COUNG" NGHEI 80 - Lacid Common Language Bible

Mungdain: Doem So, Koid Loo" Wa Shid Re Akyu" Mho' Khyoo:

¹ Israela byumyu" yi da" yang zung" su: we' ngoonu" ri tam" gyoo: byid: we'. Yang phung: yi da" vhujhung: phoo we' shoug" gyoo: byid: we'.

² Ephrim- Benyamin yo' Manashe byumyu" yiri nanya: gungdu: nyang: thu shug we'. Re" da" yoem: moo" zeing ri toin" shed wigi ngoonu" ri khyoid yu wa shid mo ju" ri" we'.

³ Mangsoo we"- ngoonu" ri doem shu" tau" loo" re o". Re" da" nheig khyeug shoomyen: nheigloem: ngoonu" ri toin" shed byid: we'. Houg: lang" ngoonu" gi khyoid yu zi shau" boem wa nghoid.

⁴ Gyi: myhang: da" Aseing Mangsoo we"- nang gi khamyhang" ju" sho' re" da" byumyu" yi da" akyu" mho' dang: ri nheug yo: nyid shi" wa la".

⁵ Nang gi ngoonu" ri koug shu" ziri zoo: noem ti" byid: zho" wigi ngoug byid ri khu zeing mo kaid jhoug nyid da:.

⁶ Nang gi ngoonu" da" mougmyid yoosoo" ri ayam: aqei: mo mungdain joem wigi re zain: yu nhang: nyid da:. Ngoonu" da" gyivoo joem gi ngoonu" ri aphoug" akhyoid koid nyid boem bye:.

⁷ Athang agoin yoem moo" bo da" Mangsoo we"- ngoonu" ri doem shu" tau" loo" re o". Re" da" nheug khyeug shoo" myen: khyoo: ngoonu" ri toin" shed re- houg: lang" ngoonu" gi khyoid yu zi shau" boem wa nghoid.

⁸ Nang gi Egutu meing: mo zabyid nei dakhaid ri yu ci: lo wigi gootu: byumyu" yiri nang khaid thu pyam lho: hau: ziri nyangnu" da" moug: moo: sho" to" abye:.

⁹ Hau: da" zabyid gyi: joem gi myid jang: moo: cen' zoug lo" wigi gootu: byumyu" yiri nang khaid thu pyam lho: hau: ziri nyangnu" da" moug: moo: sho" to" abye:.

¹⁰ Hau: ziri bouggung joem ri nya: bid shoem yoeb yo' oug nghoeb pyam wigi hau: da" ako' joem gi gye" gyi: myhang: da shamu gam joem ri oug nghoeb lo" nyid abye:.

¹¹ Hau: da" akung: ako' joem gi gyid thoem" zeing moo ju" sho' Uphrad gyid moo" gyung: moo: ju" sho' toid loung: loo" bye:.

¹² Hau: ziri kyam, lheung to" da- khyam: joem ri nang gi ce noem koid ein: phyo' pyam nyid lha" akhid" gi he: da" khyoo: khyo" lid loo" mo, hang" we' hau: zabyid shi" ri shoug" khau" phyo nyid boem abye: ago".

¹³ Hau: shigam' ri vhujhung: joem gi nang: nhe" khyoid lid lo" wigi gougnyhoug goug: doo: joem gi hau: ziyo' voem: gyi: nyid abye: go.

¹⁴ Gyi: myhang: thang da" Mangsoo we"- ngoonu" jhang khyoo: doem tau" loo we'. Mougkhung: tho' mo ngoonu" ri goeb yu" kaid wigi re byumyu" yiri khyoid yu wa shid re" ju" ri" we o".

¹⁵ Nang sho" to" lho: gyi: myhang: yang" loo nhang: da" zabyid gam ri re" lho: goem loem byid: we'.

¹⁶ Re" da" gyivoo joem gi hau: ziri myi: nghe' kaid boem wigi thoug lheung: pyam lo" boem bye:. Akhid" nyangnu" ri gye yoo: nau nheigloem: yo' yu" lho: nyangnu" ri phyo' pyam byid we'.

¹⁷ Nang khyen: yu bye: da" byumyu" yi ein: da- yoem gye" bo loo sho' nang tu: to' kaid da" byumyu" yiri yu" zung" yu" lhoug byid: we'.

¹⁸ Nyangnu" gi khanham we' nang mo khyoo thang: theung lho: phang: thu lo" boem wa zi anghoid. Nyangnu" ri doem dei loo nhang: we' nyangnu" gi nang ri coung" nghei nyid boem wa zi nghoid.

¹⁹ Gyi: myhang: thang da" Mangsoo we"- ngoonu" ri doem shu" tau" loo re, o". Re" da" nheug khyeug shoo" myen: da" nheigloem:- ngoonu" ri toin" shed byid: we' houg: lang" ngoonu" gi khyoid yu zi shau" boem wa nghoid.