Ephesu 2 - Lacid Common Language Bible

Shid: Jo, Jang" Mo Dei Nyid Jang" Khyoo:

¹ Lai loo" bye: da" ayo, moo nanu" gi nanu" nyang: atam" gyoo: wigi shoid vhang: lo" da" moozoo" yo' youg: noo yooboo yoomo venyi: khyoo: moo shid: mang danghoid loo: ago".

² Hau: da" ayo, moo nanu" gi mougmyid da" akhyeing" ashoeb khyoo: moo za: cang lo" boem wigi akhui" Mangsoo ri aphoug" akhyoid koid nyid da" byu yi ri vhoeb khang" nyid da" venyi gi moug: laid moug di ri vhoeb khang" lho: yoem: so' bo da" venyi joem jhang khyoo: nanu" cang lo" boem abye: go".

³ Gyeung" nyang: ngoonu" dangain" bang: we' nyangnu" yhang: ti" ngoonu" nya: da" gung sho" aco' ajhoid da" khyoo: moo cang lo" lho: gung shoo" vho: ngei da" khyoo: yo' nheigloem: da" khyoo: ri cang zei: lo yu" boem bye. Ngoonu" da" nyid yab, khyoo: gi gootu: byu yi yo' dakhyoo" ti"- Mangsoo nheig khoo" yo: da" dam shau" moin: mo, nghoid nyid.

⁴ Nghoid loug we' Mangso da" nheig khyeig shoo" myen: khyoo: gi athang agoin zi nghoid wigi nyangnu" ri jheddab da" jhed khyeing: kang: khyeing: gi gyi: sheung: jo, lho.

⁵ Ngoonu" da" atam" gyoo: loo: shoid vhang: lo" da" khyoo: yoomo venyi moo shid: leung jo, uri Khristu yo' dage" ngoonu" ri doem dei loo nhang: bye hau: khyoo: gi Mangsoo da" jeju" yo' ngoonu" gi khyoid yu zi shau" da" khyoo: nghoid.

⁶ Ngoonu" gi Khirstu yo' dadeing: daloem: za: bui" bye: yoomo Mangsoo gi ngoonu" ri moug: khung: moug di tho' moo nyang: yo' dage" vhoeb, khang" nyid wa shid re" Khristu yo' dage" shid: jang" mo doem dei to'' loo nhang: bye.

⁷ Nyang: hidsu" koid da" khyoo: gi Khristu Yesu moo ngoonu" ri toin" shid da" nya: jhed khyeing: kang: khyeing: khyo" wigi nya: da" jeju" gi gooki" lid' gyi: sheung: jo, da" khyoo: ri myang se' loo wa shid re" toin" shid nyid.

^8-9 Khasu" wim gari loem" jeung" khyoo: yoomo nanu" gi Mangso da" jeju" khyo" za: khyoid khyi: yu zi shau" khyoo: nghoid. Hau: zigi nanu" yoem: kaid' yoomo yo" yu da" akyu" anghoid - hang" we' phau: khuang jang: ajo, baja"- Mangso da" jeju" jhung: shug za: danghoid.

¹⁰ Ngoonu" gi Mangsoo nyang: myid vho ziyo' dakhyoo" ti"- phain" so: to" zi shau" mo, nghoid nyid wigi Khristu Yesu yo' ngoonu" deung: shoin" to" khyoo: yoomo nyang: gi ngoonu" ri ge da" moozoo" joem shid re" phain" so: too" bye- hau: ge, da" moozoo" joem ri ngoonu" zei: soo, wa shid re" soin' nyheung too" byid: bye.

Khristu Yo' Dagung Dashoo" Za: Nghoid Khyoo:

¹¹ Nyang: nya: da" gung ri athang: yham" mo, ga: tid nyid da-Yuda byu yi wigi Athang: ayham" mo, ga: wigi myheung too" shau" mo, gung sho" shoid khyo" tungbau byumyu" bue" nyid mo, nanu" we' nanu" nya: da" lid loo bye: ayo, mo, bue" loo bye: da" khyoo: joem ri boin: so" nyid ge'.

¹² Hau" ayo, moo nanu" gi Khristu yo' gang: go" jo, boem ago- nanu" gi tungbau byumyu" yi nghoid nyid wigi Mangsoo khyen: yu da" byumyu" moo aboo bang: nghoid nyid boem nya: byumyu" yi ri byid: to" da" Mangso dang: theing khoin" yo' sen: da" dang: soo" khoin" moo akhang mo nanu" gi abo tho' moo agoo"- mougmyid moo ce" nheig byu jang: we' ayoo"- Mangsoo we' ayo" khyo" nyid lid lo boem abye: go.

¹³ Nghoid loug we' akhid" koem gi Khristu Yesu moo zheung" shoin" too" bye: yoomo ve: gang: nyid lo yu" da" manu" gi Khristu da" shid: kham, xoin" yoomo shu" tain" tab yu zi shau" boem bye.

¹⁴ Khasu" wim gari Khristu nyang:- Yuda byumyu" yi yo' tung bau byumyu" yi ri damyu" za: bue" loo nhang: wigi ngoonu" ri ngei pyo: myenjham" khyoo: byid: bye nyang: gi nya: da" gung yo' nyang:- nyangnu" ri byumyu" kho' to" wigi nyang: gi nya: da" gung yo' nyang:- nyangnu" ri byumyu" kho' to" wigi nyang: cang" nya: gyi bui" nhang: go" da" kyo lhung ri phyo' shoin pyam byid: bye.

¹⁵ Nyang: gi nyang: yo' dagung dashoo' za: bue" lo khyo" wigi byu eig myu" ziri byumyu" aseig damyu" za: bue" loo nhang: lho: ngei pyo: myenjham" da" khyoo: byid: wa shid re" nyang: gi Yuda tarha" da" amyeing" dang: yo' tarha" joem ri phyo' shoin pyam bye.

¹⁶ Khirstu gi pyang" zeing tho' moo shid: kham: khyoo" wigi nyangnu" da" gyi koid go" khyoo: ri lhu: phyo' lhu: shoin shoem" shoung: pyam lho: wigi nya: da" pyang" zeing khyoo: khyo" hau: byu eig myu" ziri damyu" za: Mangso jhang khyoo: deom shu" loo" bye.

¹⁷ Hougsu" Mangsoo yo' ve: gang: jo, da" nanu" tung bau byumyu" yi ri we' Mangsoo yo' jhang byid da" Yuda byumyu" yi ri we' Khristu ju" re" wigi hau: ngei pyo: myenjham" khyo: da" ngei bu: lu dang: gi, re" kho" kyoo" byid: bye.

¹⁸ Tungbau byumyu" yi yo' Yuda byumyu" yi zheung: nghoid da" ngoonu" dangain" bang: gi Khristu da" gung moo hau: venyi daloem: za: yo' Pho, da" shid khoin" khyoo: yo" vang lo" beom bye.

¹⁹ Hougsu" nghoid yoomo akhid" nanu" gi tungbau byumyu" hougsu" anghoid lang" gi nghi: zain' byumyu" yi anghoid boem loo- akhid" nanu" gi Mangso byumyu" yi moo bo da" moug: seung: byumyu" yi nyang: nghoid wigi Mangso da" ikoin deungkhu: byu yi nyang: nghoid bye.

²⁰ Nanu" gi lagyoo: yi yo' lapi: yi zhoug to" da"-apoem: ayang: moo poug zhug do, loo" shau" mo, we' nghoid- Khristu Yesu nyang: koem gi hau" yhoem: mo geung: teung ayang: lug boem nyang: nghoid bye.

²¹ Nyang: gi he: noku yhoem: goin" ri geing; teing gyi: sheing; nhang: su; nghoid yoomo hau: zigi Aseing: ri ab noung" da" noku yhoem: bue" loo bye.

²² Khristu yo' dagung dashoo" za: bue" khyo" wigi nanu" we' gootu: da" byumyu" dangain" yo' dage" Mangsoo gi nya: venyi khyo" nyid nyid da" joyoo daloem: byu yi" we' khyo" we' nyheung zhug to" zi shau" boem bye..