ESAIA 24 - Lacid Common Language Bible

Aseing gi Mougmyid ri Yooboo Dam Byid: wa khyoo:

¹ Aseing gi mougmyid ri lhu: phyo' pyam wigi jham" coug: youg koid loo wa. Nyang: gi mougmyid ri lheing: kaid wigi hau: byu yiri abyoo: asain" koid pyam wa.

² Khainjung yi yo' mung" byu yi join yi yo' join seing: yi qei bang: yo' oung” bang:- ngho" byid: bang: yo' ngho" yu bang:- yoo" zoo: bang: yo' myung shoo" bang:- yugkhang" moo" gi vhu" pi: lo, kyo' daja: za: thung" shoug" loo goo" wa.

³ Mougmyid gi phyo' mhoin' pyam wigi byo, yoin" lo" byug wa. Aseing tid too" bye: yoomo hau: zi bue" loo wa.

⁴ Mougmyid gi kyug wigi yhau" lo" byug da:. Mougmyid goin" gi yoem: neing: lo" ago". Myid gung yo' mougkhung: gi yoem: loo" wa.

⁵ Byu yigi mougmyid ri Mangso tarha" joem ri shoid da" khyo" apyaid atoo: shid re" nyang: koid to" da" dang: theing ri phyo' shoin' pyam khyo" ayung" alho' koid pyam da:.

⁶ Houg: yoomo Mangsoo gi mougmyid ri nheing" kaid da:. Mougmyid byu xangsu: yigi nyangnu" koid lo da" lo, moo" shid re" aphoug" byid: nyid ago". Nyid deing mo, je je neing: lo" ago".

⁷ Zabyid nei joem yhau" lo ” wigi Zabyid yhid: gi myung loo wa. Goonham' ngei phyo: bang: yugkhang" moo" gi akhid" koug ago".

⁸ Nyangnu" da" gye" pyo: music thui: gi shoem: lo" byug wa.

⁹ Zabyid yhid: ri coung" da" ngei pyo: yug yoo jikhoin" khoin" zi ajo, loo wa. Hang" we' hau: ziri ayo" jham" yu" loo wa.

¹⁰ Voomoo" khoug: mo ja: khang" moo" gi anhung akhoid bue" wigi gau: wa shid re" mung" byu yigi nyangnu" yhoem: ri khoem" kyang kyang pyam ago".

¹¹ Zabyid yhid: ajo, loo yoomo mung" byu yigi fu" moo" khyoo: moo: nyho: nyid boem ago". Ngei pyo: zigi apyaid atoo: moo thang byug bye:. Hau zigi mungdain: khoug: mo khaid thu pyam' zi shau" abye:.

¹² Voomoo" gi byo, jo, da:. Hau: da" khoem" moo" joem gi phyo' pyam byid: zi shau" da:.

¹³ He: zigi mougmyid dang mo byumyu" khang" moo" moo bue" loo wa. Agam khang" moo" mo zhainloin: shi" joem baid shui: khyo' lho: zabyid nei moo zabyid shi" athang: amyed" phyo' yu pyam shoug" lang" hau: zigi shivoo yhoem" da" lo" thang ayo, yhang: ti" nghoid loo wa.

¹⁴ Kangso' dei wigi nyid deing gyoo" bang gi jikhoin" khoin" loo goo" wa. Bidvang shoid moo nyid bang: gi Aseing khayhi' gyi: sheung: su nghoid ziri tid goo" wa.

¹⁵ Bid thu shoid moo nyid bang: gi nyang: gi coung" nghei byid: loo goo” wa. Panglai: gyid yam cang nyid da" byu yigi Israela da" Aseing Mangsoo ri coung" nghei byid: loo goo" wa.

¹⁶ Deingmain" da" byumyu" Israela da" coung" nghei jikhoin" thui: ri mougmyid tho' mo ve: thang da" joyoo mo ngoonu" shau" gyo: loo wa. Nghoid loug we' nga" shid re" myid byu khyoo: ajo,. Ngoo gi thang lo" nyid bye:. Goemlu yigi xo' lho: ngoo ri ab pyam wigi nyangnu" loem age" jhug azug zigi je je xo: loo nyid da:.

¹⁷ Yugkhang" moo" nga" dang: ri tam" gyoo: byid: da:. Gyug dain khyoo: joem duang khuang" joem lhid joem gi nanu" ri lang" nyid da:.

¹⁸ Gyug dain ja: moo phang: loid wa soin yug hang" we' duang: khuang" khoug: khyoo: gyo" vang loo" wa. Duang: khuang" mo phang: loid wa soin' yug hang" we' lhid moo myi" boem wa. Mougkhung: mo moug: moo" vo gyoo" lo lho: myidgung apoem: ayang: joem noin" loo wa.

¹⁹ Myid gung gi bug go, lho: agang gang bue" byug wigi go jo, wa.

²⁰ Mougmyid gi yhid: yed su: yhang: ti" nyang: nyang: leung baid yen" wigi uglid yoem" khoug: mo zoem" khyam" yo' dayhang: ti" yhoin leung loo wa. Myid gung gi nya: yooboo wigi nhe" zhung: gyoo" loo" shau" wigi hau: zigi byo, yoin" lo" wigi khanham we' ayo" doem to' loo wa.

²¹ Atho' mo yoem: so' yoo" bang: yo' mougmyid mo vhoebkhang" bang: ri Aseing wigi yooboo dam byid: wa ayo, ju" loo wa.

²² Mangsoo gi duang: khuang" khoug: mo thung: byu yi yo' dayhang: ti" khokham yiri dage" zheing foem: too" nhang: wa. Nyangnu" gi yooboo dam byid: da" ayo, ju" sho' nyang: gi houg bang: ri thung: lhung too" wa.

²³ Lhammoo" no, loo" khari" wa. Bid azhoo: loo: wa. Ciwim gari myhang: thang Aseing gi khokham bue" loo wa. Nyang: gi Yerusalem ri Ziun boem mo vhoebkhang" wa. Byumyu yi da" vhujhung: yigi nya: da" phung" yoeb ri myang loo goo" wa.