ESAIA 25 - Lacid Common Language Bible

Coung" Nghei Byid: da" Jikhoin"

¹ Aseing we" nang gi nga" Mangsoo nghoid. Ngoo gi nang ri ngi: shab byid: wigi re" myeing ri coung" byid: wa. Nang gi mau" pho" moo" joem ri koid abye:. Goonham' mo nang soin' to" ziri jhug zug tung" nang koid abye:.

² Nang gi voomoo" joem ri byo, yoin" loo" nhang: lho: Gyidab voomoo" joem ri phyo' shoin' pyam abye:. Ngoonu" gyivoo ri koid da" khokham kho" joem gi apyaid atoo: moo bei: byug abye:.

³ Yoem: so' bo da" byumyu" yigi nang ri coung" nghei loo wa. Anau akhyoid koid da" byumyu" yi da" voomoo" joem moo nang gyoug phoug" byid: zi shau" loo wa.

⁴ Myung bang: yo' asho" ajhen: bang: gi re" jhang phang: re" abye:. Yau: khi" shau" da" ayo, moo goem loem zi shau" abye: go". Uglid ri phang: khoug: wa shid re" joyoo nyangnu" ri nang byid: abye:. Nge" lung jang" mo khoug: wa shid re" bid shoem: byid: bye:. Anau akhyoid koid da" byu yigi ngam" yo, mo uglid yo' dayhang: ti'

⁵ moug: kyug mo kyug hei' ziyo' dayhang: ti" khaid zain: da:. Nghoid loug we' nang Aseing gi ngoonu" da" gyivoo yiri tam" loo" nhang: da:. Bid lung nyid" mo ngam" da" jhoemmoug" thei" yo' dayhang: ti" anoug akhyoid koid bang: da" nyho: phoug: thui: ri nang tam" loo" nhang: da:.

Mangsoo Zooshug Pui" Zeing Daloem: Soin' to" Khyoo:

⁶ Myhang: thang Aseing gi mougmyid dang mo byumyu" dangain" shid re" zoo: noem gi zabyid yhid: gi yo' he: Ziun boem tho' moo zooshug pui" zeing daloem: soin' too" wa.

⁷ Hid: moo nyang: gi byumyu" dangain" adang mo nghoeb to" da" nheig koug da" jhoemmoug" pung ri yu pyam byid: wa.

⁸ Gyi sheing: da" Aseing gi shid: ziri apyaid atoo: mo phyo' shoin' pyam wa. Nyang: gi yugkhang" mo" da" ngoug byid joem ri soid pyam byid: lho: mougmyid goin" mo nya: byumyu" yi kham zo: lo da" ngi: yoem" ziri yu pyam byid: wa. Aseing nyang: tid bye:.

⁹ Hougsu" bui" lang" yugkhang" moo" gi «Nyang: gi ngoonu" Mangsoo nghoid. Ngoonu" nyang: ri loem khau: nyid lho: nyang: ngoonu" ri khyoid yu abye:. Nyang: gi Aseing nghoid. Nyang: ri ngoonu" loem khau: nyid wigi akhid" ngoonu" ngei pyo: nyid gau yi nyid. Ciwim gari nyang: ngoonu" ri khyoid yu abye:» ga: tid loo goo" wa.

Mangsoo gi Moba ri Yooboo Dam byid: wa Khyoo:

¹⁰ Aseing gi Ziun boem ri goem loem byid: loo wa. Nghoid loug we' Moba byu yigi nu: khyid" moo khoofoo: ri nang nhe" pyam ziyo' dayhang: ti" nang: nhe" pyam zi shau" boem wa.

¹¹ Nyangnu" gi gyid shab shab soin yhang: ti" nyangnu" lo, ri yhoin" kaid loo wa. Nghoid loug we' Mangsoo gi nyangnu" ri doin: nhoeb pyam wigi nyangnu" lo, joem gi asho" ajhen: noeb loo" goo" wa.

¹² Nyang: gi Moba da" gyidab voomoo" joem ri houg joem da" myhang: da" vang joem yo' dage" phyo' shoin' pyam wigi hau: joem ri pheilhoug: boem" khyoo: leung gyoo" loo" nhang: wa.