DANG: ZHOEM 9 - Lacid Common Language Bible

Phajhi" Juyhi: Yo' Akoo" Adau: Da" Khyoo:

¹ Phajhi" juyhi: gi nya: yhoem: ri zeing bung: moo" nyhed loem: zhoug lho: koid to".

² Nyang: gi gougnyhoug dadu: ri said lho: wigi zabyid yhid: moo: nam, pyo: macid" yeing bo phoung: lho: zo: shug pui" ri soin, nyheung to" abye:.

³ Voogung da" myhang: thang joyoo mo yhe: yoid khe: kaid wa shid re" nyang: gi nya: da" join' myhi' joem ri nhang: kaid wigi

⁴ «Aboin: agyeung: da" byu yi we"- vang loo ge"» ga: wigi yoid khi: nhang:- nheig agyeung: bang: ri nyang: tid zigi

⁵ «Ri" ge'. Nga" zoobui" moo: zoo: ge'. Ngoo phoung: to" da" zabyid yhid: ri shug we'.

⁶ Aboin: agyeung: da" byu phung: ri too" kho' lho: kangso' dei nyid we'. Lasi, phajhi" moo: cang so" loo" ge'.» ga: nyho: yoid nhang:.

⁷ Phau: khuang nghoid boin: nyid da" byu yiri nang so' koid so' nyheung nghoid rigi juang" yi pyam, ziza: nang dashoug" wa age da" byu yiri nang jhau" byid: mhoo, byid: nghoid rigi no zi nang shoug" wa nghoid.

⁸ Phau: khuang nghoid boin: nyid da" byu ri khanham we' so, koid so, nyheung khyoo: akoid. Hougsu" koid yoomo nyang: gi: nang ri anoug angei zi wim loo wa nghoid loug we' phajhi" bo da" byu yiri nang so, koid so, nyheung: nghoid rigi:-nyang: gi nang ri phau" myang: loo wa zi nghoid.

⁹ Phajhi" boo su: ri nang tid kyo" da" khyoo: ce" ja: nghoid loug we' nyang: ri phajhi" je" si' nhang: nyid. Deing byeung" da" byu dayug ri nang ce" ja: tid kyoo" nghoid loug we' nya: da" lasi phajhi" ri loung: loo" nhang: nyid.

¹⁰ Phajhi" boo su: bui" wa shid re" nang giAseing ri xang: shed" phau" myang: ca". Nang gi gyeung" shang: su: dayug ri se' nghoid rigi nang ri: se' gyo: phoid yu da" phajhi" yo" yu bye:.

¹¹ Phajhi" juyhi: gi nang ri kang: sheing: nhang: wa zi nghoid.

¹² Nang phajhi" juyhi: shoug" kham: yu ci: nghoid rigi nanyang: akyu" shoug" kham' zoo: wa. Hau: ziri nang ngeug pyam, nghoid rigi nanyang: yau: khe" kyi" khyeug khyoo: za: shoug" wa nghoid.

¹³ Ko" fang: da" khyoo: gi myeing" myo: akhyoid akhyang: ziyo' lasi phajhi" abo da" sho' ase' myiyi: yo' du nyid.

¹⁴ Hau: myiyi: myhi' gi nya: yhoem: khoem" duang: moo: zhoung: jo- voogung moo myhang: thang joyoo mo zhung: jang: moo: zhoung: jo, ziyo'

¹⁵ Nyangnu" da" moo" zoo" khyoo: so" lid: lo" da- byu yiri

¹⁶ «Ce" lasi phajhi" abo da" byu yi we"- vang ri" ge'» ga: wigi khe: yoid nyid ga: nheig agyeung: mo, ri nyang: tid.

¹⁷ «Khau" yu da" gyid gi je, cau: nyid goug" zo: da" zooyho, gi je, ngham" nyid,» ga: wigi nyang: tid nyid.

¹⁸ Hau: myiyi: myhi' da" zoo: shoo" joem gi nya: yhoem: khyoo: yhi: bang: gi shid: lo" wigi houg: khyoo: vang loo" mo, gi akhid" moovo moug: moo: ju" nyid boem bye: ziri nyangnu" gi asi, aboin: nghoid ago".