COUNG" NGHEI 87 - Lacid Common Language Bible

Yerusalem Ri: Coung" Nghei Dang:

¹ Aseing gi nya: voogung ri gyeung" shang: da" boem tho' moo nyheung tam: to" abye:.

² Nyang: gi Yerusalem voomoo" ri Israela meing: moo: jo, da- joyoo joem dangain" tho' moo: je" jheddab nyid.

³ Mangso voomoo" we' tam" gyoo: ge'- nang yo' sen: lho: tid to" nyid da" khyoo: joem ri tam" gyo: yu" we'.

⁴ Nga" dang: ri tam" gyo: mungdain: joem da- zhayhen" ri koid uri Egutu yo' Babelon ri ngoo bo kaid byid: wa zi nghoid. Philisti- Turu yo' Sidon byumyu" yiri Yerusalem voogung byu zhayhen" moo ngoo soin: kaid byid: wa zi nghoid.

⁵ Ziun yo' sen: lho: tid zigi mungdain: dangain" ri nyang: seung: ci lho: gyi: myhang: thang su: gi nyang: ri geung: teung jo, nhang: wa nghoid" ga: tid.

⁶ Aseing gi byumyu" yi da" myeing zhayhen" ri lhid" xoem" to" lho: hau: zhayhen" khang" moo" ri Yerusalem voo byu agyeing" khyo" nyangnu" ri kaid yu wa zi nghoid.

⁷ Ziun gi ngoonu" da" mainkaid jeju" dangain" ri yo" kham: yu nhang: da- gyid bug nghoid nyid ga: wigi nyangnu" go" nhoin' ziyo' coung" nghei jihkoin" khoin" boem wa.