Ephesu 1 - Lacid Common Language Bible

¹ Mangsoo myid vho: nyid ziyo' dakhyoo" ti"- Khristu Yesu da" lagyoo: aya: moo nyheung too" shau" su:- ngoo Polu mo wigi Ephesu voo moo nyid lho: Khristu moo dadeing: daloem: za: voin: tang: koid nyid da" Mangso byu yi jhang khyoo: dang: pyeung: kaid.

² Ngoonu" da" nya: phoo Mangsoo yo' Aseing Yesu Khristu gi nanu" ri jeju" yo' ngei pyo: khyoo: gi dabyid: nyid baja" o".

Khristu Mo Venyi Mainkaid Byid: Da" Jeju"

³ Ngoonu" da" Aseing Yesu da" nya: phoo Mangsoo ri jeju" boin: nyid boem shang o" Khasu" wim gari ngoonu" gi Khristu yo' dadeing: daloem: za: bue" loo bye: yoomo nyang: gi moug: khung: moug di tho' mo venyi yo' sen: da" mainkaid jeju" khyoo:- ja: khang" moo" ri byid: nyid bye.

⁴ Nyhang" nu" gi nya: da" shid khoin" moo gyeungshang: lho: yooboo adab loo: baja" ga: ngoonu" gi Khristu yo' dadeing: daloem: za: bue" lo khyo" wigi moug: phain" myid aphain" shi" mo lang" Mangsoo gi ngoonu" ri khyen: yu too" bye- nyang: gi nya: da" jheddab nheigloem: khyo" wigi Mangsoo gi Yesu Khristu khyo" wigi ngoonu" ri nya: zooyi ga: yhen: yu wa shid mo myid phyed too" bye.

⁵ Hau: khyoo: gi nyang: myid soin: ziyo' vho: ngei khyoo: nghoid.

⁶ Nyang: jheddab da" nya: zoo: khyo" wigi aphoug" amho, loo: ngoonu" ri byid: da" jeju" jhung: shug yoomo phung" yoeb, bo da" nya: jeju" ri coung" nghei boem shang.

⁷ Khasu" wim gari Khristu gi xoin" du: khyo" shid: kham: ziyo' ngoonu" ri loid byoin, loo" nhang: bye- hau: zigi ngoonu" da" youg: noo yooboo ri khyoid pyam byid: wa da" khyoo: nghoid- nyang: ngoonu" ri hid: yhi' agoin ayu: byid: to" da" Mangso jeju" gi khayhi' gyi: sheung: jo, bye: lha". Nya: da" phajhi" juyhi: khyo" we' nheigloem: phajhi" dangain" yo we'.

⁸ Nya: jhedab nheigloem: khoug: mo no, thang khyoo: ngoonu" ri toin" shid' bye.

⁹ Mangsoo gi nyang: myid soin: to" khyoo: ri koid lho: Khristu khyoo" wigi joeb, byeung" loo nhang: wa shid re" myid phyed' too" bye: da" nyang: yhoem" too" zau" to" da" soin' nyheung to" khyoo: ngoonu" ri si' nhang: bye.

¹⁰ Ayo, bidnyid byeung" loo lang" gi Mangso wigi joeb byeung" loo nhang: wa da" hau: soin nyheung lo" da" khyoo: gi moug: khung: moug: di mo we' myid' jang: tho' moo we' phain" too" moo too" dangain" ri Khristu moo dadeing: daloem: za: bui" wa khyoo: nghoid.

¹¹ Jo, moo jo, koem gi Mangso da" myid soin nyheung lo" da" khyoo: yo' myid phyed' to" khyo" bue" loo bye- hau: lho: xang: shid" mo myid soin to" da" khyoo: moo ayang: qei" lho: Khristu moo dadeing: daloem: za: nghoid nyid khyo" wigi nyang: myid soin to" khyo" nyangnu" ri nya: da" byumyu" yi bue" loo wa shid mo khyen: nyheung too" bye.

¹² Hougsu" nghoid rigi Khristu moo xang: shid" mo myid byu too" bang: ngoonu" gi Mangso da" myonhoo: phung" yoeb ricoung nghei nyid boem loo shang o".

¹³ Nanu" ri khyoid yu khyoo: byid: da" hau: deungmain" da" mungdang: ein: da" ngei bu: lu dang: ri nanu" tungbau byumyu" yi shau" gyo: boem da" uri nanu" we' Mangso da" byumyu" yi bue" lo abye: go- Khristu ri nanu" loem jeung" boem bye: nghoid rigi nyang: tid too" khare" da" gyeungshang: venyi: ri byid: yoomo nyang: gi nanu" da" Aseing: nghoid nyid bye: khyoo: ri dazid thung" byid: bye.

¹⁴ Hau: da" gyeungshang: venyi gi Mangsoo nya: byumyu" yi ri byid: to" da" dang: soo" khoin" ri ngoonu" shau" kham: yu wa da" pakham: nghoid nyid hau: zigi Mangsoo gi nya: da" byumyu" yi ri joeb byeung" da" loid byoin nhang: da" khyoo:- ngoonu" ri nheig shid: nheig deig nhang: nyid zi nghoid- ngoonu" gi nya: da" myonhoo: phung: yoeb, ri coung" nghei byid: nyid boem shang o".

Polu Da" akyu" Mho' Dang:

¹⁵ Hougsu" nghoid yoomo nanu" gi Aseing Yesu ri loem" jeung nyid bye: ziri we' Mangso da" byu yi ri jheddab nyid bye: da" khyoo: ri we' ngoonu" shau" gyo: jang" mo wigi

¹⁶ Nanu" da" shid mo Mangsoo ri anoo: ayab, jeju" boin: zoore"- nga" akyu" mho' jang" moo nanu" ri daboin: so" nyid.

¹⁷ Nanu" Mangsoo ri je" se' loo goo" baja"- nanu" ri phajhi" boo nhang: lho: Mangsoo khyo" yo" pang shug da" Venyi nanu" ri byid: wa shid re" phung" yoeb, bo da" phoo- nanu" da" Aseing Yesu Khristu da" Mangsoo moo ngoo mho' nyid.

¹⁸ Hau: lho: wigi Aseing: nanu" ri nheig byu khyoo: moo khe: yu too" bye: ziri we' Aseing: gi nya: byumyu" yi ri byid: wa ga: da" mau" pho" jeju" agyid asoo: joem gi -

¹⁹ Khamyho, agoin ayu: nghoid nyid da" khyoo: ri we' Aseing: ri loem" jeing" bang: ngoonu" moo nya: yoem: so' gi khayhi' gyi: sheung: jo, ziri we' nanu" shau" myang se' lo boem baja"- nanu" da" nheigloem: ung: khoug:- soozoo: lheung: lo wigi nya: da" bidbang ri myang loo: baja"- ngoonu" moo moo" zei: nyid da" he: da" yoem: so' gi

²⁰ Khirstu ri shid: bye: jang" mo doem dei to'" loo nhang: wigi moug: khung: moug di mo Mangso lo, yo shoid moo zhoung: jo, nhang: da" uri ci: yhoung: da" yoem: moo" so' moo" nyang: nghoid bye.

²¹ Hau: joyoomoo Khristu gi moug: khung: moug di: ri vhoeb khang" nyid mo, amyeing" akhang" yoo" bang:- yoem: so' boo bang:- Aseing yi dangain" bang: tho' moo vhoeb khang" byid wigi nya: myonhoo: ngei lang: gi he: mougmyid yo' thang: phyang" pyaid ju" loo wa da" mougmyid tho' moo amyeing" akhang" yoo" bang: dangain" tho' moo je gyi: jo.

²² Mangsoo gi jo, moo jo, nyid moo nyid ri Khristu da" khoovoo: khoug: moo kaid' to" wigi dangain" da" atho' moo gyi: thang da" Aseing: bue" nyid khyo" nyang: ri phung: khyoo: ab, byid: bye.

²³ Hau: da" phung: gi Khristu da" gung doem: nghoid wigi joyoo khang" moo" mo dangain" rigi nya: gung du: nyang: joeb byeung" nhang: da" joeb byeung" khyoo: nghoid.