug we' yang nu" myo, jid, nghoid ago". nyangnu" gi nukhyab dab nghoid loug we' nyangnu" nujid, nghoid ago".

⁹ Tarha" joeb yu" wa shid re" byumyu" yiri zheing" yu we'. Nyangnu" yu phara" joem mo kha: yug gi ju" loo wa ayo, khyoo: ri Lapi: pe: la". Houg: bang: mo khayug gi akhid" bue" nyid ziri lapi: yo" pe: la" Nyangnu" jo ziri sagse: ci: shug wa shid re" nyangnu" dang: khoin" deungmain" ziri sagse: yo" ci shug byid: wa shid re" he: phara" joem ri nyangnu" da" sagse: joem ri shu" ri" nhang: wa.

¹⁰ Israela byumyu" yi we"- nanu" gi nga" sagse: nghoid ago". Ngoo gi nang ri nga" dei zoo: khyo" khyen: yu bye:. Houg: lang" nang ngoo ri se wigi loem" jeing" wa ziyo' ngoo dayug kyeing" Mangsoo nghoid ziri se' gyoo: wa shid re" nghoid. Ngoo mo lid wigi yu phara" gootu: anyid. Khanham we anyid yu" khanham we' nyid zi anghoid.

¹¹ «Ngoo dayug za: Aseing nghoid. Nang ri yo" khyoid yu su: ngoo dayug za: nghoid.

¹² Cibui" wa ziri ngoo lapi: pi: byid: wigi nang ri ngoo pang" thoug wa shid re" re" loo bye:. Tungbau yu phara" khasu: we' he: ziri khanham we' akoid yu" nghoid ago". Nang gi nga" sagse: nghoid da:.

¹³ Ngoo gi Mangsoo nghoid wigi khanham we' nghoid nyid wa. Nga" yoem so' mo hang" dayug we' ayo" phang: loid nghoid da:. Ngoo koid ziri hang" we' ayo" thid pyam nghoid da» ga: tid da:.

Babelon mo Phang: Loid Lo Khyoo:

¹⁴ Israela da" gyeung" shang: da" Mangsoo- nang ri khyoid yu da" su: Aseing tid zigi «Nang ri khyoid yu wa shid re" Babelon ri gyi koid wa gyidab da loem: ngoo nhang: kaid wa. Ngoo gi voomoo" khoem" moo" duang: joem ri phyo' khyo' pyam wa. Hougmoo nyid da" byu yi nyhoo: thui: ri kyi: ngoug thui: bue" loo nhang: wa.

¹⁵ Ngoo gi re" Aseing gyeung" shang: da" Mangsoo nghoid. Israela we"- ngoo gi nang ri phain" so: too" su: nghoid wigi ngoo gi re" khokham nghoid» ga: tid.

¹⁶ Goonham' Aseing gi panglai: khyo" lid: phyid lo" da" khyoodeing koid da:. Gyid lheing joem khyo" kho' lid: lo" da" khyoodeing koid da:.

¹⁷ Nyang: gi phyo' shoin' pyam' wa shid re" gyid dab moo" gyi myang: rheing" dab yo' myang: joem ri shu" vhu" she: da:. Nyangnu" gi leung gyoo" khare" wigi khanham we atoo' nghoid da:. Myikug myiyham: ri yo' dakhyoo" ti" moid said pyam da:.

¹⁸ Nghoid loug we' Aseing tid zigi «Lai lo da" ayo, moo bue" da" khyoo: joem moo nheig atei" goo". Goonham' bue" lid: loo bye: akhyoo" dang moo nghe: wigi anyid goo".

¹⁹ Ngoo koid wa nghoid da" moo" aseig ri zung" yu" we'. Hau: zigi bue" re" nyid abye:- nanu" hau: ziri akhid" yo" myang abye: go". Ngoo gi dain" pyoid yoo khyo" kho' lid: lo" da" khyoodeing ri koid wa. Hougmoo ngoo nanu" ri gyid zoo: gyung: joem yau byid: nhang: wa.

²⁰ Ngoo khyen: yu to" da" byumyu" yi gyid byid: wa shid re" dain" pyoid yo moo ngo wigi gyid gyung: joem ri yau nhang: lang" Siyoo gougnyhoug lam" joem lang" gi ngoo ri ngi: shab loo goo" wa. Khuidkoo" joem yo' ngho' Gola-ug joem gi ngoo ri coung" nghei re" boem wa.

²¹ Nyang: gi ngoonya: shid re" phain" so: to" da" nga" byu yi nghoid ago". Nyangnu" gi ngoo ri coung" nghei jikhoin" khoin" lo goo" wa» ga: tid.

Israela da" Yooboo

²² Aseing tid zigi «Nghoid loug we' Israela we"- nang gi ngoo ri he: pyam wigi nang ngoo ri anoku nghoid da:.

²³ Nang gi ngoo ri re" da" yang nghe' ngei" xoin" aci: ri" nghoid da:. re" da" xoin" joem yo' ngoo ri ngi: ashab byid: nghoid da:. Ngoo gi nang ri xoin" joem byid: wa mho' wigi yoovoin lid: avoin nhang:- shoem: nam pyo: ja: mho' wigi nang ri ngoo amyung: nhang:.

²⁴ Nga" shid re" nang shoem: nam pyo: ja: aqei byid:. Anghoid lang" re" da" gougnyhoug joem da" xu: wigi we' ngoo ri nheig adeig nhang: Houg gungthid re" yooboo joem wigi ngoo ri yoovoin lid: nhang: da:. Nang shoid da" moo" joem wigi ngoo ri myung doug nhang: lo da:.

²⁵ Nghoid loug we' ngoo gi re" yooboo joem ri khyoid byid: da" su: Mangsoo: nghoid. Ngoo ga: su: nghoid yoomo he: ziri ngoo koid da:. Ngoo gi re" yooboo joem ri thougtheung zei: ci: wa zi anghoid.

²⁶ Ngoonu" tarha" yung" khyoo: yhi: shang- nanu" da" yooboo zhug da" khyoo: ri ci: ri" we'. Nanu" jo da" shoid moo nghoid ziri sagse: ci: shug byid wa shid re" nanu" da" moo" ri tid shid yu" ge'.

²⁷ Shid phyang" xang: shi" mo nanu" da" phoug" phyid" yi yooboo shoid lo ago". Nanu" da" vhujhung: yigi ngoo ri thougtheung yooboo shoid lo ago".

²⁸ Nanu" da" vhujhung: yigi nga" gyeung" shang: joyoo ri ayung" alho' koid pyam ago". Hougsu" yoomo ngoo gi: Israela adang moo byo, yoin' zi bui" nhang: wigi Ngoo gi: ngoonya: byumyu" ri aphoug" akhyoid rue" zi shoug" nhang: wa» ga: tid.