COUNG" NGHEI 85 - Lacid Common Language Bible

Mungdain: Shid Re" Akyu" Mho' Khyoo:

¹ Aseing we" nang gi re" da" mougmyid ri nheug khyeug nyid. Israela byumyu" yiri dalheung: doem nyid gi yab gi nhang: loo bye:.

² Nang gi re" byumyu" yi da" yooboo joem ri khyoid pyam byid: wigi nyangnu" da" shoid vhang: yooboo joem ri khyam" sa: byid: pyam bye:.

³ Nyangnu" ri nheug yo: khyoo: nang toem pyam lho: wigi re" da" nheigloem: loung nyid ziri we' jham" loo" nhang: nyid.

⁴ Ngoonu" da" khyoid yu Aseing Mangsoo we"- ngoonu" ri akhang: yo' dakhyoo" ti" doem lhoem: tau yu we'. Ngoonu" ri anoug angei akoid nyid loo.

⁵ Nang gi ngoonu" ri apyaid atoo- nheug jha" yo: nyid wa zi nghoid la". Re" da" nheigloem: ngei" nyid zi khanham we' athang loo wa la".

⁶ Ngoonu" ri yoem dalheing: doem foin' byid: we'. Hougsu" nghoid lang" gi ngoonu" re" da" byumyu" yi nang ri coung" nghei nyid boem wa zi nghoid.

⁷ Aseing we" re" da" geung: teung jhed khyeing: kang: khyeing:- ngoonu" ri toin" shed byid: we'. Nang bo pang" khyoid yu khyoo: ngoonu" ri byid: we'.

⁸ Aseing Mangsoo tid nyid da" dang: ri ngoo tam" gyo: nyid. Ngoonu" gi akoo" adau: da" khyoo: moo avhang: lheung lo" nghoid rigi nya byumyu" yi nghoid da- ngoonu" ri ngei pyo: myenjham" khyoo: byid: wa Nya: dangsoo" khoin" too" byid: bye:.

⁹ Nyang: ri phoug" tab, ngi: shab bang: ri nyang: khyoid yu wa gyeing" nyang: jen" jen" nghoid nyid ziyo' nya: da" khyoid yu phung" yoeb gi ngoonu" da" mungdain: moo: dajo, jo, wa nghoid.

¹⁰ Jheddab ziyo' zed" lhed nheigloem: zung" da" khyoo: gi dage" bo thu lo wigi deungmain" ziyo' ngei pyo: myenjham" khyoo: gi babug bug go" loo wa zi nghoid.

¹¹ Byu yi da" tam" gyo: cang yhe: khyoo: gi mougmyid tho' moo to' do, lo" wigi Mangso da" deungmain" khyoo: gi mougkhung: mo goeb, yu" nyid wa zi nghoid.

¹² Aseing gi ngoonu" ri nyid gi nyid di nhang: wa zi yo' ngoonu" da" mungdain: gi gug zoo meiloem: shivoo: shiloem athang agoin- thu ri" nhang: wa zi nghoid.

¹³ Deingmain" da" khyoo: gi Aseing da" shid khyoo: yhe: lo" wigi nya: shid re" khyoo: nyheung byid: wa zi nghoid.