COUNG" NGHEI 81 - Lacid Common Language Bible

Pui" Shid Re" Jikhoin" Dang:

¹ Ngoonu" da" goem loem byid: nyid su:- Mangsoo ri nyho: coung" nyid ge'. Yaku da" Mangsoo ri jikhoin" dang: yo' coung" nghei nyid ge'.

² Yhang: thui: myheung thui: yo' teing she: lho: zeing tau nu" joem ri baid myheing ge'. Teing joem yo' teing nu" joem ri gyo: ngei tung" baid myheung kaid ge'.

³ Lhoo' xain" yo' lhoo, leung" nyid" ri pui" koid wa shid re" laboo" ri moid: kaid ge'.

⁴ Hau: zigi Israela moo: bo jo, da" tarha" nghoid wigi Yaku da" Mangso jang" mo yo" yu da- pyeing: dang: khoin" joem nghoid.

⁵ Hau: zigi Egutu ri nyang: meing: zain: nyid uri Israela byumyu" yiri byid: to" da" pyeing: khoin" nghoid nyid. Ase, gyo: da" thui: dakhoin" ri ngoonu" shoug" gyo. Hau: da" thui: gi hidsu" nghoid.

⁶ Nanu" da" nung" khung: mo yoovoin' ri ngoo yu khyo' pyam byid: wigi nanu" da" myidzhoo" thung dang da" nung gyoin' joem ri ngoo yu khyo' pyam byid: bye:.

⁷ Nang kyi" khyeug zi shoug" nyid uri ngoo ri yoid, nyid ziyo' ngoo gi nanu" ri: khyoid yu bye:. Uglid hau, nyid da" akhoug: moo gau" jo, da" joyoo mo ngoo nanu" ri tu" byid: bye:. Meriba gyid bug nam, moo ngoo nanu" ri ca: jham" yu" bye:.

⁸ Nga" byumyu" yi we' ngoo tid poin" nyid da" dang: ri tam" gyo: yu ge'. Israela byumyu" yi we' nga" dang: ri nanu" tam" gyoo: wa shid mo ngoo khayhi' vho: ngei nyid lha!

⁹ Nanu" gi gootu: da" yu phara" joem ri khanham we' ayo" noku boem wa.

¹⁰ Ngoo gi nanu" ri Egutu meing: mo wigi khe: thu' yu da" nanu" Aseing Mangsoo nghoid. Nanu" da" nhoid joem ri foo ge'- ngoo nanu" ri zoo: noem kaid byid: wa.

¹¹ Nghoid loug we' nga" da" byumyu" yigi Ngoo ri: atam" gyo: boem. Israela byumyu" yigi ngoo ri tam gyo: lho: cang yhe: boem zi anghoid.

¹² Hougsu" nyangnu" da" nheigloem: thain: da" khyoo: khyo" yhe: loo" goo" baja". Ngoo gi nyangnu" ri akhang" byid: kaid bye:.

¹³ Nga" byumyu" yigi ngoo tid da" dang: ri tam" gyoo: byid: wa zi ngoo khayhi' gyeing" myid vho: nyid lha". Nyangnu" gi ngoo moo: tam" gyo: cang loo wa zi ngoo khayhi' gyeing" nheug byu nyid la".

¹⁴ Ngoo gi nyangnu" da" gyivoo joem ri myab myab soem" loo" nhang: wigi nyangnu" da" gyivoo yi dangain" ri zain: oung: pyam byid: wa zi nghoid.

¹⁵ Ngoo ri: ngheung" nyid bang: gi nga" shidkhoin" moo: gyoug voem ziyo' goeb pid lo boem wigi nyangnu" da" yooboo dam shoug" zo: da" khyoo: gi apyaid atoo: moo: jo, jo, wa zi nghoid bye:.

¹⁶ Nghoid loug we' ge thang da" sungsoo: cen: yo' ngoo nyangnu" ri khu: wigi siyoo mo byooyhid: yo' nyangnu" ri nheugdeug sho' zo: gyi: nhang: wa zi nghoid.