COUNG" NGHEI 5 - Lacid Common Language Bible

Zung" Lhoug Goem loem Byid: Wa Shid Re" Akyu" Mho' Dang:

¹ Aseing we" nga" da" dang: joem ri tam" gyoo: byid: we'. Nga" nookyeing" thui: ri: shoug" gyoo: byid: we'.

² Nga" Mangsoo yo' khokham" phoo we" pang" thoug yu wa shid re" nga" da" mho' yoid thui: ri tam" gyoo: byid: we'. O" Aseing we" ngoo akyu" mho' nyid.

³ Nang gi nab soin: zoo" ri nga" thui: ri tam" gyoo: byid: nyid da:. Bidxain" u" ri we' nga" da" akyu" mho' ziyo' nang ri ngei" byid: wigi re" da" doem phoug khyoo: ri dalang" nyid.

⁴ Nang gi adeung amain" da" moo" zoo" ri vho: ngei nyid da" Mangsoo anghoid. Re" da" shidkhoin" moo: akhyeung" da" moo" zoo" ce" ja: ri nghoid loug we' nang bue" loo nhang: zi anghoid.

⁵ Phau: khuang nghoid boin: nyid mo, gi re" shidkhoin" moo ayo" yab jo. Nang gi akhyeung" byu yi dangain" ri ngheung" nyid.

⁶ Aseing gi mhau' fain" da" dang: tid mo, dangain" ri lhu: phyo' pyam ziyo' suid" moid lhu: yen" mo, ri co' nyid.

⁷ Nghoid loug we' re" da" geung: teung jhedkhyeing: kang: khyeing: yoomo ngoo gi re" yhoem: moo" khyoo: yo" ju" re". Re" da" gyeung" shang: Noku Yhoem: Moo" moo: ngoo noku lho: nang ri gyoug phau" zoore goeb pid nyid.

⁸ Aseing we"- ngoo moo: gyivoo myoo" sho bo jo, nang vho: ziyo' dakhyoo" ti" yhi: wa shid re" ngoo ri khyoo: shed byid: we'. Re" khyoo: moo: yo" cang sho ngoo ri gyeing: gyeing: se' gyoo: nhang: we'.

⁹ Nga" gyivoo joem tid da" dang: ce: ja: ri we' khanham we' age loem". Nyangnu" gi lhu: phyo' pyam wa shid re" za: davho: ngei nyid boem ago". Nyangnu" tid sang: da" dang: thui: joem gi cau: main, ziyo' mhoid" coung" nyid boem nghoid loug we' hau: zigi gyoug ca" da" mhau' dang: khoin" joem yo' byeung" jo.

¹⁰ Mangsoo we"- ngoonu" ri tarha" dang: phyed lho: shen" yhen we'. Ngoonu" soin da" akhyoo" joem moo nyangnu" nyang: bo yoin" byo, loo" goo" baja" Nyangnu" gi nang ri gyi koid nyid yoomo nyangnu" ri re" da" shidkhoin" mo koin" thu pyam we'.

¹¹ Nghoid loug we' nang mo goem loem khyoo: shoug" shoo: mo, gi ngei pyo: gau yi boem wa zi za nghoid. Nyangnu" gi khanham we' jikhoin" yo' coung" nghei nyid boem wa zi nghoid. Nang ri jheddab mo, ri goem loem byid: nyid we'. Nang yoomo nyangnu" gi gye" gau yi nyid boem.

¹² Aseing we" nang gi nang ri tam" gyo: nyid mo, ri mainkaid wigi ngoonu" ri goo yhang: ti" lhoug zung" byid: nyid.