COUNG" NGHEI 3 - Lacid Common Language Bible

Pang" Thoug Byid: wa Shid Re" Nab soin: Mo Akyu" Mho' Dang:.

¹ Aseing we"- ngoo moo gyivoo myoo" sho' nyid nyid- myoo" sho bang: ngoo ri tu: lhoin" lo nyid boem bye:.

² «Mangsoo gi nyang: ri pang" yu loo zi anghoid» ga: wigi nyangnu" nga" da" khyoo: ri tid nyid ago".

³ Nghoid loug we' Aseing we" nang gi khanham we' gyoug ci' joyoo mo goem loem yu nyid da" goo nghoid. Nang gi ngoo ri oung: lo" khyoo: phang byid: ziyo' ngoo ri sarhi' yo" koid da" nheigloem: kaid byid: nyid.

⁴ Pang" thoug yu wa shid re" Aseing ri ngoo yoid nyid. Nyang: gi ngoo ri nya: da" gyeung" shang: boem tho' mo tam" gyoo: byid: nyid.

⁵ Ngoo gi jhang" lho: yhoeb jo, Aseing gi ngoo ri damyen goin" goem loem lhoug zung" byid: nyid.

⁶ Nga" gyivoo moin sen: joem ngoo ri shoid zoo shoid zeing khyoo" lheung khoem too" nghoid loug we' ngoo ci: agyug.

⁷ Aseing we" ri" we' nga" Mangsoo we"- ngoo ri khyoid yu we' nang gi nga" gyivoo yi dangain" bang: ri yo' shen" yhen ziyo' nyangnu" da" yoem: ri nang yo" khyau" pyam byid: nyid.

⁸ Oung: doid lo" khyoo: gi Aseing jang" mo za: nghoid nyid. Nyang: gi nya: da" byumyu" yi atho' moo mainkaid byid: nyid baja" o".