Ephesu 6 - Lacid Common Language Bible

Myhi, Phoo, Yi Yo' Zoo: Yi

¹ Zoo: shang yi we"- nanu" da" myhi, phoo yi da" dang: ri tam" gyo: nyid ge'- hougsu" koid khyoo: gi Khristain yi da" koid eung: moo" nghoid.

² Jhoem: mungdang: moo re" myhi, yo' re" phoo ri phau" myang: nyid we' ga: da" dang: gi Mangsoo tid to" da" xang: shid" mo amyeing" dang: nghoid.

³ Hau: da" dang: soo" gi mougmyid tho' moo kang: sheing: myo, myi: lho: nyid gi nyid de zi shau" wa" ga: zi nghoid.

⁴ Myhi, phoo yi we"- nanu" da" nya: zoo: yi ri nheigloem: yoin" wa khyo" ci" we' akoid byid nyid goo"- hau" gung khoo:- nyangnu" ri Khristain byu nyid byu yab, khyoo: khyo" jhau" mo, khu: gyi: kaid' ge'.

Yhoem: Seing: Yi Yo' Join, Yi

⁵ Join, yi we"- Khristu ri tam" gyo: phau" myang: nyid yhang: ti"- nanu" da" xangsu: yhoem: seing: yi ri gyoug phau" ziyo' nheigloem:" dain: khyo" tam" gyo: nyid ge'.

⁶ Yhoem: seing: yi yu" nyid yoomo myonhoo: rua nau khyo" za: akoid goo"- Khristu da" join, yi yhang: ti"- Mangsoo myid vho: ziyo' dakhyoo" ti"- nheigloem: bain' sho' yo' zei: so' nyid ge'.

⁷ Byu shid re" zei: byid: yhang: ti" za: anghoid- hau: Aseing: shid re" yhang: ti"- vho: ngei nheigloem: yo' nanu" da" moozoo" ri zei: nyid ge'.

⁸ Join, yi ri nghoid loug we' join, seing: yi ri nghoid loug we' Magsoo gi yug khang" moo" ri nyang: zei: lo ge da" moo" zo" shid re" coung" byid: aphoug" shang" loo wa ziri boin: so" nyid ge'.

⁹ Yhoem: seing: yi we"- nanu" we' houg: yo' dakhyoo" ti"- nanu" da" join, yi tho' moo cang zei: so" nyid ge'- nyangnu" ri kyoug nhain' khyoo: no: pyam' ge'- nanu" yo' nanu" da" join, yi gi moug: khung: mo Aseing: dayug yo' za: sen: bang: nghoid- hau" aseing: gi yug khang" moo" ri myonhoo: akhyin: loo: za: tarha" dang: phyed' nyid su: nghoid ziri myid boin: nyid ge'.

Mangsoo Da" Gyizi Gyikhoo: Joem

¹⁰ Lo" thang jang" moo hau: Aseing: yo' dagung za: bue" khyo" wigi we' nya: da" myonhoo: phung" yoeb, yoem: vhoo" khyo" we' nanu" da" yoem: zeing so' zeing ri loung: yu nyid ge'.

¹¹ Yu wigi mo" da" age khyoo: dangain" ziri nanu" lhoem: oung: doid pyam baja"- Mangsoo nanu" ri byid: to" da" gyikhin" dangain" ziri yu void zhoung ci: loo: ge'.

¹² Khasu" wim gari ngoonu" gi byu xang: su: yi yo' khaid zain: go" nyid zi anghoid- moug: khung: moug: laid' phyoo" moo nyid da" akhyeing" ashoeb da" yu gyiphung: moo" joem yo' we' he: coid no, thu: jo, da" apyaid' ri vhoeb khang" nyid da" coid doem: boo" doem: da" zoug: yi amyeing" akhang" ci: bang: yo" we' zain: go" nyid boem.

¹³ Hougsu" nghoid nyid yoomo Mangso da" gyikhin' dangain" ziri akhed" nya: nyang: yu void: ci: loo: ge'- hougsu" lang" she' akhyeing" ashoeb ziyo' yau: khe" da" bidnyid ju" lo da" uri nanu" ri gyivoo joem khaid zain: said' lo ziri loem: yo" oung: pyam' wa zi nghoid- lo" thang moo ju" sho' bain' zain: pyam thang: ri we'-nanu" gi geing" geing: teing teing theung shang" yab, jo, boem ca" shi" wa.

¹⁴ Houg: yoomo nanu" da" phyid" doem: moo deingmain" khyoo: ri phyid" cu" su" cu" ci: lho: deing byeung" da" khyoo: ri re" da" yang gang nghoeb koid lho: wigi jen" jen" soin yab, jo, ge'.

¹⁵ Ngei pyo: da" ngei bu: lu dang: kho" kyoo" wa shid re" jen" jen" nghoid nyid da" khyoo: ri re" da" khyid: moo khyid: baid' yhang: ti"- baid' ci: lho: theung" shang" yab, jo, loo: ge'.

¹⁶ Hau: tho' moo gootu: loem" jeung" ein: da" goo ri khanham we' vhoid ci: ge'. Khasu" wim gari nanu" gi hau: goo yo' akhyeing" ashoeb su" da" myi: myoo: dangain" ziri lhoem: yo" said' oung: pyam wa zi nghoid.

¹⁷ Hau: lho: khyoid yu khyoo: ri sham: mug yhang: ti" yu zhoung" ci: lho: Venyi khyo" byid: to" da" Mangso mungdang: ein: da" lhab, sham: ri we' voin, ci: ge'.

¹⁸ Mangso jang" mo pang" thoug khyoo: yo" yu baja"- goeb khyo' akyu" mho' ziyo' he: khyoo: dangain" gu: ri zei: so' nyid ge'- gyeungshang: da" venyi vhu" she: ziyo' dakhyoo" ti"- ayo, khang" moo" moo akyu" mho' nyid ge'- he: gang mo nheigloem: soozoo: lheung: nyid ziyo' khanham we' asoem" akham' goo" Mangso byu yi shid re" khanham we' akyu" mho' nyid ge'.

¹⁹ Ngoo tid wa zi jen" uri mangsoo ngoori mungdang: byid: baja"- hau: ngei bu: lu dang: da" no, thang dangkang: ri agyug avoem, loo:- seing" yang" yang" yo" tid kyoo" sho' nga" shid re" we' akyu" bo mho' ge'.

²⁰ akhid" ngoo gi thung: loung" jo, su: danghoid loug we' hau" ngei bu: lu dang: ge shid re" lagyoo: zeing dayug nghoid- hau: ngei bu: lu dang: gi ri kho" kyoo" wa shid' re" ngoo kho" kyoo" eung: ziyo' dakhyoo" ti"- seing" yang" ziyo' yo" tid kyoo" baja"- akyu" bo mho' byid: nyid ge'.

Lo" Thang Mo Vhu" Kaid' Dang:

²¹ Ngoo ciwim nyid ziyo' khasu" koid nyid da" khyoo: ri nanu" yo" si' sho' hau: Aseing da" moozoo" moo lho: nheigloem: zung" da" dei zoo- nghoid da" ngoonu" jheddab mang: nhung" phoo- Tukhiku gi nanu" ri nga" khyoo: lo tid kyoo" wa zi nghoid.

²² Houg: yoomo ngoonu" dangain" bang: khasu" wim nyid da" khyoo: lu dang: dangain" nanu" ri tid kyoo" baja"- houg: yo' nanu" ri yoem: byid: baja" ein:- nanu" jhang khyoo: ngoo, nyang: ri nhang: kaid' zi nghoid.

²³ Nyha" Phoo, Mangsoo yo' Aseing Yesu Khristu gi Khristain mang nhung" yi dangain" bang: ri ngei pyo: khyoo: ri jheddab ziyo' loem" jeung emyid kaid' byid: baja" o".

²⁴ Khanham we' abei: ashaem: da" jheddab nheigloem: yo' ngoonu" da" Aseing Yesu ri jheddab nyid bang: dangain" mo jhangk moo Mangso da" jeju" gi dajo, jo, baja" o".